ਅੰਗੀਠੀ ਸਾਹਮਣੇ ਬੈਠੇ ਰਹਿਣ ਨਾਲ ਚਮੜੀ ਨੂੰ ਹੁੰਦੇ ਹਨ ਕਈ ਨੁਕਸਾਨ

Skin

 ਮੁਹਾਲੀ: ਲੋਕ ਠੰਢ ਤੋਂ ਬਚਣ ਲਈ ਕੋਲੇ ਜਾਂ ਲੱਕੜ ਦੀ ਅੰਗੀਠੀ ਬਾਲਣਾ ਪਸੰਦ ਕਰਦੇ ਹਨ। ਇਸ ਨਾਲ ਹੱਡ ਸੇਕਣ ਨਾਲ ਬਹੁਤ ਸਾਰੇ ਲੋਕ ਕਮਰੇ ਨੂੰ ਵੀ ਗਰਮ ਕਰਦੇ ਹਨ ਤਾਕਿ ਠੰਢ ਦਾ ਅਹਿਸਾਸ ਘੱਟ ਹੋਵੇ। ਭਲੇ ਹੀ ਇਸ ਨਾਲ ਗਰਮਾਹਟ ਦਾ ਅਹਿਸਾਸ ਤਾਂ ਹੁੰਦਾ ਹੈ ਪਰ ਲਗਾਤਾਰ ਇਸ ਦੇ ਸਾਹਮਣੇ ਬੈਠੇ ਰਹਿਣ ਨਾਲ ਸਿਹਤ ਅਤੇ ਚਮੜੀ ਨੂੰ ਕਈ ਨੁਕਸਾਨ ਵੀ ਝੇਲਣੇ ਪੈਂਦੇ ਹਨ। ਇਸ ਲਈ ਮਾਹਰਾਂ ਦੁਆਰਾ ਇਸ ਦੀ ਵਰਤੋਂ ਨੂੰ ਖ਼ਤਰਨਾਕ ਵੀ ਕਿਹਾ ਜਾਂਦਾ ਹੈ। ਆਉ ਜਾਣਦੇ ਹਾਂ ਨੁਕਸਾਨ ਤੋਂ ਬਚਣ ਦੇ ਨੁਸਖ਼ੇ:

 ਕਈ ਘੰਟੇ ਬੰਦ ਕਮਰੇ ਵਿਚ ਅੰਗੀਠੀ ਦੇ ਸਾਹਮਣੇ ਬੈਠਣ ਨਾਲ ਚਮੜੀ ’ਤੇ ਗਹਿਰਾ ਅਸਰ ਹੁੰਦਾ ਹੈ। ਦਰਅਸਲ ਇਸ ਤਰੀਕੇ ਨਾਲ ਅੰਗੀਠੀ ਦੇ ਸਾਹਮਣੇ ਬੈਠਣ ਨਾਲ ਚਮੜੀ ਵਿਚ ਮੌਜੂਦ ਨਮੀ ਸੁਕਣੀ ਸ਼ੁਰੂ ਹੋ ਜਾਂਦੀ ਹੈ। ਅਜਿਹੇ ਵਿਚ ਰੁੱਖ਼ਾਪਨ ਵਧਣ ਨਾਲ ਚਮੜੀ ਫਟਣ ਦਾ ਵੀ ਸਾਹਮਣਾ ਕਰਨਾ ਪੈ ਸਕਦਾ ਹੈ।  ਅੰਗੀਠੀ ਵਿਚੋਂ ਨਿਕਲਣ ਵਾਲਾ ਧੂੰਆਂ ਅੱਖਾਂ ਵਿਚ ਪੈਣ ਨਾਲ ਇਨ੍ਹਾਂ ਨੂੰ ਨੁਕਸਾਨ ਪਹੁੰਚਣ ਦਾ ਕੰਮ ਕਰਦਾ ਹੈ। ਇਸ ਨਾਲ ਅੱਖਾਂ ਵਿਚ ਜਲਣ, ਖੁਜਲੀ ਅਤੇ ਖ਼ੁਸ਼ਕੀ ਵਧਣ ਲਗਦੀ ਹੈ। ਅਜਿਹੇ ਵਿਚ ਅੱਖਾਂ ਨੂੰ ਸੁਰੱਖਿਅਤ ਰੱਖਣ ਲਈ ਅੰਗੀਠੀ ਤੋਂ ਦੂਰੀ ਬਣਾ ਕੇ ਬੈਠੋ।

ਅਕਸਰ ਲੋਕ ਲੱਕੜ ਜਾਂ ਕੋਲੇ ਨਾਲ ਅੰਗੀਠੀ ਬਾਲ ਕੇ ਕਮਰਾ ਬੰਦ ਕਰ ਦਿੰਦੇ ਹਨ ਪਰ ਇਸ ਨਾਲ ਕਮਰੇ ਵਿਚ ਆਕਸੀਜਨ ਲੈਵਲ ਘੱਟ ਜਾਂਦਾ ਹੈ। ਅਜਿਹੇ ਵਿਚ ਸਾਹ ਦੀਆਂ ਸਮੱਸਿਆਵਾਂ ਆਉਣੀਆਂ ਸ਼ੁਰੂ ਹੋ ਜਾਂਦੀਆਂ ਹਨ। ਇਸ ਤੋਂ ਇਲਾਵਾ ਕਮਰੇ ਵਿਚ ਕਾਰਬਨ ਮੋਨੋਆਕਸਾਈਡ ਲੈਵਲ ਵਧਣ ਲਗਦਾ ਹੈ।

ਇਸ ਦਾ ਸਿੱਧਾ ਅਸਰ ਮਨੁੱਖ ਦੇ ਦਿਮਾਗ਼ ’ਤੇ ਪੈਂਦਾ ਹੈ। ਇਹ ਵਿਅਕਤੀ ਦੇ ਬੇਹੋਸ਼ ਹੋਣ ਦਾ ਕਾਰਨ ਵੀ ਬਣਦਾ ਹੈ। ਅੰਗੀਠੀ ਬਾਲ ਕੇ ਕਮਰੇ ਨੂੰ ਬੰਦ ਕਰਨ ਨਾਲ ਕਾਰਬਨ ਮੋਨੋਆਕਸਾਈਡ ਇਸ ਵਿਚੋਂ ਬਾਹਰ ਨਿਕਲਦੀ ਹੈ। ਇਹ ਗੈਸ ਸਾਹ ਰਾਹੀਂ ਫੇਫੜਿਆਂ ਵਿਚ ਪਹੁੰਚਣ ਤੋਂ ਬਾਅਦ ਖ਼ੂਨ ਵਿਚ ਚਲੀ ਜਾਂਦੀ ਹੈ। ਇਸ ਕਾਰਨ ਸਰੀਰ ਵਿਚ ਹੀਮੋਗਲੋਬਿਨ ਦਾ ਲੈਵਲ ਘਟਣਾ ਸ਼ੁਰੂ ਹੋ ਜਾਂਦਾ ਹੈ। ਅਜਿਹੇ ਵਿਚ ਤੁਹਾਨੂੰ ਖ਼ੂਨ ਦੀ ਕਮੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।