TCS has more female employees than any company in India

 

_{TCS  ਦੇ ਕੁੱਲ ਕਰਮਚਾਰੀਆਂ ’ਚੋਂ ਮਹਿਲਾ ਕਰਮਚਾਰੀ  ਦੀ ਗਿਣਤੀ 2.1 ਲੱਖ (35%)}

 

ਨਵੀਂ ਦਿੱਲੀ: ਦੇਸ਼ ਦੀ ਸਭ ਤੋਂ ਵੱਡੀ ਸਾਫਟਵੇਅਰ ਕੰਪਨੀ ਟਾਟਾ ਕੰਸਲਟੈਂਸੀ ਸਰਵਿਸਿਜ਼ ਨੇ ਔਰਤਾਂ ਦੇ ਰੁਜ਼ਗਾਰ ਦੇ ਮਾਮਲੇ 'ਚ ਵੱਡੀ ਉਪਲੱਬਧੀ ਹਾਸਲ ਕੀਤੀ ਹੈ। ਇਹ ਦੇਸ਼ ਵਿਚ ਸਭ ਤੋਂ ਵੱਧ ਮਹਿਲਾ ਕਰਮਚਾਰੀਆਂ ਵਾਲੀ ਕੰਪਨੀ ਬਣ ਗਈ ਹੈ। ਟੀਸੀਐਸ ਦੇ ਕੁੱਲ ਕਰਮਚਾਰੀਆਂ ਵਿਚ ਲਗਭਗ 2.1 ਲੱਖ ਜਾਂ ਲਗਭਗ 35 ਪ੍ਰਤੀਸ਼ਤ ਮਹਿਲਾ ਕਰਮਚਾਰੀ ਹਨ।

ਬਰਗੰਡੀ ਪ੍ਰਾਈਵੇਟ ਅਤੇ ਹੁਰੁਨ ਨੇ ਇਸ ਸਾਲ ਦੇਸ਼ ਦੇ ਚੋਟੀ ਦੀਆਂ 10 ਮਹਿਲਾ ਰੁਜ਼ਗਾਰਦਾਤਾਵਾਂ ਦੀ ਸੂਚੀ ਜਾਰੀ ਕੀਤੀ ਹੈ। ਇਸ ਵਿਚ ਟੀਸੀਐਸ ਦਾ ਪਹਿਲਾ ਸਥਾਨ ਹੈ। ਇਸ ਤੋਂ ਬਾਅਦ ਇਨਫੋਸਿਸ, ਵਿਪਰੋ, ਐਚਸੀਐਲ ਟੈਕਨਾਲੋਜੀਜ਼ ਅਤੇ ਰਿਲਾਇੰਸ ਇੰਡਸਟਰੀਜ਼ ਦਾ ਨੰਬਰ ਆਉਂਦਾ ਹੈ। ਇਸ ਸੂਚੀ ਵਿਚ ਟੈਕ ਮਹਿੰਦਰਾ ਅਤੇ ਐਚਡੀਐਫਸੀ ਬੈਂਕ ਵੀ ਸ਼ਾਮਲ ਹਨ। ਹਾਲਾਂਕਿ ਕੁੱਲ ਕਰਮਚਾਰੀਆਂ ਵਿਚ ਔਰਤਾਂ ਦੀ ਪ੍ਰਤੀਸ਼ਤਤਾ ਦੇ ਮਾਮਲੇ ਵਿਚ ਕੁਝ ਹੋਰ ਕੰਪਨੀਆਂ TCS ਤੋਂ ਅੱਗੇ ਹਨ।

