ਕੀ ਹੈ ਭਾਰਤ ਸਰਕਾਰ ਵਲੋਂ ਪੇਸ਼ ਕੀਤੀ BH ਸੀਰੀਜ਼, ਜਾਣੋ ਕੀ ਨੇ ਫ਼ਾਇਦੇ ਅਤੇ ਕੌਣ ਕਰ ਸਕਦਾ ਹੈ ਅਪਲਾਈ?

What is BH Series offered by Government of India, Know the Benefits and Who Can Apply?

ਇੱਕ BH ਸੀਰੀਜ਼ ਪਲੇਟ ਹੀ ਪੂਰੇ ਦੇਸ਼ ਵਿੱਚ ਹੋਵੇਗੀ ਵੈਧ

ਚੰਡੀਗੜ੍ਹ : ਸੜਕ ਆਵਾਜਾਈ ਅਤੇ ਰਾਜਮਾਰਗ ਮੰਤਰਾਲੇ ਨੇ ਹਾਲ ਹੀ ਵਿੱਚ ਵਾਹਨਾਂ ਲਈ ਨਵੀਂ ਭਾਰਤ (BH) ਸੀਰੀਜ਼ ਨੰਬਰ ਪਲੇਟਾਂ ਦੀ ਵਰਤੋਂ ਨੂੰ ਮਨਜ਼ੂਰੀ ਦਿੱਤੀ ਹੈ। BH ਸੀਰੀਜ਼ ਦੀਆਂ ਇਹ ਨੰਬਰ ਪਲੇਟਾਂ ਮੰਤਰਾਲੇ ਦੁਆਰਾ 28 ਅਗਸਤ, 2021 ਨੂੰ ਪੇਸ਼ ਕੀਤੀਆਂ ਗਈਆਂ ਸਨ।

ਹੁਣ ਇਸ ਨਵੀਂ ਨੰਬਰ ਪਲੇਟ ਦੇ ਆਉਣ ਤੋਂ ਬਾਅਦ ਲੋਕਾਂ 'ਚ ਸਵਾਲ ਉੱਠ ਰਹੇ ਹਨ ਕਿ ਉਹ ਆਪਣੇ ਵਾਹਨਾਂ 'ਚ ਇਸ ਨੰਬਰ ਪਲੇਟ ਦੀ ਵਰਤੋਂ ਕਿਵੇਂ ਕਰ ਸਕਦੇ ਹਨ ਜਾਂ ਇਸ ਦੇ ਲਈ ਉਨ੍ਹਾਂ ਨੂੰ ਕਿਹੜੀਆਂ ਪ੍ਰਕਿਰਿਆਵਾਂ 'ਚੋਂ ਲੰਘਣਾ ਪਵੇਗਾ। ਇਸ ਲਈ ਅੱਜ ਅਸੀਂ ਤੁਹਾਡੇ ਲਈ BH ਸੀਰੀਜ਼ ਨੰਬਰ ਪਲੇਟ ਨਾਲ ਜੁੜੇ ਹਰ ਸਵਾਲ ਦਾ ਜਵਾਬ ਲੈ ਕੇ ਆਏ ਹਾਂ। ਤਾਂ ਆਓ ਜਾਣਦੇ ਹਾਂ ਇਸ ਲਈ ਅਪਲਾਈ ਕਰਨ ਦੀ ਪੂਰੀ ਪ੍ਰਕਿਰਿਆ ਅਤੇ ਯੋਗਤਾ-

