ਨਵੀਂ
ਦਿੱਲੀ, 31 ਅਗੱਸਤ (ਸੁਖਰਾਜ ਸਿੰਘ): ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਛਤਰ-ਛਾਇਆ ਹੇਠ
ਮਹਾਨ ਸ਼ਹੀਦਾਂ, ਸ਼ਹੀਦ ਬਾਬਾ ਦੀਪ ਸਿੰਘ ਜੀ, ਭਾਈ ਮਤੀ ਦਾਸ ਜੀ, ਬਾਬਾ ਬੰਦਾ ਸਿੰਘ ਬਹਾਦਰ
ਜੀ ਅਤੇ ਬਾਬਾ ਹਿੰਮਤ ਸਿੰਘ ਜੀ ਨੂੰ ਪ੍ਰਣਾਮ ਕਰਨ ਅਤੇ ਉਨ੍ਹਾਂ ਦੀ ਮਿਠੀ ਯਾਦ ਵਿਚ ਇਕ
ਵਿਸ਼ਾਲ ਕੀਰਤਨ ਸਮਾਗਮ ਅਗਰਵਾਲ ਚੌਕ, ਚੰਦਰ ਵਿਹਾਰ ਦੇ ਨਜਦੀਕ ਗੁਰਦਵਾਰਾ ਸ਼੍ਰੀ ਗੁਰੂ
ਸਿੰਘ ਸਭਾ ਰਣਜੀਤ ਵਿਹਾਰ ਦੀ ਪ੍ਰਬੰਧਕੀ ਕਮੇਟੀ ਤੇ ਸਥਾਨਕ ਸੰਗਤ ਦੇ ਸਹਿਯੋਗ ਨਾਲ ਗੁਰਜਸ
ਕੀਰਤਨੀ ਜਥੇ ਵਲੋਂ ਬੀਤੇ ਦਿਨੀਂ ਕਰਵਾਇਆ ਗਿਆ। ਇਸ ਸਬੰਧੀ ਭਾਈ ਮਲਕੀਤ ਸਿੰਘ ਨਿਰਮਾਨ
ਨੇ ਦਸਿਆ ਕਿ ਇਹ ਕੀਰਤਨ ਸਮਾਗਮ ਸ਼ਾਮੀ ਰਹਿਰਾਸ ਸਾਹਿਬ ਜੀ ਦੇ ਪਾਠ ਨਾਲ ਆਰੰਭ ਹੋਇਆ ਤੇ
ਜੋ ਦੇਰ ਰਾਤ ਤਕ ਚਲਿਆ ਸੀ, ਜਿਸ ਵਿਚ ਭਾਈ ਗੁਰਮੁਖ ਸਿੰਘ (ਹਜੂਰੀ ਰਾਗੀ), ਬੀਬੀ
ਦਵਿੰਦਰ ਕੌਰ (ਦਿੱਲੀ ਵਾਲੇ), ਭਾਈ ਹਰਬੰਸ ਸਿੰਘ (ਦਿੱਲੀ ਵਾਲੇ), ਭਾਈ ਜੋਗਿੰਦਰ ਸਿੰਘ
(ਦਿੱਲੀ ਵਾਲੇ), ਭਾਈ ਹਰਤੀਰਥ ਸਿੰਘ ਦਿੱਲੀ ਵਾਲਿਆਂ ਦੇ ਰਾਗੀ ਜਥੇ ਨੇ ਗੁਰਬਾਣੀ ਦੇ
ਮਨੋਹਰ ਕੀਰਤਨ ਰਾਹੀ ਸੰਗਤਾਂ ਨੂੰ ਨਿਹਾਲ ਕੀਤਾ ਅਤੇ ਕਥਾ ਵਾਚਕ ਭਾਈ ਮਲਕੀਤ ਸਿੰਘ
ਨਿਰਮਾਨ ਦਿੱਲੀ ਵਾਲਿਆਂ ਨੇ ਸ਼ਹੀਦਾਂ ਦੀ ਸ਼ਹਾਦਤ ਅਤੇ ਸਿੱਖ ਇਤਿਹਾਸ ਤੋਂ ਸੰਗਤ ਨੂੰ ਜਾਣੂ
ਕਰਵਾਇਆ।
ਭਾਈ ਨਿਰਮਾਨ ਨੇ ਦਸਿਆ ਕਿ ਹਰਨਾਮ ਸਿੰਘ ਭਾਟੀਆ, ਅਮਨ ਸਿੰਘ ਸੰਧੂ,
ਗੁਲਬਾਗ ਸਿੰਘ, ਹਰਵਿੰਦਰ ਸਿੰਘ ਤੋਂ ਇਲਾਵਾ ਇਸ ਕੀਰਤਨ ਸਮਾਗਮ ਨੂੰ ਚੰਦਰ ਵਿਹਾਰ,
ਹੇਮਗਿਰੀ ਇੰਕਲੇਵ ਅਤੇ ਰਣਜੀਤ ਵਿਹਾਰ ਦੀਆਂ ਸ਼ਥਾਨਕ ਸੰਗਤ ਨੇ ਰਲ-ਮਿਲ ਕੇ ਸਫ਼ਲਾ ਬਣਾਉਣ
ਲਈ ਅਪਣਾ-ਅਪਣਾ ਬਣਦਾ ਹਿਸਾ ਪਾਇਆ।