ਫ਼ੋਨਾਂ 'ਚ ਗੁੰਮ ਹੋ ਗਏ ਨਿੱਘੇ ਰਿਸ਼ਤੇ

mobile phone

ਜੇਕਰ ਤੁਸੀਂ ਕਿਸੇ ਨਾਲ ਹੁੰਦੇ ਹੋਏ ਵੀ ਦੂਜੇ ਨੂੰ ਅਪਣੀ ਹਾਜ਼ਰੀ ਦਾ ਅਹਿਸਾਸ ਨਹੀਂ ਕਰਵਾ ਸਕਦੇ ਤਾਂ ਸਮਝ ਲਵੋ ਕਿ ਕਿਤੇ ਨਾ ਕਿਤੇ ਤੁਹਾਡੇ ਵਤੀਰੇ ਦੀ ਘਾਟ ਹੈ। ਜੇਕਰ ਤੁਸੀਂ ਕਿਸੇ ਵਿਅਕਤੀ ਨਾਲ ਤੁਰਦੇ ਹੋਏ ਉਸ ਨਾਲ ਗੱਲ ਕਰਨ ਦੀ ਬਜਾਏ ਅਪਣਾ ਮੋਬਾਈਲ ਚਲਾਉਣ ਵਿਚ ਮਸ਼ਰੂਫ਼ ਰਹਿੰਦੇ ਹੋ ਤਾਂ ਹੁਣ ਚੌਕਸ ਹੋ ਜਾਉ।

ਇਕ ਰਿਪੋਰਟ ਵਿਚ ਪਤਾ ਲਗਿਆ ਹੈ ਕਿ ਦੂਜਿਆਂ ਨੂੰ ਨਜ਼ਰਅੰਦਾਜ਼ ਕਰ ਕੇ ਅਪਣੇ ਸੈੱਲ ਫ਼ੋਨ ਵਿਚ ਮਗਨ ਰਹਿਣ ਨਾਲ ਰਿਸ਼ਤਿਆਂ 'ਤੇ ਨਕਾਰਾਤਮਕ ਅਸਰ ਪੈ ਸਕਦਾ ਹੈ।

ਬਰਤਾਨੀਆ ਦੀ ਯੂਨੀਵਰਸਿਟੀ ਆਫ਼ ਕੇਂਟ ਦੇ ਮਨੋਵਿਗਿਆਨੀਆਂ ਨੇ ਕਿਸੇ ਨੂੰ ਨਜ਼ਰਅੰਦਾਜ਼ ਕਰਦਿਆਂ ਅਪਣੇ ਫ਼ੋਨ ਵਿਚ ਲੱਗੇ ਰਹਿਣ ਵਾਲੇ ਲੋਕਾਂ 'ਤੇ ਇਸ ਦੇ ਪ੍ਰਭਾਵ ਦੀ ਰਿਪੋਰਟ ਤਿਆਰ ਕੀਤੀ ਗਈ ਹੈ। ਉਨ੍ਹਾਂ ਇਸ ਨੂੰ ਫਬਿੰਗ ਦਾ ਨਾਂ ਦਿਤਾ ਹੈ। ਉਨ੍ਹਾਂ ਪਾਇਆ ਕਿ ਫਬਿੰਗ ਵਧਣ 'ਤੇ ਆਪਸੀ ਸਬੰਧਾਂ 'ਤੇ ਨਕਾਰਾਤਮਕ ਅਸਰ ਪੈਂਦਾ ਹੈ।

ਇਸ ਲਈ ਉਨ੍ਹਾਂ ਨੇ 153 ਲੋਕਾਂ 'ਤੇ ਅਧਿਐਨ ਕੀਤਾ, ਜਿਨ੍ਹਾਂ ਦੋ ਲੋਕਾਂ ਦੀ ਗੱਲਬਾਤ ਦੇ ਐਨੀਮੇਸ਼ਨ ਨੂੰ ਦੇਖਣ ਲਈ ਕਿਹਾ ਗਿਆ ਤੇ ਨਾਲ ਹੀ ਇਹ ਮੰਨ ਲਿਆ ਗਿਆ ਕਿ ਉਹ ਇਸ ਦੇ ਜ਼ਿੰਮੇਵਾਰ ਖ਼ੁਦ ਹਨ। ਹਰੇਕ ਭਾਗੀਦਾਰ ਨੂੰ ਤਿੰਨ ਵੱਖ-ਵੱਖ ਤਰ੍ਹਾਂ ਦੀ ਸਥਿਤੀ ਦਿਤੀ ਗਈ। ਪਹਿਲਾ ਕਿ ਤੁਸੀਂ ਬਿਲਕੁਲ ਵੀ ਸੈੱਲ ਫ਼ੋਨ 'ਤੇ ਗੱਲ ਨਾ ਕਰੋ, ਦੂਜਾ ਤੁਸੀਂ ਮੋਬਾਈਲ ਫ਼ੋਨ ਵਿਚ ਮਗਨ ਰਹੋ।

ਇਸ ਤੋਂ ਬਾਅਦ ਨਤੀਜਿਆਂ ਵਿਚ ਪਾਇਆ ਗਿਆ ਕਿ ਜਿਵੇਂ ਹੀ ਫਬਿੰਗ ਦਾ ਪੱਧਰ ਵਧਿਆ ਤਾਂ ਲੋਕਾਂ ਦੀਆਂ ਮੂਲ ਜ਼ਰੂਰਤਾਂ ਲਈ ਖ਼ਤਰਾ ਪੈਦਾ ਹੋ ਗਿਆ। ਉਨ੍ਹਾਂ ਦੀ ਗੱਲਬਾਤ ਦੀ ਗੁਣਵੱਤਾ ਖ਼ਰਾਬ ਰਹੀ ਤੇ ਉਨ੍ਹਾਂ ਦੇ ਰਿਸ਼ਤੇ ਸੰਤੋਸ਼ਜਨਕ ਨਹੀਂ ਰਹੇ।