ਕਣਕ ਦਾ ਦਾਣਾ ਸੁੰਗੜਨ ਨਾਲ ਕਿਸਾਨਾਂ ਦੇ 9067 ਕਰੋੜ ਰੁਪਏ ਦੇ ਨੁਕਸਾਨ ਦਾ ਅਨੁਮਾਨ

Farmer

ਕੁਦਰਤੀ ਆਫ਼ਤ ਕਾਰਨ ਪੰਜਾਬ 'ਚ ਨੁਕਸਾਨੀ ਗਈ ਹੈ ਘੱਟ ਤੋਂ ਘੱਟ 45 ਲੱਖ ਟਨ ਕਣਕ 
 ਖ਼ੁਰਾਕ ਤੇ ਸਪਲਾਈ ਮੰਤਰੀ ਲਾਲ ਚੰਦ ਕਟਾਰੂਚੱਕ ਨੇ ਖਰੀਦ ਦੇ ਮਾਪਦੰਡਾਂ 'ਚ 6 ਤੋਂ ਵਧਾ ਕੇ 20 ਫ਼ੀ ਸਦੀ ਤੱਕ ਛੋਟ ਲਈ ਕੇਂਦਰ ਨੂੰ ਲਗਾਈ ਗੁਹਾਰ 

ਚੰਡੀਗੜ੍ਹ (ਗੁਰਉਪਦੇਸ਼ ਭੁੱਲਰ) : ਪੰਜਾਬ 'ਚ ਇਸ ਵਾਰ ਪਹਿਲਾਂ ਪਈ ਸਖ਼ਤ ਗਰਮੀ ਕਾਰਨ ਕਣਕ ਦੇ ਦਾਣੇ ਦੇ ਸੰਗੜ ਕੇ ਖ਼ਰਾਬ ਹੋ ਜਾਣ ਕਾਰਨ ਫ਼ਸਲ ਦੇ ਵਾੜ 'ਚ ਆਈ ਕਮੀ ਕਾਰਨ ਕਿਸਾਨਾਂ ਦਾ 9067 ਕਰੋੜ ਰੁਪਏ ਦਾ ਨੁਕਸਾਨ ਹੋਣ ਦਾ ਅਨੁਮਾਨ ਲਾਇਆ ਗਿਆ ਹੈ | ਕਣਕ ਦੇ ਨੁਕਸਾਨ ਕਾਰਨ ਹੁਣ ਤਕ ਪਿਛਲੇ ਕੁੱਝ ਦਿਨਾਂ ਦੌਰਾਨ ਹੀ 18 ਕਿਸਾਨ ਖ਼ੁਦਕੁਸ਼ੀ ਕਰ ਚੁਕੇ ਹਨ ਪਰ ਕੇਂਦਰ ਸਰਕਾਰ ਦਾ ਮਨ ਹਾਲੇ ਵੀ ਨਹੀਂ ਪਸੀਜਿਆ |

ਪੰਜਾਬ ਸਰਕਾਰ ਨੇ ਵੀ ਨੁਕਸਾਨ ਦੀ ਭਰਪਾਈ ਲਈ ਕਿਸਾਨ ਆਗੂਆਂ ਨਾਲ ਕੀਤੇ ਵਾਅਦੇ ਨੂੰ  ਪੂਰਾ ਕਰਨ ਬੋਨਸ ਦੇਣ ਦਾ ਵੀ ਕੋਈ ਫ਼ੈਸਲਾ ਨਹੀਂ ਲਿਆ | ਕੇਂਦਰ ਸਰਕਾਰ ਵਲੋਂ ਕਣਕ ਦੇ ਨੁਕਸਾਨ ਦੇ ਜਾਇਜ਼ੇ ਲਈ ਕੇਂਦਰ ਵਲੋਂ ਭੇਜੀਆਂ ਟੀਮਾਂ ਨੇ ਵੀ ਹਫ਼ਤਾ ਪਹਿਲਾਂ ਰੀਪੋਰਟ ਪੰਜਾਬ ਦੇ ਹੱਕ 'ਚ ਦਿਤੀ ਹੈ ਪਰ ਕੇਂਦਰ ਨੇ ਮਾਪਦੰਡਾਂ 'ਚ ਛੋਟ ਦਾ ਕੋਈ ਐਲਾਨ ਹਾਲੇ ਨਹੀਂ ਕੀਤਾ | ਮੁੜ ਸੂਬੇ ਦੇ ਖ਼ੁਰਾਕ ਤੇ ਸਪਲਾਈ ਮੰਤਰੀ ਲਾਲ ਚੰਦ ਕਟਾਰੂਚੱਕ ਦੇ ਖਰੀਦ ਦੇ ਮਾਪਦੰਡਾਂ 'ਚ 6 ਤੋਂ ਵਧਾ ਕੇ 20 ਫ਼ੀ ਸਦੀ ਤੱਕ ਛੋਟ ਲਈ ਕੇਂਦਰ ਨੂੰ  ਗੁਹਾਰ ਲਗਾਈ |

