ਗਰਮੀਆਂ ਦੇ ਮੌਸਮ ਵਿਚ ਬਣਾ ਕੇ ਖਾਉ ਖੋਇਆ ਕੁਲਫ਼ੀ

khoya ice cream

ਗਰਮੀ ਦੇ ਮੌਸਮ ਵਿਚ ਠੰਢਕ ਲੈਣ ਲਈ ਲੋਕ ਆਈਸ ਕਰੀਮ ਖਾਣਾ ਪਸੰਦ ਕਰਦੇ ਹਨ। ਬੱਚੇ ਤਾਂ ਕੁਲਫ਼ੀ ਦੇ ਬਹੁਤ ਦੀਵਾਨੇ ਹੁੰਦੇ ਹਨ ਪਰ ਬਾਜ਼ਾਰ ਦੀਆਂ ਮਿਲਾਵਟੀ ਚੀਜ਼ਾਂ ਖਾਣ ਨਾਲ ਉਨ੍ਹਾਂ ਦੀ ਸਿਹਤ ਖ਼ਰਾਬ ਹੋ ਸਕਦੀ ਹੈ। ਤੁਸੀਂ ਬੱਚਿਆਂ ਲਈ ਘਰ ਵਿਚ ਹੀ ਬਹੁਤ ਆਸਾਨੀ ਨਾਲ ਕੁਲਫ਼ੀ ਬਣਾ ਸਕਦੇ ਹੋ। 

ਬਣਾਉਣ ਲਈ ਸਮੱਗਰੀ: ਦੁੱਧ- 1 ਲੀਟਰ, ਖੋਇਆ- 100 ਗ੍ਰਾਮ, ਮੱਕੀ ਦਾ ਆਟਾ- 2 ਚਮਚੇ, ਚੀਨੀ- 4 ਚਮਚੇ, ਬਦਾਮ ਕੱਟੇ ਹੋਏ- 1 ਚਮਚਾ, ਇਲਾਇਚੀ ਦਾ ਪਾਊਡਰ- 1 ਚਮਚਾ, ਵੇਨੀਲਾ ਐਸੈਂਸ- 1 ਚਮਚਾ, ਪਿਸਤਾ-1 ਚਮਚਾ (ਕਟਿਆ ਹੋਇਆ)

ਬਣਾਉਣ ਦੀ ਵਿਧੀ: ਸੱਭ ਤੋਂ ਪਹਿਲਾਂ ਇਕ ਭਾਂਡੇ ਵਿਚ ਦੁੱਧ ਪਾ ਕੇ ਉਬਾਲ ਲਉ। ਇਸ ਨੂੰ ਉਦੋਂ ਤਕ ਉਬਾਲੋ ਜਦੋਂ ਤਕ ਇਹ ਅੱਧਾ ਨਾ ਹੋ ਜਾਵੇ। ਹੁਣ ਦੁੱਧ ਵਿਚ ਮੱਕੀ ਦਾ ਆਟਾ ਪਾ ਕੇ ਇਸ ਨੂੰ ਚੰਗੀ ਤਰ੍ਹਾਂ ਮਿਕਸ ਕਰ ਕੇ ਰੱਖ ਦਿਉ। ਧਿਆਨ ਰੱਖੋ ਕਿ ਇਸ ਵਿਚ ਗੰਢ ਨਾ ਪਵੇ ਅਤੇ ਇਸ ਨੂੰ ਸਾਈਡ ’ਤੇ ਰੱਖ ਦਿਉ। ਨਾਲ-ਨਾਲ ਗੈਸ ’ਤੇ ਰੱਖੇ ਦੁੱਧ ਨੂੰ ਵੀ ਹਿਲਾਉਂਦੇ ਰਹੋ। ਇਸ ਤੋਂ ਬਾਅਦ ਚੀਨੀ ਮਿਲਾ ਕੇ ਹਿਲਾਉ।

ਜਦੋਂ ਚੀਨੀ ਦੁੱਧ ਵਿਚ ਘੁੱਲ ਜਾਵੇ ਤਾਂ ਇਸ ਵਿਚ ਪਹਿਲਾਂ ਤੋਂ ਰੱਖੇ ਦੁੱਧ ਅਤੇ ਮੱਕੀ ਦੇ ਆਟੇ ਦਾ ਮਿਸ਼ਰਣ ਮਿਲਾ ਦਿਉ। ਇਸ ਤੋਂ ਬਾਅਦ ਜਦੋਂ ਦੁੱਧ ਸੰਘਣਾ ਹੋ ਜਾਵੇ ਤਾਂ ਇਸ ਵਿਚ ਖੋਇਆ ਪਾ ਦਿਉ ਅਤੇ ਚੰਗੀ ਤਰ੍ਹਾਂ ਮਿਕਸ ਕਰੋ। ਇਸ ਨਾਲ ਹੀ ਬਦਾਮ, ਪਿਸਤਾ ਅਤੇ ਇਲਾਇਚੀ ਵੀ ਪਾ ਕੇ ਮਿਕਸ ਕਰ ਲਉ ਅਤੇ ਗੈਸ ਬੰਦ ਕਰ ਦਿਉ।

ਹੁਣ ਇਸ ਵਿਚ ਵਨੀਲਾ ਐਸੇਂਸ ਪਾ ਕੇ ਮਿਕਸ ਕਰ ਲਉ। ਜਦੋਂ ਇਹ ਮਿਸ਼ਰਣ ਠੰਢਾ ਹੋ ਜਾਵੇ ਤਾਂ ਇਸ ਨੂੰ ਇਕ ਭਾਂਡੇ ਵਿਚ ਪਾ ਕੇ ਫ਼ਰਿਜ ਵਿਚ ਰੱਖ ਦਿਉ। 5-6 ਘੰਟਿਆਂ ਵਿਚ ਕੁਲਫ਼ੀ ਜਮ ਜਾਵੇਗੀ। ਤੁਹਾਡੇ ਖਾਣ ਲਈ ਖੋਇਆ ਕੁਲਫ਼ੀ ਬਣ ਕੇ ਤਿਆਰ ਹੈ। ਹੁਣ ਇਸ ਨੂੰ ਅਪਣੇ ਬੱਚਿਆਂ ਨੂੰ ਖਵਾਉ।