ਚੰਡੀਗੜ੍ਹ - ਆਉਣ ਵਾਲੀ ਪੰਜਾਬੀ ਫਿਲਮ ਫੁੱਫੜ ਜੀ ਦੇ ਟ੍ਰੇਲਰ ਨੇ ਪੰਜਾਬੀ ਫਿਲਮ ਪ੍ਰੇਮੀਆਂ ਵਿਚ ਬਹੁਤ ਉਤਸੁਕਤਾ ਪੈਦਾ ਕਰ ਦਿੱਤੀ ਹੈ। ਟ੍ਰੇਲਰ ਨੂੰ ਦਰਸ਼ਕਾਂ ਦਾ ਭਰਵਾਂ ਹੁੰਗਾਰਾ ਮਿਲਿਆ ਹੈ। ਇਸ ਫਿਲਮ ਵਿਚ ਬਿੰਨੂ ਢਿੱਲੋਂ ਵੱਡੇ ਫੁੱਫੜ ਦੇ ਰੂਪ ਵਿਚ ਅਤੇ ਡਾਇਮੰਡ ਬੁਆਏ ਗੁਰਨਾਮ ਭੁੱਲਰ ਛੋਟੇ ਫੁੱਫੜ ਦੇ ਰੂਪ ਵਿਚ ਨਜ਼ਰ ਆਉਣਗੇ, ਉਹਨਾਂ ਦੇ ਨਾਲ ਜੈਸਮੀਨ ਬਾਜਵਾ ਅਤੇ ਸਿਧਿਕਾ ਸ਼ਰਮਾ ਮੁੱਖ ਭੂਮਿਕਾਵਾਂ ਵਿਚ ਹਨ। ਇਹ ਕਾਮੇਡੀ ਡਰਾਮਾ ਫਿਲਮ 19ਵੀਂ ਸਦੀ ਦੀ ਕਹਾਣੀ ਪੇਸ਼ ਕਰੇਗੀ ਕਿ ਕਿਵੇਂ ਸਹੁਰੇ ਜਵਾਈ ਨੂੰ ਇੱਜ਼ਤ ਅਤੇ ਵਿਸ਼ੇਸ਼ ਮਾਣ ਦਿੰਦੇ ਸਨ।
ਟ੍ਰੇਲਰ ਉਜਾਗਰ ਕਰਦਾ ਹੈ ਕਿ 'ਫੁੱਫਡ ਜੀ' ਵਿੱਚ ਕਾਮੇਡੀ, ਡਰਾਮਾ ਅਤੇ ਮਨੋਰੰਜਨ ਦਾ ਸੰਪੂਰਨ ਸੁਮੇਲ ਹੈ, ਜੋ ਇਸਨੂੰ ਇੱਕ ਸੰਪੂਰਣ ਪਰਿਵਾਰਕ ਫਿਲਮ ਬਣਾਉਂਦਾ ਹੈ! 11 ਨਵੰਬਰ ਨੂੰ ਰਿਲੀਜ਼ ਹੋ ਰਹੀ ਇਸ ਫਿਲਮ 'ਚ ਜਿੱਥੇ ਤੁਸੀਂ ਵੱਡੇ ਅਤੇ ਛੋਟੇ ਜਵਾਈ 'ਚ ਨਿੱਕੇ ਨਿੱਕੇ ਝਗੜੇ ਦੇਖੋਗੇ, ਉੱਥੇ ਹੀ ਸਹੁਰੇ ਵਾਲੇ ਵੀ ਦੋਹਾਂ ਦੇ ਗੁੱਸੇ ਨੂੰ ਝੱਲਦੇ ਹੋਏ ਨਜ਼ਰ ਆਉਣਗੇ। ਫਿਲਮ ਦੀ ਕਹਾਣੀ ਅਤੇ ਸਕਰੀਨਪਲੇਅ ਹੀ ਨਹੀਂ, ਫਿਲਮ ਦੇ ਗੀਤ ਵੀ ਦਰਸ਼ਕਾਂ 'ਚ ਖੂਬ ਸੁਰਖੀਆਂ ਬਟੋਰ ਰਹੇ ਹਨ। ਬਲਾਕਬਸਟਰ ਹਿੱਟ ਪੰਜਾਬੀ ਫਿਲਮ ਬੰਬੂਗਾਠ ਦੇਣ ਤੋਂ ਬਾਅਦ, ਨਿਰਦੇਸ਼ਕ ਪੰਕਜ ਬੱਤਰਾ 11 ਨਵੰਬਰ ਨੂੰ 'ਫੁੱਫੜ ਜੀ' ਰਿਲੀਜ਼ ਕਰਨ ਲਈ ਤਿਆਰ ਹਨ, ਜੋ ਕਿ ਬੰਬੂਗਾਠ ਤੋਂ ਅਗਲੇ ਪੱਧਰ 'ਤੇ ਹੋਣ ਜਾ ਰਿਹਾ ਹੈ।
ਬੰਬੂਗਾਠ ਵਿਚ ਅਸੀਂ ਵੱਡੇ 'ਜੀਜੇ' ਅਤੇ ਛੋਟੇ 'ਜੀਜੇ' ਵਿਚਕਾਰ ਸਬੰਧ ਅਤੇ ਹਉਮੈ ਦੀ ਸੰਤੁਸ਼ਟੀ ਲਈ ਉਹਨਾਂ ਦੀ ਲੜਾਈ ਦੇਖੀ। ਹੁਣ ਫੁੱਫੜ ਜੀ ਵਿਚ ਤੁਸੀਂ ਵੱਡੇ 'ਫੁੱਫੜ' ਅਤੇ ਛੋਟੇ 'ਫੁੱਫੜ' ਵਿਚਕਾਰ ਹਉਮੈ ਦੀ ਸੰਤੁਸ਼ਟੀ ਲਈ ਲੜਾਈ ਦੇ ਗਵਾਹ ਹੋਵੋਗੇ। ਫਿਲਮ 'ਫੁੱਫੜ ਜੀ' ਰਾਜੂ ਵਰਮਾ ਦੁਆਰਾ ਲਿਖੀ ਗਈ ਹੈ ਅਤੇ ਪੰਕਜ ਬੱਤਰਾ ਦੁਆਰਾ ਨਿਰਦੇਸ਼ਤ ਹੈ। ਜ਼ੀ ਸਟੂਡੀਓਜ਼ ਅਤੇ ਕੇ ਕੁਮਾਰ ਦੁਆਰਾ ਨਿਰਮਿਤ, ਇਹ ਫਿਲਮ ਜ਼ੀ ਸਟੂਡੀਓਜ਼ ਅਤੇ ਕੇ ਕੁਮਾਰ ਸਟੂਡੀਓਜ਼ ਦੁਆਰਾ ਦੁਨੀਆ ਭਰ ਵਿੱਚ ਰਿਲੀਜ਼ ਕੀਤੀ ਜਾਵੇਗੀ।