ਇਕ ਹੋਰ ਵੱਡੀ ਸਾਫਟਵੇਅਰ ਕੰਪਨੀ ਇਨਫੋਸਿਸ 'ਚ ਮਹਿਲਾ ਕਰਮਚਾਰੀਆਂ ਦੀ ਗਿਣਤੀ ਲਗਭਗ 40 ਫੀਸਦੀ ਹੈ। ਇਸ ਸੂਚੀ ਵਿਚ ਦੇਸ਼ ਦੀਆਂ 500 ਸਭ ਤੋਂ ਵੱਡੀਆਂ ਕੰਪਨੀਆਂ ਨੂੰ ਸ਼ਾਮਲ ਕੀਤਾ ਗਿਆ ਹੈ। ਇਨਫੋਸਿਸ ਵਿਚ ਲਗਭਗ 1.25 ਲੱਖ ਮਹਿਲਾ ਕਰਮਚਾਰੀ ਹਨ ਅਤੇ ਵਿਪਰੋ ਲਈ 88,946 ਔਰਤਾਂ ਕੰਮ ਕਰ ਰਹੀਆਂ ਹਨ। ਐਚਸੀਐਲ ਅਤੇ ਰਿਲਾਇੰਸ ਦੇ ਅੰਕੜੇ ਕ੍ਰਮਵਾਰ 62,780 ਅਤੇ 62,560 ਹਨ। ਮਦਰਸਨ ਸੂਮੀ ਸਿਸਟਮਜ਼ (52,501), ਟੈਕ ਮਹਿੰਦਰਾ (42,774), ਆਈਸੀਆਈਸੀਆਈ ਬੈਂਕ (32,697), ਐਚਡੀਐਫਸੀ ਬੈਂਕ (22,750), ਅਤੇ ਪੇਜ ਇੰਡਸਟਰੀਜ਼ (22,631) ਵੀ ਸਭ ਤੋਂ ਵੱਧ ਮਹਿਲਾ ਕਰਮਚਾਰੀਆਂ ਦੇ ਮਾਮਲੇ ਵਿਚ ਚੋਟੀ ਦੀਆਂ 10 ਕੰਪਨੀਆਂ ਵਿਚ ਸ਼ਾਮਲ ਹਨ।

TCS ਦੇ ਲਗਭਗ ਛੇ ਲੱਖ ਕਰਮਚਾਰੀ ਹਨ ਅਤੇ ਕੰਪਨੀ ਨੇ ਇਸ ਸਾਲ ਲਗਭਗ 1.35 ਲੱਖ ਫਰੈਸ਼ਰਾਂ ਨੂੰ ਨਿਯੁਕਤ ਕੀਤਾ ਹੈ। ਚਾਲੂ ਵਿੱਤੀ ਸਾਲ ਦੀ ਦੂਜੀ ਤਿਮਾਹੀ 'ਚ ਕੰਪਨੀ ਦਾ ਸ਼ੁੱਧ ਲਾਭ ਕਰੀਬ 8 ਫੀਸਦੀ ਵਧ ਕੇ 10,431 ਕਰੋੜ ਰੁਪਏ ਹੋ ਗਿਆ ਹੈ। ਹਾਲ ਹੀ ਵਿਚ ਕੰਪਨੀ ਨੇ ਆਪਣੇ ਕਰਮਚਾਰੀਆਂ ਨੂੰ ਹਫ਼ਤੇ ਵਿਚ ਘੱਟੋ-ਘੱਟ ਤਿੰਨ ਦਿਨ ਦਫ਼ਤਰ ਤੋਂ ਕੰਮ ਕਰਨ ਲਈ ਕਿਹਾ ਸੀ। ਟੀਸੀਐਸ ਨੇ ਕਰਮਚਾਰੀਆਂ ਨੂੰ ਭੇਜੀ ਇਕ ਈਮੇਲ ਵਿੱਚ ਕਿਹਾ ਸੀ ਕਿ ਉਹਨਾਂ ਨੂੰ ਆਪਣੇ ਸੁਪਰਵਾਈਜ਼ਰ ਦੁਆਰਾ ਬਣਾਏ ਗਏ ਰੋਸਟਰ ਦੇ ਅਨੁਸਾਰ ਹਫ਼ਤੇ ਵਿਚ ਤਿੰਨ ਦਿਨ ਦਫਤਰ ਤੋਂ ਕੰਮ ਕਰਨਾ ਹੋਵੇਗਾ। ਇਸ ਦੀ ਉਲੰਘਣਾ ਕਰਨ ਵਾਲੇ ਕਰਮਚਾਰੀਆਂ ਖਿਲਾਫ਼ ਕੰਪਨੀ ਵੱਲੋਂ ਕਾਰਵਾਈ ਕੀਤੀ ਜਾ ਸਕਦੀ ਹੈ।