 ਸਭ ਤੋਂ ਪਹਿਲਾਂ ਇਹ ਜਾਣਨਾ ਜ਼ਰੂਰੀ ਹੈ ਕਿ ਸਰਕਾਰ ਨੇ ਇਹ ਵਿਸ਼ੇਸ਼ ਨੰਬਰ ਪਲੇਟ ਕਿਉਂ ਲਾਂਚ ਕੀਤੀ ਹੈ। ਦਰਅਸਲ, ਨੰਬਰ ਪਲੇਟਾਂ ਦੀ ਇਸ ਨਵੀਂ ਲੜੀ ਨੂੰ ਸ਼ੁਰੂ ਕਰਨ ਪਿੱਛੇ ਸਰਕਾਰ ਦਾ ਇਰਾਦਾ ਰੱਖਿਆ ਕਰਮਚਾਰੀਆਂ ਅਤੇ ਸਰਕਾਰੀ ਕਰਮਚਾਰੀਆਂ ਲਈ ਵਾਹਨਾਂ ਦੀ ਵਰਤੋਂ ਨੂੰ ਆਸਾਨ ਬਣਾਉਣਾ ਹੈ। ਕਿਉਂਕਿ ਮੌਜੂਦਾ ਪ੍ਰਕਿਰਿਆ ਕੇਂਦਰ ਜਾਂ ਸੂਬਾ ਸਰਕਾਰ ਦੀਆਂ ਤਬਾਦਲਾਯੋਗ ਨੌਕਰੀਆਂ (ਜਿਸ ਨੂੰ ਆਮ ਭਾਸ਼ਾ ਵਿੱਚ ਟ੍ਰਾਂਸਫਰ ਨੌਕਰੀਆਂ ਵੀ ਕਿਹਾ ਜਾਂਦਾ ਹੈ) ਕਰਨ ਵਾਲਿਆਂ ਲਈ ਕਾਫ਼ੀ ਮੁਸ਼ਕਲ ਹੈ।

ਅਜਿਹੇ 'ਚ ਉਨ੍ਹਾਂ ਨੂੰ ਅਜਿਹੀ ਨੰਬਰ ਪਲੇਟ ਦੀ ਲੋੜ ਸੀ, ਜਿਸ ਦੀ ਵਰਤੋਂ ਉਹ ਦੇਸ਼ ਦੇ ਹਰ ਹਿੱਸੇ 'ਚ ਕਰ ਸਕਣ। ਸ਼ੁਰੂਆਤੀ ਤੌਰ 'ਤੇ BH ਸੀਰੀਜ਼ ਦੀਆਂ ਨੰਬਰ ਪਲੇਟਾਂ ਸਿਰਫ ਰਾਜ, ਕੇਂਦਰ ਸਰਕਾਰ ਦੇ ਕਰਮਚਾਰੀਆਂ ਅਤੇ ਰੱਖਿਆ ਕਰਮਚਾਰੀਆਂ ਨੂੰ ਮੁਹੱਈਆ ਕਰਵਾਈਆਂ ਜਾਣਗੀਆਂ।

ਭਾਰਤ ਸੀਰੀਜ਼ ਨੰਬਰ ਪਲੇਟ ਕਿਵੇਂ ਮਦਦ ਕਰੇਗੀ?

ਮੋਟਰ ਵਹੀਕਲ ਐਕਟ ਦੀ ਧਾਰਾ 47 ਕਿਸੇ ਵਾਹਨ ਦੇ ਮਾਲਕ ਨੂੰ 12 ਮਹੀਨਿਆਂ ਤੋਂ ਘੱਟ ਸਮੇਂ ਲਈ ਆਪਣੇ ਵਾਹਨ ਨੂੰ ਕਿਸੇ ਹੋਰ ਰਾਜ ਵਿੱਚ ਰੱਖਣ ਜਾਂ ਚਲਾਉਣ ਦੀ ਆਗਿਆ ਦਿੰਦੀ ਹੈ। ਪਰ 12 ਮਹੀਨਿਆਂ ਬਾਅਦ, ਮਾਲਕ ਲਈ ਵਾਹਨ ਦੀ ਰਜਿਸਟ੍ਰੇਸ਼ਨ ਨੂੰ ਨਵੇਂ ਸੂਬੇ ਵਿੱਚ ਤਬਦੀਲ ਕਰਨਾ ਲਾਜ਼ਮੀ ਹੈ ਜਿੱਥੇ ਇਸ ਨੂੰ ਚਲਾਇਆ ਜਾ ਰਿਹਾ ਹੈ ਜਾਂ ਰੱਖਿਆ ਜਾ ਰਿਹਾ ਹੈ।

ਇਹ ਉਹ ਸਮਾਂ ਹੈ ਜਿੱਥੇ BH ਸੀਰੀਜ਼ ਦੀਆਂ ਨੰਬਰ ਪਲੇਟਾਂ ਵਾਹਨ ਮਾਲਕਾਂ ਨੂੰ ਬਿਹਤਰ ਸਹੂਲਤ ਪ੍ਰਦਾਨ ਕਰਦੀਆਂ ਹਨ। ਕਿਉਂਕਿ ਬੀਐੱਚ ਸੀਰੀਜ਼ ਨੰਬਰ ਪਲੇਟਾਂ ਵਾਲੇ ਵਾਹਨਾਂ ਦੀ ਰਜਿਸਟ੍ਰੇਸ਼ਨ ਨੂੰ ਮੂਲ ਸੂਬੇ ਤੋਂ ਨਵੇਂ ਸੂਬੇ ਵਿੱਚ ਤਬਦੀਲ ਕਰਨ ਦੀ ਕੋਈ ਲੋੜ ਨਹੀਂ ਹੋਵੇਗੀ।

