Jalandhar NIT ਦੇ ਵਿਦਿਆਰਥੀ ਨੂੰ ਹਾਂਗਕਾਂਗ ’ਚ ਮਿਲਿਆ 1.16 ਕਰੋੜ ਰੁਪਏ ਦਾ ਪੈਕੇਜ
ਗਾਜ਼ੀਆਬਾਦ (ਉਤਰ ਪ੍ਰਦੇਸ਼) ਦਾ ਰਹਿਣ ਵਾਲਾ ਹੈ ਏਕਮਜੋਤ
ਜਲੰਧਰ : ਪੰਜਾਬ ਦੇ ਜਲੰਧਰ ਵਿੱਚ ਨੈਸ਼ਨਲ ਇੰਸਟੀਚਿਊਟ ਆਫ਼ ਟੈਕਨਾਲੋਜੀ (ਐਨਆਈਟੀ) ਦੇ ਵਿਦਿਆਰਥੀ ਏਕਮਜੋਤ ਨੂੰ ਹਾਂਗ ਕਾਂਗ ਦੀ ਇੱਕ ਕੰਪਨੀ ਵਿੱਚ ਸਾਫਟਵੇਅਰ ਡਿਵੈਲਪਰ ਵਜੋਂ ਨੌਕਰੀ ਮਿਲੀ ਹੈ ਜਿਸਦੀ ਤਨਖਾਹ 1.16 ਕਰੋੜ ਸਾਲਾਨਾ ਹੈ। ਏਕਮਜੋਤ ਜੋ ਕਿ ਗਾਜ਼ੀਆਬਾਦ (ਉੱਤਰ ਪ੍ਰਦੇਸ਼) ਦਾ ਰਹਿਣ ਵਾਲਾ ਹੈ, ਜਿਸ ਨੂੰ ਇਸ ਅਹੁਦੇ ਲਈ ਚੁਣਿਆ ਗਿਆ ਹੈ।
ਖਾਸ ਗੱਲ ਇਹ ਹੈ ਕਿ ਏਕਮਜੋਤ ਕੈਮੀਕਲ ਇੰਜੀਨੀਅਰਿੰਗ ਦੀ ਪੜ੍ਹਾਈ ਕਰ ਰਿਹਾ ਹੈ, ਪਰ ਉਸ ਨੂੰ ਇਹ ਨੌਕਰੀ ਉਸ ਦੇ ਕੰਪਿਊਟਰ ਸਾਇੰਸ ਹੁਨਰ ਕਾਰਨ ਮਿਲੀ। ਏਕਮਜੋਤ ਦਾ ਕਹਿਣਾ ਹੈ ਕਿ ਉਹ ਸ਼ੁਰੂ ਤੋਂ ਹੀ ਕੰਪਿਊਟਰ ਸਾਇੰਸ ਦੀ ਪੜ੍ਹਾਈ ਕਰਨਾ ਚਾਹੁੰਦਾ ਸੀ, ਪਰ ਜੇਈਈ ਵਿੱਚ ਘੱਟ ਪ੍ਰਤੀਸ਼ਤਤਾ ਕਾਰਨ ਉਸ ਨੂੰ ਇਸ ਵਿੱਚ ਦਾਖਲਾ ਨਹੀਂ ਮਿਲਿਆ।
ਹਾਲਾਂਕਿ ਐਨਆਈਟੀ ਜਲੰਧਰ ਨੇ ਉਸਨੂੰ 100% ਸਕਾਲਰਸ਼ਿਪ ’ਤੇ ਕੈਮੀਕਲ ਇੰਜੀਨੀਅਰਿੰਗ ਵਿੱਚ ਦਾਖਲਾ ਦਿੱਤਾ। ਫਿਰ ਏਕਮਜੋਤ ਨੇ ਕੰਪਿਊਟਰ ਸਾਇੰਸ ਵਿੱਚ ਆਪਣੀ ਪੜ੍ਹਾਈ ਜਾਰੀ ਰੱਖੀ ਅਤੇ ਡਿਗਰੀ ਹਾਸਲ ਕੀਤੀ। ਇਸ ਤੋਂ ਪਹਿਲਾਂ ਉਸਨੇ ਗੁਰੂਗ੍ਰਾਮ ਅਤੇ ਨੋਇਡਾ ਦੀਆਂ ਕੰਪਨੀਆਂ ਵਿੱਚ ਕੰਪਿਊਟਰ ਸਾਇੰਸ ਨਾਲ ਸਬੰਧਤ ਇੰਟਰਨਸ਼ਿਪ ਵੀ ਕੀਤੀ, ਜਿਸ ਨਾਲ ਉਸ ਨੂੰ ਨੌਕਰੀ ਪ੍ਰਾਪਤ ਕਰਨ ਵਿੱਚ ਬਹੁਤ ਮਦਦ ਮਿਲੀ। ਏਕਮਜੋਤ ਐਨਆਈਟੀ ਜਲੰਧਰ ਦਾ ਪਹਿਲਾ ਵਿਦਿਆਰਥੀ ਹੈ ਜਿਸ ਨੂੰ ਇੰਨੀ ਉੱਚ ਤਨਖਾਹ ਵਾਲੀ ਨੌਕਰੀ ਮਿਲੀ ਹੈ।
ਏਕਮਜੋਤ ਨੇ ਦੱਸਿਆ ਕਿ ਮੇਰਾ ਜਨਮ ਮੋਦੀ ਨਗਰ, ਗਾਜ਼ੀਆਬਾਦ ਵਿੱਚ ਹੋਇਆ ਸੀ। ਮੇਰੇ ਮਾਤਾ-ਪਿਤਾ ਇੱਕ ਸੰਸਥਾ ਦੇ ਮਾਲਕ ਹਨ। ਦੋਵੇਂ ਕੰਪਿਊਟਰ ਪੜ੍ਹਾਉਂਦੇ ਹਨ। ਮੈਂ ਆਪਣੀ ਮੁੱਢਲੀ ਸਿੱਖਿਆ ਮੋਦੀਨਗਰ, ਗਾਜ਼ੀਆਬਾਦ ਵਿੱਚ ਪ੍ਰਾਪਤ ਕੀਤੀ। ਮੈਂ ਆਪਣੀ 12ਵੀਂ ਜਮਾਤ ਛਾਇਆ ਪਬਲਿਕ ਸਕੂਲ ਤੋਂ ਪੂਰੀ ਕੀਤੀ, ਜੋ ਕਿ ਇੱਕ ਨਾਨ-ਮੈਡੀਕਲ ਪ੍ਰੋਗਰਾਮ ਸੀ। ਇਸ ਤੋਂ ਬਾਅਦ, ਮੈਨੂੰ ਸਾਫਟਵੇਅਰ ਇੰਜੀਨੀਅਰਿੰਗ ਕਰਨ ਵਿੱਚ ਦਿਲਚਸਪੀ ਹੋ ਗਈ, ਇਸ ਲਈ ਮੈਂ ਇਸਦੀ ਤਿਆਰੀ ਸ਼ੁਰੂ ਕਰ ਦਿੱਤੀ।
ਏਕਮਜੋਤ ਨੇ ਕਿਹਾ ਕਿ12ਵੀਂ ਪਾਸ ਕਰਨ ਤੋਂ ਬਾਅਦ, ਮੈਂ ਘਰ ਤੋਂ ਹੀ ਜੇਈਈ ਦੀ ਤਿਆਰੀ ਸ਼ੁਰੂ ਕਰ ਦਿੱਤੀ। ਇਸ ਲਈ ਮੈਂ ਨਾ ਤਾਂ ਕਿਸੇ ਮਹਿੰਗੇ ਕੋਚਿੰਗ ਸੈਂਟਰ ਗਿਆ ਅਤੇ ਨਾ ਹੀ ਕਿਸੇ ਵੱਡੇ ਟਿਊਟਰ ਕੋਲ। ਮੈਂ ਘਰ ਤੋਂ ਤਿਆਰੀ ਕਰਨੀ ਸ਼ੁਰੂ ਕਰ ਦਿੱਤੀ, ਯੂਟਿਊਬ ’ਤੇ ਦਿਨ ਵਿੱਚ ਛੇ ਘੰਟੇ ਬਿਤਾਉਂਦਾ ਸੀ।