Fact Check: ਇਹ ਤਸਵੀਰ ਭਾਰਤੀ ਅਤੇ ਚੀਨੀ ਸੈਨਾ ਦੇ ਟਕਰਾਅ ਦੀ ਨਹੀਂ ਹੈ, ਇਹ ਫਿਲਮ ਦਾ ਇੱਕ ਸੀਨ ਹੈ
ਵਾਇਰਲ ਤਸਵੀਰ LAC ਨਾਂਅ ਦੀ ਫਿਲਮ ਦੀ ਸ਼ੂਟਿੰਗ ਦੇ ਇੱਕ ਸੀਨ ਦਾ ਦ੍ਰਿਸ਼ ਹੈ। ਹੁਣ ਸ਼ੂਟਿੰਗ ਦੇ ਸੀਨ ਦੀ ਤਸਵੀਰ ਨੂੰ ਗਲਤ ਦਾਅਵੇ ਨਾਲ ਸ਼ੇਅਰ ਕੀਤਾ ਜਾ ਰਿਹਾ ਹੈ।
RSFC (Team Mohali)- ਅਰੁਣਾਚਲ ਪ੍ਰਦੇਸ਼ ਵਿਚ ਭਾਰਤੀ ਅਤੇ ਚੀਨੀ ਸੈਨਾ ਵਿਚਕਾਰ ਤਣਾਅ ਦਾ ਮਾਹੌਲ ਬਰਕਰਾਰ ਹੈ। ਹੁਣ ਇਸੇ ਤਣਾਅ ਦੇ ਮਾਹੌਲ ਨੂੰ ਲੈ ਕੇ ਇੱਕ ਤਸਵੀਰ ਵਾਇਰਲ ਹੋ ਰਹੀ ਹੈ ਜਿਸਦੇ ਵਿਚ ਇੱਕ ਸਿੱਖ ਸੈਨਿਕ ਨੂੰ ਇੱਕ ਨੀਲੀ ਵਰਦੀ ਪਾਏ ਜਵਾਨ ਨੂੰ ਬੰਧਕ ਬਣਾਏ ਵੇਖਿਆ ਜਾ ਸਕਦਾ ਹੈ। ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਭਾਰਤੀ ਸੈਨਾ ਨੇ ਅਰੁਣਾਚਲ ਪ੍ਰਦੇਸ਼ ਵਿਚ ਚੀਨ ਦੇ 150 ਸੈਨਿਕਾਂ ਨੂੰ ਬੰਧਕ ਬਣਾ ਲਿਆ ਹੈ ਅਤੇ ਇਹ ਤਸਵੀਰ ਓਸੇ ਦ੍ਰਿਸ਼ ਦੀ ਹੈ।
ਰੋਜ਼ਾਨਾ ਸਪੋਕਸਮੈਨ ਨੇ ਆਪਣੀ ਪੜਤਾਲ ਵਿਚ ਪਾਇਆ ਕਿ ਵਾਇਰਲ ਤਸਵੀਰ LAC ਨਾਂਅ ਦੀ ਫਿਲਮ ਦੀ ਸ਼ੂਟਿੰਗ ਦੇ ਇੱਕ ਸੀਨ ਦਾ ਦ੍ਰਿਸ਼ ਹੈ। ਹੁਣ ਸ਼ੂਟਿੰਗ ਦੇ ਸੀਨ ਦੀ ਤਸਵੀਰ ਨੂੰ ਗੁੰਮਰਾਹਕੁਨ ਦਾਅਵੇ ਨਾਲ ਸ਼ੇਅਰ ਕੀਤਾ ਜਾ ਰਿਹਾ ਹੈ।
ਵਾਇਰਲ ਪੋਸਟ
ਫੇਸਬੁੱਕ ਪੇਜ "Savdhaan ladwa" ਨੇ 9 ਅਕਤੂਬਰ 2021 ਨੂੰ ਵਾਇਰਲ ਤਸਵੀਰ ਸ਼ੇਅਰ ਕਰਦਿਆਂ ਲਿਖਿਆ, "चीनी सेना क़ी घुसपैठ पर बड़े सवाल दागने वालों ने इस पर कोई बात नहीं करी क़ी भारतीय सेना ने अरुणाचल में डेढ़ सौ से ज्यादा चीनी सैनिकों को बंदी बना लिया, फिर जब चीन के सेना के कमांडर और भारतीय कमांडर के बीच में मीटिंग हुई उसके बाद ही उन्हें छोड़ा गया.. ये है बदलता भारत.. जय हिन्द"
ਵਾਇਰਲ ਪੋਸਟ ਹੇਠਾਂ ਕਲਿਕ ਕਰ ਵੇਖਿਆ ਜਾ ਸਕਦਾ ਹੈ।
ਪੜਤਾਲ