ਪੇਂਡੂ ਵਿਕਾਸ ਫ਼ੰਡ ਦਾ ਵੀ 45 ਕਰੋੜ ਦਾ ਨੁਕਸਾਨ : ਰਾਜੇਵਾਲ
ਭਾਰਤੀ ਕਿਸਾਨ ਯੂਨੀਅਨ (ਰਾਜੇਵਾਲ) ਦੇ ਪ੍ਰਧਾਨ ਸ. ਬਲਬੀਰ ਸਿੰਘ ਰਾਜੇਵਾਲ ਨੇ ਕਿਹਾ ਕਿ ਸਰਕਾਰੀ ਟੀਚੇ ਅਨੁਸਾਰ ਪੰਜਾਬ ਵਿਚ ਘੱਟ ਤੋਂ ਘੱਟ 45 ਲੱਖ ਟਨ ਕਣਕ ਦਾ ਕੁਦਰਤੀ ਆਫ਼ਤ ਕਾਰਨ ਨੁਕਸਾਨ ਹੋ ਗਿਆ | ਇੰਜ ਕੁਦਰਤ ਨੇ ਕਿਸਾਨਾਂ ਦੀ ਜੇਬ ਵਿਚੋਂ 9067.5 ਕਰੋੜ ਖੋਹ ਲਏ | ਪੰਜਾਬ ਦੇ ਖਜਾਨੇ ਵਿਚ ਮਾਰਕੀਟ ਫ਼ੀਸ ਅਤੇ ਪੇਂਡੂ ਵਿਕਾਸ ਫ਼ੰਡ ਦਾ ਵੀ 54.3 ਕਰੋੜ ਦਾ ਨੁਕਸਾਨ ਹੋ ਗਿਆ |

22.5 ਕਰੋੜ ਆੜ੍ਹਤੀਆਂ ਦੇ ਵੀ ਗਏ | ਇੰਜ ਪੰਜਾਬ ਦੇ ਬਜਾਰ ਵਿੱਚੋਂ 9144.3 ਕਰੋੜ ਗਾਇਬ ਹੋ ਗਏ | ਸਪੱਸ਼ਟ ਹੈ ਕਿ ਬਜਾਰ ਵੀ ਡੁੱਬੇਗਾ | ਰਾਜੇਵਾਲ ਨੇ ਕਿਹਾ ਕਿ ਸਰਕਾਰ ਜੋ ਕਿਸਾਨ ਨੂੰ  ਅੰਨਦਾਤਾ ਕਹਿੰਦੀ ਹੈ, ਜੇਕਰ ਇਕ ਵੀ ਕਿਸਾਨ ਖੁਦਕੁਸ਼ੀ ਕਰੇ ਤਾਂ ਪ੍ਰਸਾਸ਼ਨ ਅਤੇ ਸਰਕਾਰਾਂ ਨੂੰ  ਹਿੱਲ ਜਾਣਾ ਚਾਹੀਦਾ ਹੈ | ਉਨ੍ਹਾਂ ਕਿਹਾ ਕਿ ਅੱਜ ਤੱਕ 18 ਕਿਸਾਨ ਕਣਕ ਦਾ ਝਾੜ ਘਟਣ ਕਾਰਨ ਅਪਣੀ ਜਾਨ ਦੇ ਚੁੱਕੇ ਹਨ | ਪਰ ਨਾ ਕੇਂਦਰ ਸਰਕਾਰ ਅਤੇ ਨਾ ਹੀ ਪੰਜਾਬ ਦੀ ਸਰਕਾਰ ਨੂੰ  ਇਸ ਅਤਿਅੰਤ ਦੁੱਖਦਾਈ ਘਟਨਾ ਨਾਲ ਕੋਈ ਫਰਕ ਪਿਆ ਲੱਗਦਾ ਹੈ |