ਤੱਥ ਜਾਂਚ- ਭਾਜਪਾ ਨੇਤਾ ਜੂਹੀ ਚੌਧਰੀ ਦੀ ਗ੍ਰਿਫ਼ਤਾਰੀ ਦੀ ਪੁਰਾਣੀ ਖ਼ਬਰ ਮੁੜ ਤੋਂ ਵਾਇਰਲ
ਸਪੋਕਸਮੈਨ ਨੇ ਪੜਤਾਲ ਵਿਚ ਪਾਇਆ ਕਿ ਜੂਹੀ ਚੌਧਰੀ ਨੂੰ ਸਾਲ 2017 ਵਿਚ ਬੱਚਿਆਂ ਦੀ ਤਸਕਰੀ ਦੇ ਆਰੋਪ ਵਿਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ
ਰੋਜ਼ਾਨਾ ਸਪੋਕਸਮੈਨ (ਮੋਹਾਲੀ ਟੀਮ) - ਬੰਗਾਲ ਵਿਧਾਨ ਸਭਾ ਚੋਣਾਂ ਨੂੰ ਲੈ ਕੇ ਸਾਰੀਆਂ ਰਾਜਨੀਤਿਕ ਪਾਰਟੀਆਂ ਸਰਗਰਮ ਹਨ। ਚੋਣਾਂ ਨੂੰ ਲੈ ਕੇ ਆਏ ਦਿਨ ਫਰਜ਼ੀ ਖ਼ਬਰਾਂ ਵਾਇਰਲ ਹੁੰਦੀਆਂ ਰਹਿੰਦੀਆਂ ਹਨ। ਇਸੇ ਕ੍ਰਮ ਵਿਚ ਹੁਣ ਪਤਰਿਕਾ ਨਿਊਜ਼ ਦੀ ਇਕ ਕਟਿੰਗ ਵਾਇਰਲ ਹੋ ਰਹੀ ਹੈ। ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਭਾਜਪਾ ਮਹਿਲਾ ਮੋਰਚਾ ਦੀ ਜਰਨਲ ਸਕੱਤਰ ਜੂਹੀ ਚੌਧਰੀ ਦੇ ਬੱਚਾ ਤਸਕਰੀ ਦੇ ਆਰੋਪ ਵਿਚ ਗ੍ਰਿਫ਼ਤਾਰੀ ਹੋਈ ਹੈ। ਇਸ ਦੇ ਨਾਲ ਹੀ ਇਸੇ ਕਟਿੰਗ ਦੇ ਹੇਠਾਂ ਅਮਿਤ ਸ਼ਾਹ ਦੇ ਨਾਲ ਇਕ ਮਹਿਲਾ ਵੀ ਦਿਖਾਈ ਗਈ ਹੈ ਜਿਸ ਜ਼ਰੀਏ ਇਹ ਕਿਹਾ ਜਾ ਰਿਹਾ ਹੈ ਕਿ ਅਮਿਤ ਸ਼ਾਹ ਦੇ ਨਾਲ ਇਹ ਮਹਿਲਾ ਜੂਹੀ ਚੌਧਰੀ ਹੀ ਹੈ।
ਸਪੋਕਸਮੈਨ ਨੇ ਅਪਣੀ ਪੜਤਾਲ ਵਿਚ ਪਾਇਆ ਕਿ ਜੂਹੀ ਚੌਧਰੀ ਨੂੰ ਸਾਲ 2017 ਵਿਚ ਬੱਚਿਆਂ ਦੀ ਤਸਕਰੀ ਦੇ ਆਰੋਪ ਵਿਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ, ਪੁਰਾਣੀ ਖ਼ਬਰ ਨੂੰ ਹਾਲੀਆ ਦੱਸ ਸ਼ੇਅਰ ਕੀਤਾ ਜਾ ਰਿਹਾ ਹੈ। ਇਸ ਦੇ ਨਾਲ ਹੀ ਅਮਿਤ ਸ਼ਾਹ ਦੇ ਨਾਲ ਦਿਖ ਰਹੀ ਮਹਿਲਾ ਜੂਹੀ ਚੌਧਰੀ ਨਹੀਂ ਬਲਕਿ ਪਾਮਿਲਾ ਗੋਸਵਾਮੀ ਹੈ।
ਵਾਇਰਲ ਪੋਸਟ
ਫੇਸਬੱਕ ਪੇਜ਼ Ajit Kumar ਨੇ 6 ਮਾਰਚ ਨੂੰ ਵਾਇਰਲ ਕਟਿੰਗ ਸ਼ੇਅਰ ਕੀਤੀ ਅਤੇ ਕੈਪਸ਼ਨ ਲਿਖਿਆ, ''तड़ीपार अमित शाह की करीबी बंगाल भाजपा नेता जूही चौधरी बच्चों की तस्करी में गिरफ़्तार...????''
