Linkedin ਨੇ 716 ਕਰਮਚਾਰੀਆਂ ਨੂੰ ਕੱਢਿਆ, ਛਾਂਟੀ ਨੂੰ ਦਸਿਆ ਮਜਬੂਰੀ 

Linkedin lays off 716 employees

ਨਵੀਂ ਦਿੱਲੀ - ਦੁਨੀਆ ਭਰ ਦੀਆਂ ਤਕਨੀਕੀ ਕੰਪਨੀਆਂ ਵਿਚ ਛਾਂਟੀ ਦਾ ਪੜਾਅ ਅਜੇ ਖ਼ਤਮ ਨਹੀਂ ਹੋਇਆ ਹੈ। ਪਿਛਲੇ ਕੁਝ ਮਹੀਨਿਆਂ 'ਚ ਗੂਗਲ ਅਤੇ ਟਵਿਟਰ ਸਮੇਤ ਕਈ ਕੰਪਨੀਆਂ ਨੇ ਹਜ਼ਾਰਾਂ ਲੋਕਾਂ ਨੂੰ ਨੌਕਰੀ ਤੋਂ ਕੱਢ ਦਿਤਾ ਹੈ। ਹੁਣ ਮਾਈਕ੍ਰੋਸਾਫਟ ਕਾਰਪੋਰੇਸ਼ਨ ਦੀ ਮਲਕੀਅਤ ਵਾਲੀ ਕੰਪਨੀ ਲਿੰਕਡਇਨ ਵੀ ਇਸ ਸੂਚੀ ਵਿਚ ਸ਼ਾਮਲ ਹੋ ਗਈ ਹੈ। ਕਾਰੋਬਾਰੀ ਪੇਸ਼ੇਵਰ ਨੈੱਟਵਰਕਿੰਗ ਸਾਈਟ ਲਿੰਕਡਇਨ ਨੇ 716 ਕਰਮਚਾਰੀਆਂ ਦੀ ਛਾਂਟੀ ਦਾ ਐਲਾਨ ਕੀਤਾ ਹੈ। ਕੰਪਨੀ ਨੇ ਇਹ ਵੀ ਦਸਿਆ ਹੈ ਕਿ ਉਹ ਆਪਣੀ ਚੀਨੀ ਜੌਬ ਐਪਲੀਕੇਸ਼ਨ ਐਪ ਨੂੰ ਵੀ ਬੰਦ ਕਰਨ ਜਾ ਰਹੀ ਹੈ।  

ਇਕ ਰਿਪੋਰਟ ਅਨੁਸਾਰ, ਕੰਪਨੀ ਨੇ ਕਮਜ਼ੋਰ ਗਲੋਬਲ ਆਰਥਿਕ ਸਥਿਤੀਆਂ ਅਤੇ ਮੰਗ ਵਿਚ ਗਿਰਾਵਟ ਦੇ ਵਿਚਕਾਰ ਛਾਂਟੀ ਨਾਲ ਸਬੰਧਤ ਇਹ ਕਦਮ ਚੁਕਿਆ ਹੈ। ਹਾਲਾਂਕਿ ਕੰਪਨੀ ਦੀ ਆਮਦਨ ਪਿਛਲੇ ਸਾਲ ਦੀ ਹਰ ਤਿਮਾਹੀ ਦੌਰਾਨ ਵਧੀ ਹੈ। ਲਿੰਕਡਇਨ ਦੁਨੀਆ ਭਰ ਵਿਚ ਲਗਭਗ 20,000 ਕਰਮਚਾਰੀਆਂ ਨੂੰ ਰੁਜ਼ਗਾਰ ਦਿੰਦਾ ਹੈ। ਮੌਜੂਦਾ ਸਮੇਂ ਵਿਚ, ਕੰਪਨੀ ਛਾਂਟੀ ਦੇ ਜ਼ਰੀਏ 3.5  ਪ੍ਰਤੀਸ਼ਤ ਨੌਕਰੀਆਂ ਵਿਚ ਕਟੌਤੀ ਕਰ ਰਹੀ ਹੈ। 

