ਮੁੰਬਈ (ਭਾਸ਼ਾ): ਮਾਹੀ ਗਿੱਲ ਬਾਲੀਵੁੱਡ ਦੀ ਬੋਲਡ ਅਭੀਨੇਤਰੀਆਂ ਵਿਚ ਸ਼ੁਮਾਰ ਹੈ। ਉਨ੍ਹਾਂ ਨੇ ਸਾਲ 2007 ਵਿਚ ਫਿਲਮ ‘ਖੋਇਆ ਖੋਇਆ ਚੰਨ’ ਨਾਲ ਅਪਣੇ ਫ਼ਿਲਮੀ ਕਰਿਅਰ ਦੀ ਸ਼ੁਰੂਆਤ ਕੀਤੀ ਸੀ। ਮਾਹੀ ਗਿੱਲ ਦਾ ਜਨਮ 19 ਦਸੰਬਰ, 1975 ਨੂੰ ਚੰਡੀਗੜ੍ਹ ਵਿਚ ਹੋਇਆ। ਸਾਲ 2008 ਵਿਚ ਫ਼ਿਲਮ ‘ਦੇਵ ਡੀ’ ਵਿਚ ਅਭਿਐ ਦਿਓਲ ਦੇ ਅਪੋਜਿਟ ਉਨ੍ਹਾਂ ਨੇ ਕੰਮ ਕੀਤਾ ਅਤੇ ਲੋਕਾਂ ਦੀਆਂ ਨਜਰਾਂ ਵਿਚ ਆਈ। ਫਿਲਮ ਵਿਚ ਉਨ੍ਹਾਂ ਨੂੰ ਬਹੁਤ ਪਸੰਦ ਕੀਤਾ ਗਿਆ ਸੀ।

ਪਰ ਸਲਮਾਨ ਖ਼ਾਨ ਦੀ ਇਕ ਫਿਲਮ ਵਿਚ ਕੰਮ ਕਰਨ ਨੂੰ ਲੈ ਕੇ ਉਹ ਅੱਜ ਵੀ ਅਫ਼ਸੋਸ ਕਰਦੀ ਹੈ। ਮਾਹੀ ਮੰਨਦੀ ਹੈ, ਉਨ੍ਹਾਂ ਦਾ ਇਕ ਫੈਸਲਾ ਉਨ੍ਹਾਂ ਦੇ ਕਰਿਅਰ ਲਈ ਨੁਕਸਾਨਦਾਇਕ ਸਾਬਤ ਹੋ ਗਿਆ। ਮਾਹੀ ਦੇ ਮੁਤਾਬਕ, ਸਲਮਾਨ ਖ਼ਾਨ  ਦੀ ਫਿਲਮ ‘ਦਬੰਗ’ ਵਿਚ ਕੰਮ ਕਰਨ ਤੋਂ ਉਨ੍ਹਾਂ ਦੇ ਕਰਿਅਰ ਨੂੰ ਨੁਕਸਾਨ ਹੋਇਆ ਹੈ। ਇਕ ਇੰਟਰਵਿਊ ਵਿਚ ਮਾਹੀ ਨੇ ਕਿਹਾ ਸੀ- ਦੇਵ ਡੀ ਤੋਂ ਬਾਅਦ ਮੈਨੂੰ ਬਹੁਤ ਪਿਆਰ ਅਤੇ ਅਵਾਰਡ ਮਿਲੇ। ਲੋਕ ਮੈਨੂੰ ਫਿਲਮਾਂ ਲਈ ਸਾਇਨ ਕਰਨਾ ਚਾਹੁੰਦੇ ਸਨ, ਪਰ ਮੈਂ ‘ਦਬੰਗ’ ਸਾਇਨ ਕੀਤੀ ਅਤੇ ਇਸ ਨਾਲ ਮੈਨੂੰ ਨੁਕਸਾਨ ਹੋਇਆ।

ਪ੍ਰੋਡਿਊਸਰਸ ਨੇ ਮੈਨੂੰ ਛੋਟੇ ਰੋਲ ਆਫਰ ਕਰਨੇ ਸ਼ੁਰੂ ਕਰ ਦਿਤੇ ਸਨ। ਮੈਨੂੰ ਬਹੁਤ ਭੈੜਾ ਲੱਗਿਆ ਅਤੇ ਮੈਨੂੰ ਸਮਝ ਨਹੀਂ ਆ ਰਿਹਾ ਸੀ ਕਿ ਮੈਂ ਕੀ ਕਰਾਂ। ਮੈਨੂੰ ਕਿਸਮਤ ਉਤੇ ਬਹੁਤ ਵਿਸ਼ਵਾਸ ਹੈ। ਮੈਨੂੰ ਲੱਗਦਾ ਹੈ ਕਿ ਮੇਰੇ ਨਾਲ ਅਜਿਹਾ ਹੋਣਾ ਲਿਖਿਆ ਸੀ। ਮੈਨੂੰ ਇਹ ਰੋਲ ਕਰਨ ਦਾ ਅਫਸੋਸ ਸੀ, ਪਰ ਹੁਣ ਨਹੀਂ ਹੈ। ਉਨ੍ਹਾਂ ਨੇ ਅੱਗੇ ਕਿਹਾ- ਇਹ ਫਿਲਮ ਕਰਨ ਤੋਂ ਬਾਅਦ ਮੇਰਾ ਕਰਿਅਰ ਰੁਕ ਗਿਆ। ਮਾਹੀ ਨੇ ਦੱਸਿਆ ਕਿ ਉਹ ‘ਦਬੰਗ 2’ ਨਹੀਂ ਕਰਨਾ ਚਾਹੁੰਦੀ ਸੀ, ਪਰ ਅਰਬਾਜ ਖ਼ਾਨ ਨੇ ਕਿਹਾ ਕਿ ਸੀਕਵਲ ਵਿਚ ਵੀ ਉਨ੍ਹਾਂ ਦੀ ਜ਼ਰੂਰਤ ਹੈ। ਦੱਸ ਦਈਏ ਕਿ ਅਰਬਾਜ ਫ਼ਿਲਮ ਵਿਚ ਮਾਹੀ ਦੇ ਪਤੀ ਬਣੇ ਸਨ।