ਵਾਇਰਲ ਪੋਸਟ ਦਾ ਅਰਕਾਇਵਰਡ ਲਿੰਕ
ਪੜਤਾਲ
ਪੜਤਾਲ ਸ਼ੁਰੂ ਕਰਦੇ ਹੋਏ ਅਸੀਂ ਵਾਇਰਲ ਕਟਿੰਗ ਨੂੰ ਲੈ ਕੇ ਗੂਗਲ 'ਤੇ ਕੁੱਝ ਕੀਵਰਡ ਸਰਚ ਕੀਤੇ। ਸਰਚ ਦੌਰਾਨ ਸਾਨੂੰ thewirehindi ਦੀ 1 ਮਾਰਚ 2017 ਨੂੰ ਅਪਲੋਡ ਕੀਤੀ ਰਿਪੋਰਟ ਮਿਲੀ ।
ਰਿਪੋਰਟ ਅਨੁਸਾਰ ਪੱਛਮੀ ਬੰਗਾਲ ਦੀ ਸੀਆਈਡੀ ਨੇ ਜਲਪਾਈਗੁੜੀ ਬੱਚਾ ਤਸਕਰੀ ਮਾਮਲੇ ਵਿਚ ਭਾਜਪਾ ਨੇਤਾ ਜੂਹੀ ਚੌਧਰੀ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਇਸ ਮਾਮਲੇ ਵਿਚ ਭਾਜਪਾ ਦੇ ਕੌਮੀ ਜਨਰਲ ਸਕੱਤਰ ਕੈਲਾਸ਼ ਵਿਜੇਵਰਗੀਆ ਅਤੇ ਪ੍ਰਦੇਸ਼ ਮਹਿਲਾ ਮੋਰਚਾ ਦੀ ਪ੍ਰਧਾਨ ਰੂਪਾ ਗਾਂਗੁਲੀ ਦਾ ਨਾਮ ਵੀ ਸਾਹਮਣੇ ਆਇਆ ਸੀ। ਬੱਚਾ ਤਸਕਰੀ ਦੇ ਇਸ ਮੁੱਦੇ ਵਿਚ ਪਾਰਟੀ ਦੇ ਸੂਬਾ ਅਤੇ ਕੇਂਦਰੀ ਨੇਤਾਵਾਂ ਦੇ ਨਾਮ ਸਾਹਮਣੇ ਆਉਣ ਤੋਂ ਬਾਅਦ ਭਾਜਪਾ ਨੂੰ ਸ਼ਰਮਿੰਦਗੀ ਦਾ ਸਾਹਮਣਾ ਕਰਨਾ ਪਿਆ ਸੀ। ਰਿਪੋਰਟ ਵਿਚ ਨਿਊਜ਼ ਏਜੰਸੀ ਏਐਨਆਈ ਦੇ ਟਵੀਟ ਵੀ ਪ੍ਰਕਾਸ਼ਿਤ ਕੀਤੇ ਗਏ ਸਨ ਜਿਸ ਵਿਚ ਜੂਹੀ ਚੌਧਰੀ ਦੀ ਗ੍ਰਿਫ਼ਤਾਰੀ ਦੀਆਂ ਤਸਵੀਰਾਂ ਵੀ ਸਨ।
ਪੂਰੀ ਰਿਪੋਰਟ ਇੱਥੇ ਕਲਿੱਕ ਕਰਕੇ ਪੜ੍ਹੀ ਜਾ ਸਕਦੀ ਹੈ।
ਇਸ ਮਾਮਲੇ ਨੂੰ ਲੈ ਕੇ ਆਜ ਤੱਕ ਦੀ ਰਿਪੋਰਟ ਇੱਥੇ ਕਲਿੱਕ ਕਰ ਕੇ ਪੜ੍ਹੀ ਜਾ ਸਕਦੀ ਹੈ। ਇਹ ਰਿਪੋਰਟ ਵੀ 1 ਮਾਰਚ 2017 ਨੂੰ ਅਪਲੋਡ ਕੀਤੀ ਗਈ ਸੀ।
ਇੰਨੀ ਪੜਤਾਲ ਤੋਂ ਇਹ ਸਾਫ਼ ਹੈ ਕਿ ਵਾਇਰਲ ਕਟਿੰਗ ਵਿਚ ਜੋ ਖ਼ਬਰ ਦਿਖਾਈ ਜਾ ਰਹੀ ਹੈ ਉਹ ਹਾਲੀਆ ਨਹੀਂ 3 ਸਾਲ ਪੁਰਾਣੀ ਹੈ।