ਲਿੰਕਡਇਨ ਦੇ ਸੀਈਓ ਰਿਆਨ ਰੋਸਲਾਂਸਕੀ ਨੇ ਇੱਕ ਈਮੇਲ ਵਿਚ ਕਰਮਚਾਰੀਆਂ ਨੂੰ ਛਾਂਟੀ ਬਾਰੇ ਜਾਣਕਾਰੀ  ਦਿਤੀ। ਇਸ ਵਿਚ ਉਨ੍ਹਾਂ ਕਿਹਾ ਕਿ ਬਦਲਦੇ ਮਾਹੌਲ ਵਿਚ ਕੰਪਨੀ ਨੇ ਆਪਣੇ ਗਲੋਬਲ ਵਪਾਰਕ ਸੰਗਠਨ ਵਿਚ ਵੱਡੇ ਬਦਲਾਅ ਕੀਤੇ ਹਨ ਅਤੇ ਚੀਨੀ ਨੌਕਰੀ ਦੀ ਅਰਜ਼ੀ ਨੂੰ ਬੰਦ ਕਰਨ ਦਾ ਫ਼ੈਸਲਾ ਕੀਤਾ ਹੈ। ਇਸ ਕਾਰਨ ਕੰਪਨੀ ਦੇ 716 ਲੋਕਾਂ ਦੀ ਨੌਕਰੀ ਚਲੀ ਜਾਵੇਗੀ। ਇਸ ਵਿਚ ਸੇਲਜ਼, ਆਪਰੇਸ਼ਨ ਅਤੇ ਸਪੋਰਟ ਟੀਮ ਦੇ ਕਰਮਚਾਰੀ ਪ੍ਰਭਾਵਿਤ ਹੋਣਗੇ। 

ਲਿੰਕਡਇਨ ਦੀ ਚੀਨ-ਅਧਾਰਤ ਐਪ ਨੂੰ ਬੰਦ ਕਰ ਦਿੱਤਾ ਜਾਵੇਗਾ, ਪਰ ਕੰਪਨੀ ਦੇਸ਼ ਤੋਂ ਬਾਹਰ ਕਰਮਚਾਰੀਆਂ ਨੂੰ ਨਿਯੁਕਤ ਕਰਨ ਅਤੇ ਸਿਖਲਾਈ ਦੇਣ ਵਿਚ ਕੰਮ ਕਰਨ ਵਾਲੀਆਂ ਕੰਪਨੀਆਂ ਦੀ ਮਦਦ ਲਈ ਚੀਨ ਵਿਚ ਮੌਜੂਦਗੀ ਬਣਾਈ ਰੱਖੇਗੀ। ਪਿਛਲੇ 6 ਮਹੀਨਿਆਂ ਵਿਚ, ਦੁਨੀਆ ਭਰ ਵਿਚ ਤਕਨੀਕੀ ਖੇਤਰ ਵਿਚ ਕੰਮ ਕਰ ਰਹੇ 2,70,000 ਤੋਂ ਵੱਧ ਲੋਕਾਂ ਨੂੰ ਛਾਂਟੀ ਵਿਚ ਆਪਣੀ ਨੌਕਰੀ ਗੁਆਉਣੀ ਪਈ। 

ਜਿਸ ਵਿਚ ਐਮਾਜ਼ਾਨ, ਫੇਸਬੁੱਕ ਅਤੇ ਗੂਗਲ ਦੀ ਮੂਲ ਕੰਪਨੀ ਅਲਫਾਬੇਟ ਵਰਗੀਆਂ ਵੱਡੀਆਂ ਕੰਪਨੀਆਂ ਸ਼ਾਮਲ ਹਨ। ਮਾਈਕ੍ਰੋਸਾਫਟ ਨੇ 2016 ਵਿਚ ਲਿੰਕਡਇਨ ਨੂੰ 26 ਬਿਲੀਅਨ ਡਾਲਰ ਵਿਚ ਖਰੀਦਿਆ ਸੀ। ਮਾਈਕਰੋਸਾਫਟ ਨੇ ਇਸ ਸਾਲ ਦੇ ਸ਼ੁਰੂ ਵਿਚ ਲਗਭਗ 10,000 ਕਰਮਚਾਰੀਆਂ ਨੂੰ ਕੱਢ ਦਿੱਤਾ ਸੀ।
 ਦੱਸ ਦਈਏ ਕਿ ਪਿਛਲੇ ਸਾਲ ਅਕਤੂਬਰ-ਨਵੰਬਰ ਵਿੱਚ ਟਵਿੱਟਰ ਵਿਚ ਛਾਂਟੀ ਤੋਂ ਬਾਅਦ ਸਾਰੀਆਂ ਤਕਨੀਕੀ ਕੰਪਨੀਆਂ ਨੇ ਬਦਲੇ ਵਿਚ ਕਰਮਚਾਰੀਆਂ ਨੂੰ ਨੌਕਰੀ ਤੋਂ ਕੱਢ ਦਿੱਤਾ ਸੀ। ਇਨ੍ਹਾਂ ਸਾਰੀਆਂ ਕੰਪਨੀਆਂ ਨੇ ਛਾਂਟੀ ਲਈ ਕਮਜ਼ੋਰ ਆਰਥਿਕ ਸਥਿਤੀਆਂ ਅਤੇ ਹੌਲੀ ਕਾਰੋਬਾਰੀ ਵਿਕਾਸ ਦਾ ਹਵਾਲਾ ਦਿੱਤਾ।