ਤੱਥ ਜਾਂਚ- ਅਮਿਤ ਸ਼ਾਹ ਦੇ ਬੰਗਾਲ ਦੌਰੇ ਨੂੰ ਲੈ ਕੇ ਮਮਤਾ ਬੈਨਰਜੀ ਦਾ ਪੁਰਾਣਾ ਵੀਡੀਓ ਵਾਇਰਲ
ਰੋਜ਼ਾਨਾ ਸਪੋਕਸਮੈਨ ਨੇ ਪਾਇਆ ਕਿ ਵੀਡੀਓ ਸਬੰਧੀ ਕੀਤਾ ਜਾ ਰਿਹਾ ਦਾਅਵਾ ਫਰਜ਼ੀ ਹੈ। ਵਾਇਰਲ ਵੀਡੀਓ 2006 ਦੀ ਹੈ।
ਰੋਜ਼ਾਨਾ ਸਪੋਕਸਮੈਨ ( ਮੁਹਾਲੀ ਟੀਮ): ਬੰਗਾਲ ਵਿਚ ਹੋਣ ਜਾ ਰਹੀਆਂ 2021 ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਬੰਗਾਲ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਦਾ ਇਕ ਵੀਡੀਓ ਵਾਇਰਲ ਕੀਤਾ ਜਾ ਰਿਹਾ ਹੈ। ਵੀਡੀਓ ਸਬੰਧੀ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਮਮਤਾ ਬੈਨਰਜੀ ਦਾ ਗੁੱਸੇ ਵਾਲਾ ਵੀਡੀਓ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਦੇ ਬੰਗਾਲ ਦੌਰੇ ਨਾਲ ਸਬੰਧਤ ਹੈ।
ਰੋਜ਼ਾਨਾ ਸਪੋਕਸਮੈਨ ਨੇ ਪਾਇਆ ਕਿ ਵੀਡੀਓ ਸਬੰਧੀ ਕੀਤਾ ਜਾ ਰਿਹਾ ਦਾਅਵਾ ਫਰਜ਼ੀ ਹੈ। ਵਾਇਰਲ ਵੀਡੀਓ 2006 ਦੀ ਹੈ।
ਵਾਇਰਲ ਪੋਸਟ ਦਾ ਦਾਅਵਾ
ਫੇਸਬੁੱਕ ਯੂਜ਼ਰ CP Bhakta ਨੇ 19 ਦਸੰਬਰ ਨੂੰ ਮਮਤਾ ਬੈਨਰਜੀ ਦੀ ਪੁਰਾਣੀ ਵੀਡੀਓ ਸਾਂਝੀ ਕੀਤੀ। ਵੀਡੀਓ ਵਿਚ ਮਮਤਾ ਬੈਨਰਜੀ ਗੁੱਸੇ ‘ਚ ਦਿਖਾਈ ਦੇ ਰਹੀ ਹੈ ਤੇ ਉਹ ਬੰਗਾਲੀ ਭਾਸ਼ਾ ਵਿਚ ਕੁਝ ਬੋਲ ਰਹੀ ਹੈ। ਵੀਡੀਓ ‘ਤੇ ਲਿਖਿਆ ਹੋਇਆ ਹੈ, ‘ਭਾਜਪਾ ਵਾਲੇ ਇਸ ਨੂੰ ਪਾਗਲ ਕਰ ਕੇ ਛੱਡਣਗੇ’।
ਇਸ ਦੇ ਨਾਲ ਕੈਪਸ਼ਨ ਦਿੱਤਾ ਗਿਆ ਹੈ ਕਿ ‘अमीत शाह का बंगाल का दौरा, और दीदी का पागलपन का दौरा।‘ ਇਸ ਤਰ੍ਹਾਂ ਦੇ ਹੋਰ ਵੀ ਕਈ ਦਾਅਵੇ ਕੀਤੇ ਜਾ ਰਹੇ ਹਨ।
ਰੋਜ਼ਾਨਾ ਸਪੋਕਸਮੈਨ ਵੱਲੋਂ ਕੀਤੀ ਗਈ ਪੜਤਾਲ