ਹੁਣ ਵਾਰੀ ਸੀ ਅਮਿਤ ਸ਼ਾਹ ਨਾਲ ਦਿਖ ਰਹੀ ਮਹਿਲਾ ਬਾਰੇ ਪੜਤਾਲ ਕਰਨ ਦੀ। ਅਸੀਂ ਵਾਇਰਲ ਕਟਿੰਗ ਵਿਚੋਂ ਅਮਿਤ ਸਾਹ ਵਾਲੀ ਤਸਵੀਰ ਨੂੰ ਕਰਾਪ ਕਰ ਰਿਵਰਸ ਇਮੇਜ਼ ਕੀਤਾ। ਸਰਚ ਦੌਰਾਨ ਸਾਨੂੰ ਇਹ ਤਸਵੀਰ ਪਮਿਲਾ ਗੋਸਵਾਮੀ ਦੇ ਫੇਸਬੁੱਕ ਪੇਜ਼ 'ਤੇ 7 ਨਵੰਬਰ 2020 ਨੂੰ ਅਪਲੋਡ ਕੀਤੀ ਮਿਲੀ।
ਪੋਸਟ ਨੂੰ ਹੇਠਾਂ ਦੇਖਿਆ ਜਾ ਸਕਦਾ ਹੈ।
ਸਾਨੂੰ ਸਰਚ ਦੌਰਾਨ Barni Studio ਦੇ ਯੂਟਿਊਬ ਪੇਜ਼ 'ਤੇ ਅਪਲੋਡ ਕੀਤਾ ਵੀਡੀਓ ਵੀ ਮਿਲਿਆ ਜੋ ਇਸੇ ਵਾਇਰਲ ਤਸਵੀਰ ਦੇ ਬਾਰੇ ਵਿਚ ਹੀ ਸੀ। ਇਸ ਵੀਡੀਓ ਵਿਚ ਵੀ ਵਾਇਰਲ ਤਸਵੀਰ ਨੂੰ ਦੇਖਿਆ ਜਾ ਸਕਦਾ ਹੈ।
ਮਤਲਬ ਸਾਫ਼ ਹੈ ਕਿ ਅਮਿਤ ਸ਼ਾਹ ਦੇ ਨਾਲ ਦਿਖ ਰਹੀ ਮਹਿਲਾ ਪਾਮੇਲਾ ਗੋਸਵਾਮੀ ਹੀ ਹੈ।
ਨਤੀਜਾ - ਸਪੋਕਸਮੈਨ ਨੇ ਆਪਣੀ ਪੜਤਾਲ ਵਿਚ ਵਾਇਰਲ ਦਾਅਵਾ ਫਰਜ਼ੀ ਪਾਇਆ ਹੈ। ਭਾਜਪਾ ਨੇਤਾ ਜੂਹੀ ਚੌਧਰੀ ਬੱਚਾ ਤਸਕਰੀ ਦੇ ਮਾਮਲੇ ਵਿਚ ਗ੍ਰਿਫ਼ਤਾਰ ਹੋਈ ਜ਼ਰੂਰ ਸੀ ਪਰ ਇਹ ਮਾਮਲਾ 2017 ਦਾ ਹੈ ਜਿਸ ਨੂੰ ਹਾਲੀਆ ਦੱਸ ਵਾਇਰਲ ਕੀਤਾ ਜਾ ਰਿਹਾ ਹੈ। ਇਸ ਦੇ ਨਾਲ ਹੀ ਅਮਿਤ ਸ਼ਾਹ ਦੇ ਨਾਲ ਦਿਖ ਰਹੀ ਮਹਿਲਾ ਪਾਮਿਲਾ ਗੋਸਵਾਮੀ ਹੈ ਨਾ ਕਿ ਜੂਹੀ ਚੌਧਰੀ।
Claim : ਭਾਜਪਾ ਮਹਿਲਾ ਮੋਰਚਾ ਦੀ ਜਰਨਲ ਸਕੱਤਰ ਜੂਹੀ ਚੌਧਰੀ ਦੇ ਬੱਚਾ ਤਸਕਰੀ ਦੇ ਆਰੋਪ ਵਿਚ ਹੋਈ ਗ੍ਰਿਫ਼ਤਾਰੀ
Claimed By: Ajit Kumar
fact Check : ਫਰਜ਼ੀ