BH ਸੀਰੀਜ਼ ਨੰਬਰ ਪਲੇਟਾਂ ਲਈ ਯੋਗਤਾ ਮਾਪਦੰਡ ਅਤੇ ਅਰਜ਼ੀ ਕਿਵੇਂ ਦੇਣੀ ਹੈ ?

ਸਪੱਸ਼ਟ ਤੌਰ 'ਤੇ, BH ਨੰਬਰ ਪਲੇਟਾਂ ਲਈ ਅਰਜ਼ੀ ਦੇਣ ਲਈ ਬਿਨੈਕਾਰ ਭਾਰਤ ਦਾ ਨਾਗਰਿਕ ਹੋਣਾ ਲਾਜ਼ਮੀ ਹੈ। ਮੌਜੂਦਾ ਸਮੇਂ ਵਿੱਚ, ਬੀਐਚ ਨੰਬਰ ਪਲੇਟ ਮੁੱਖ ਤੌਰ 'ਤੇ ਉਨ੍ਹਾਂ ਲੋਕਾਂ ਲਈ ਹੈ ਜੋ ਸੂਬਾ ਸਰਕਾਰ ਜਾਂ ਕੇਂਦਰ ਸਰਕਾਰ ਨਾਲ ਕੰਮ ਕਰ ਰਹੇ ਹਨ ਜਾਂ ਜਨਤਕ ਖੇਤਰ ਵਿੱਚ ਨੌਕਰੀ ਕਰ ਰਹੇ ਹਨ। ਇਸ ਤੋਂ ਇਲਾਵਾ, MNC ਦੇ ਨਾਲ ਕੰਮ ਕਰਨ ਵਾਲੇ ਵੀ ਅਪਲਾਈ ਕਰ ਸਕਦੇ ਹਨ ਬਸ਼ਰਤੇ ਕੰਪਨੀ ਦੀ ਦੇਸ਼ ਦੇ ਚਾਰ ਜਾਂ ਵੱਧ ਰਾਜਾਂ ਵਿੱਚ ਮੌਜੂਦਗੀ ਹੋਵੇ। ਭਾਰਤ ਸੀਰੀਜ਼ ਨੰਬਰ ਪਲੇਟ ਪ੍ਰਾਪਤ ਕਰਨ ਦੀ ਪ੍ਰਕਿਰਿਆ ਆਨਲਾਈਨ ਹੈ। ਨਵਾਂ ਵਾਹਨ ਖਰੀਦਣ ਵੇਲੇ, ਡੀਲਰ ਵਾਹਨ ਪੋਰਟਲ ਰਾਹੀਂ ਪ੍ਰਕਿਰਿਆ ਸ਼ੁਰੂ ਕਰ ਸਕਦਾ ਹੈ।

BH ਨੰਬਰ ਪਲੇਟ ਆਮ ਨੰਬਰ ਪਲੇਟ ਵਰਗੀ ਦਿੱਖ ਵਿੱਚ ਮਿਲਦੀ ਹੈ - ਜਿਵੇਂ ਕਿ ਕਾਲੇ ਫੌਂਟ ਨੂੰ ਇੱਕ ਚਿੱਟੇ ਬੈਕਗ੍ਰਾਊਂਡ ਵਿੱਚ ਵਰਤਿਆ ਜਾਂਦਾ ਹੈ। ਪਰ ਰਵਾਇਤੀ ਨੰਬਰ ਪਲੇਟਾਂ ਦੇ ਉਲਟ, BH ਸੀਰੀਜ਼ ਪਲੇਟਾਂ ਦੋ ਅੰਕਾਂ ਨਾਲ ਸ਼ੁਰੂ ਹੁੰਦੀਆਂ ਹਨ, ਉਸ ਤੋਂ ਬਾਅਦ BH, ਫਿਰ ਚਾਰ ਅੰਕਾਂ ਅਤੇ ਫਿਰ ਦੋ ਅੱਖਰਾਂ ਨਾਲ। ਮਸਲਨ, ਜੇਕਰ BH ਸੀਰੀਜ਼ ਦੀ ਨੰਬਰ ਪਲੇਟ ਇਸ ਤਰ੍ਹਾਂ ਦੀ ਹੈ- (21 BH 5555 AA) ਇਸ ਦਾ ਮਤਲਬ ਹੈ ਕਿ ਵਾਹਨ ਸਾਲ 2021 ਵਿੱਚ ਰਜਿਸਟਰ ਕੀਤਾ ਗਿਆ ਸੀ, 'BH' ਦਾ ਮਤਲਬ ਭਾਰਤ ਹੈ, '5555' ਵਾਹਨ ਦਾ ਰਜਿਸਟ੍ਰੇਸ਼ਨ ਨੰਬਰ ਹੈ। ਅਤੇ ਵਾਹਨ ਸ਼੍ਰੇਣੀ ਲਈ 'AA' ਵਰਤਿਆ ਜਾਂਦਾ ਹੈ।