ਵੀਡੀਓ ਦੀ ਪੁਸ਼ਟੀ ਲਈ ਅਸੀਂ ਸਭ ਤੋਂ ਪਹਿਲਾਂ mamata banerjee reaction on amit shah bengal visit ਕੀਵਰਡ ਸਰਚ ਕੀਤਾ। ਇਸ ਸਬੰਧੀ ਕੋਈ ਮੀਡੀਆ ਰਿਪੋਰਟ ਸਾਹਮਣੇ ਨਹੀਂ ਆਈ, ਜਿਸ ਤੋਂ ਪਤਾ ਲੱਗਿਆ ਕਿ ਵੀਡੀਓ ਹਾਲੀਆ ਨਹੀਂ ਹੈ।
ਵੀਡੀਓ ਦਾ ਸੱਚ ਜਾਣਨ ਲਈ ਅਸੀਂ ਵਾਇਰਲ ਵੀਡੀਓ ਦਾ ਸਕਰੀਨਸ਼ਾਟ ਲਿਆ ਤੇ ਫੋਟੋ ਨੂੰ yandex image search ਟੂਲ ‘ਤੇ ਪਾਇਆ। ਇੱਥੇ ਨਤੀਜੇ ਵਜੋਂ ਯੂਟਿਊਬ ‘ਤੇ Vinay Raghav1984 ਨਾਂਅ ਦੇ ਯੂਜ਼ਰ ਵੱਲੋਂ 8 ਜਨਵਰੀ 2020 ਨੂੰ ਅਪਲੋਡ ਕੀਤੀ ਵੀਡੀਓ ਸਾਹਮਣੇ ਆਈ। ਇਹ ਉਹੀ ਵੀਡੀਓ ਸੀ ਜੋ ਫਰਜ਼ੀ ਦਾਅਵੇ ਨਾਲ ਵਾਇਰਲ ਕੀਤੀ ਜਾ ਰਹੀ ਹੈ।
ਇਸ ਤੋਂ ਇਹ ਸਾਬਿਤ ਹੋ ਗਿਆ ਕਿ ਵੀਡੀਓ ਪੁਰਾਣੀ ਹੈ ਪਰ ਕਿੰਨੀ ਪੁਰਾਣੀ ਹੈ, ਇਸ ਦੀ ਜਾਂਚ ਲਈ ਯੂਟਿਊਬ ‘ਤੇ mamata banerjee shouting ਕੀਵਰਡ ਨਾਲ ਸਰਚ ਕੀਤਾ, ਇੱਥੇ ਸਾਨੂੰ 8.22 ਮਿੰਟ ਦਾ ਵੀਡੀਓ ਮਿਲਿਆ।
ਵੀਡੀਓ ਦਾ ਟਾਈਟਲ Mamata Banerjee and TMC Destroy West Bengal Parliament ਦਿੱਤਾ ਗਿਆ ਸੀ ਤੇ ਵੀਡੀਓ 26 ਸਤੰਬਰ 2013 ਨੂੰ ਅਪਲੋਡ ਕੀਤੀ ਗਈ। ਵੀਡੀਓ ਹੇਠਾਂ ਦਿੱਤੇ ਗਏ ਕਮੈਂਟਸ ਵਿਚ ਇਕ ਵਿਅਕਤੀ ਨੇ ਲਿਖਿਆ ਕਿ ਇਹ ਵੀਡੀਓ 2006 ਦੀ ਹੈ।
ਵਧੇਰੇ ਪੁਸ਼ਟੀ ਲਈ ਅਸੀਂ ਵੀਡੀਓ ਵਿਚ ਦਿੱਤੇ ਗਏ ਕੀਵਰਡ ਦੀ ਵਰਤੋਂ ਨਾਲ ਗੂਗਲ ਸਰਚ ਕੀਤਾ ਤਾਂ 30 ਨਵੰਬਰ 2006 ਦੀ ਐਨਡੀਟੀਵੀ ਵੱਲੋਂ ਪ੍ਰਕਾਸ਼ਿਤ ਮੀਡੀਆ ਰਿਪੋਰਟ ਸਾਹਮਣੇ ਆਈ। ਇਸ ਨੂੰ ਤੁਸੀਂ ਇੱਥੇ ਵੀ ਦੇਖ ਸਕਦੇ ਹੋ।
https://www.ndtv.com/video/news/news/mamata-on-rampage-in-wb-assembly-9543