ਪੜਤਾਲ ਦੀ ਸ਼ੁਰੂਆਤ ਕਰਦੇ ਹੋਏ ਅਸੀਂ ਸਭਤੋਂ ਪਹਿਲਾਂ ਇਸ ਤਸਵੀਰ ਨੂੰ ਗੂਗਲ ਰਿਵਰਸ ਇਮੇਜ ਟੂਲ ਵਿਚ ਅਪਲੋਡ ਕਰ ਸਰਚ ਕੀਤਾ। ਸਾਨੂੰ ਇਹ ਤਸਵੀਰ "juduo.cc" ਨਾਂਅ ਦੀ ਵੈੱਬਸਾਈਟ 'ਤੇ 12 ਦਿਸੰਬਰ 2020 ਦੀ ਖਬਰ ਵਿਚ ਅਪਲੋਡ ਮਿਲੀ।
ਇਹ ਖਬਰ ਚੀਨੀ ਭਾਸ਼ਾ ਵਿਚ ਸੀ ਇਸਲਈ ਅਸੀਂ ਇਸ ਖਬਰ ਨੂੰ ਗੂਗਲ ਟਰਾਂਸਲੇਟ ਦੀ ਮਦਦ ਨਾਲ ਪੜ੍ਹਿਆ। ਇਸ ਖਬਰ ਅਨੁਸਾਰ ਇਹ ਤਸਵੀਰ "ਗਲਵਾਨ ਵੈਲੀ" ਨਾਂਅ ਦੀ ਫਿਲਮ ਦੀ ਸ਼ੂਟਿੰਗ ਦੌਰਾਨ ਖਿੱਚੀ ਗਈ ਸੀ।
ਅੱਗੇ ਵਧਦੇ ਹੋਏ ਅਸੀਂ ਕੀਵਰਡ ਸਰਚ ਜਰੀਏ ਮਾਮਲੇ ਨੂੰ ਲੈ ਕੇ ਸਰਚ ਤੇਜ਼ ਕੀਤੀ। ਸਾਨੂੰ ਇਸ ਫਿਲਮ ਦੀ ਸ਼ੂਟਿੰਗ ਦੇ ਵੀਡੀਓ Youtube 'ਤੇ ਅਪਲੋਡ ਮਿਲੇ। 6 ਦਿਸੰਬਰ 2020 ਨੂੰ The Suru Studio ਨੇ ਵੀਡੀਓ ਨੂੰ ਸ਼ੇਅਰ ਕਰਦਿਆਂ ਸਿਰਲੇਖ ਦਿੱਤਾ, "L.A.C film shooting in kargil | india vs china | sushaant & rahul roy"
ਮਤਲਬ ਸਾਫ ਸੀ ਕਿ ਵਾਇਰਲ ਤਸਵੀਰ ਇਸ ਵੀਡੀਓ ਦੇ ਇੱਕ ਦ੍ਰਿਸ਼ ਦਾ ਸਕ੍ਰੀਨਸ਼ੋਟ ਹੈ। ਇਹ ਵੀਡੀਓ ਇਥੇ ਕਲਿਕ ਕਰ ਵੇਖਿਆ ਜਾ ਸਕਦਾ ਹੈ।
ਸਾਨੂੰ ਕਈ ਰਿਪੋਰਟਾਂ ਮਿਲੀਆਂ ਜਿਨ੍ਹਾਂ ਅਨੁਸਾਰ ਦਾਅਵਾ ਕੀਤਾ ਗਿਆ ਕਿ ਹਾਲੀਆ ਅਰੁਣਾਚਲ ਪ੍ਰਦੇਸ਼ ਵਿਚ ਚੀਨ ਅਤੇ ਭਾਰਤੀ ਸੈਨਿਕਾਂ ਵਿਚਕਾਰ ਝੜਪ ਹੋਈ ਸੀ ਅਤੇ ਕਰੀਬ 200 ਦੇ ਕਰੀਬ ਚੀਨ ਦੇ ਸੈਨਿਕ ਭਾਰਤ ਦੀ ਸੀਮਾ ਅੰਦਰ ਆ ਗਏ ਸਨ। News 18 ਦੀ ਰਿਪੋਰਟ ਅਨੁਸਾਰ ਕੁਝ ਚੀਨ ਦੇ ਸੈਨਿਕਾਂ ਨੂੰ ਭਾਰਤੀ ਸੈਨਾ ਨੇ ਕੈਦ ਵਿਚ ਲੈ ਲਿਆ ਸੀ।
ਨਤੀਜਾ- ਰੋਜ਼ਾਨਾ ਸਪੋਕਸਮੈਨ ਨੇ ਆਪਣੀ ਪੜਤਾਲ ਵਿਚ ਪਾਇਆ ਕਿ ਵਾਇਰਲ ਤਸਵੀਰ LAC ਨਾਂਅ ਦੀ ਫਿਲਮ ਦੀ ਸ਼ੂਟਿੰਗ ਦੇ ਇੱਕ ਸੀਨ ਦਾ ਦ੍ਰਿਸ਼ ਹੈ। ਹੁਣ ਸ਼ੂਟਿੰਗ ਦੇ ਸੀਨ ਦੀ ਤਸਵੀਰ ਨੂੰ ਗੁੰਮਰਾਹਕੁਨ ਦਾਅਵੇ ਨਾਲ ਸ਼ੇਅਰ ਕੀਤਾ ਜਾ ਰਿਹਾ ਹੈ।
Claim- Image of Indian army capturing Chinese Soldiers at Arunachal Pradesh
Claimed By- FB Page Savdhaan ladwa
Fact Check- Misleading