ਇਸ ਤੋਂ ਇਲਾਵਾ ਟਾਈਮਜ਼ ਆਫ ਇੰਡੀਆ ਦੀ ਰਿਪੋਰਟ ਤੋਂ ਵੀ ਪੁਸ਼ਟੀ ਹੋਈ ਕਿ ਇਹ ਵੀਡੀਓ 2006 ਦੀ ਹੈ।
https://timesofindia.indiatimes.com/india/Bedlam-in-West-Bengal-assembly/articleshow/657816.cms
ਮੀਡੀਆ ਰਿਪੋਰਟ ਤੋਂ ਜਾਣਕਾਰੀ ਮਿਲੀ ਕਿ ਵਾਇਰਲ ਵੀਡੀਓ ਉਸ ਦੌਰਾਨ ਦੀ ਹੈ ਜਦੋਂ ਤ੍ਰਿਣਮੂਲ ਕਾਂਗਰਸ ਦੀ ਨੇਤਾ ਮਮਤਾ ਬੈਨਰਜੀ ਟਾਟਾ ਮੋਰਟਰਜ਼ ਵੱਲੋਂ ਨੈਨੋ ਪਲਾਂਟ ਲਗਾਉਣ ਲਈ ਉਪਜਾਊ ਜ਼ਮੀਨ ਐਕਵਾਇਰ ਕਰਨ ਦਾ ਵਿਰੋਧ ਕਰ ਰਹੀ ਸੀ।
ਇਸ ਦੌਰਾਨ ਬੰਗਾਲ ਪੁਲਿਸ ਨੇ ਮਮਤਾ ਬੈਨਰਜੀ ਨੂੰ ਸਿੰਗੂਰ ਆਉਣ ਤੋਂ ਰੋਕਿਆ ਤੇ ਉਹਨਾਂ ‘ਤੇ ਹਮਲਾ ਕੀਤਾ। ਇਸ ਤੋਂ ਬਾਅਦ ਟੀਐਮਸੀ ਵਰਕਰਾਂ ਤੇ ਵਿਧਾਇਕਾਂ ਨੇ ਪੱਛਮੀ ਬੰਗਾਲ ਵਿਧਾਨ ਸਭਾ ਵਿਚ ਪ੍ਰਦਰਸ਼ਨ ਕੀਤਾ। ਇਸ ਦੌਰਾਨ ਮਮਤਾ ਬੈਨਰਜੀ ਦੇ ਹੱਥ ਵਿਚ ਸੰਵਿਧਾਨ ਦੀ ਕਾਪੀ ਵੀ ਸੀ। ਇਸ ਸਬੰਧੀ ਜਾਣਕਾਰੀ ਤ੍ਰਿਣਮੂਲ ਕਾਂਗਰਸ ਦੀ ਵੈੱਬਸਾਈਟ ‘ਤੇ ਵੀ ਦਿੱਤੀ ਗਈ ਹੈ।
http://aitcofficial.org/aitc/singur-movementthe-full-story-the-struggle-of-ma-mati-manush/
ਨਤੀਜਾ - ਸਪੋਕਸਮੈਨ ਨੇ ਆਪਣੀ ਪੜਤਾਲ ਵਿਚ ਪਾਇਆ ਕਿ ਵਾਇਰਲ ਵੀਡੀਓ 2006 ਦੀ ਹੈ ਜਦੋਂ ਸਿੰਗੂਰ ਅੰਦੋਲਨ ਦੇ ਚਲਦਿਆਂ ਮਮਤਾ ਬੈਨਰਜੀ ਨੂੰ ਸਿੰਗੂਰ ਜਾਣ ਤੋਂ ਰੋਕਿਆ ਗਿਆ। ਇਸ ਦੌਰਾਨ ਉਹਨਾਂ ਨੇ ਪੱਛਮੀ ਬੰਗਾਲ ਵਿਧਾਨ ਸਭਾ ਵਿਚ ਪ੍ਰਦਰਸ਼ਨ ਕੀਤਾ ਸੀ।
Claim – ਅਮਿਤ ਸ਼ਾਹ ਦੇ ਬੰਗਾਲ ਦੌਰੇ ਤੋਂ ਬਾਅਦ ਗੁੱਸੇ ‘ਚ ਆਈ ਮਮਤਾ ਬੈਨਰਜੀ।
Claimed By - CP Bhakta
Fact Check - ਗਲਤ