BH ਨੰਬਰ ਪਲੇਟ ਦੀ ਕੀਮਤ ਹੋਵੇਗੀ ਰੁਪਏ?
BH ਸੀਰੀਜ਼ ਨੰਬਰ ਪਲੇਟ ਦੀ ਅਰਜ਼ੀ ਦੀ ਲਾਗਤ ਤਿੰਨ ਵੱਖ-ਵੱਖ ਭਾਗਾਂ ਵਿੱਚ ਵੰਡੀ ਗਈ ਹੈ। 10 ਲੱਖ ਤੋਂ ਘੱਟ ਦੀ ਕੀਮਤ ਵਾਲੇ ਵਾਹਨਾਂ ਲਈ, ਬਿਨੈਕਾਰ ਨੂੰ ਵਾਹਨ ਦੀ ਕੀਮਤ ਦਾ 8 ਪ੍ਰਤੀਸ਼ਤ ਭੁਗਤਾਨ ਕਰਨਾ ਹੋਵੇਗਾ, ਜੋ ਕਿ BH ਸੀਰੀਜ਼ ਨੰਬਰ ਪਲੇਟ ਐਪਲੀਕੇਸ਼ਨ ਲਈ ਫੀਸ ਵਜੋਂ ਵਸੂਲੀ ਜਾਵੇਗੀ।

10 ਤੋਂ 20 ਲੱਖ ਰੁਪਏ ਦੀ ਕੀਮਤ ਵਾਲੇ ਵਾਹਨ 'ਤੇ ਟੈਕਸ ਦੀ ਦਰ 10 ਫੀਸਦੀ ਹੋਵੇਗੀ। ਜੇਕਰ ਵਾਹਨ ਦੀ ਕੀਮਤ 20 ਲੱਖ ਰੁਪਏ ਤੋਂ ਵੱਧ ਹੈ ਤਾਂ ਮਾਲਕ ਨੂੰ BH ਸੀਰੀਜ਼ ਦੀ ਨੰਬਰ ਪਲੇਟ ਲਗਵਾਉਣ ਲਈ ਵਾਹਨ ਦੀ ਕੀਮਤ ਦਾ 12 ਫੀਸਦੀ ਅਦਾ ਕਰਨਾ ਹੋਵੇਗਾ।

ਇਸ ਨੰਬਰ ਪਲੇਟ ਦੇ ਕੀ ਫਾਇਦੇ ਹਨ?
BH ਸੀਰੀਜ਼ ਦੀ ਨੰਬਰ ਪਲੇਟ ਦਾ ਸਭ ਤੋਂ ਵੱਡਾ ਫਾਇਦਾ ਇਹ ਹੈ ਕਿ ਦੇਸ਼ ਦੇ ਕਿਸੇ ਵੀ ਸੂਬੇ ਵਿੱਚ ਇਸ ਨੰਬਰ ਪਲੇਟ ਨਾਲ ਵਾਹਨ ਚਲਾਉਣ ਲਈ ਇਸਦੀ ਰਜਿਸਟ੍ਰੇਸ਼ਨ ਟ੍ਰਾਂਸਫਰ ਕਰਨ ਦੀ ਕੋਈ ਲੋੜ ਨਹੀਂ ਹੋਵੇਗੀ। ਇਸ ਤੋਂ ਇਲਾਵਾ, ਇਹ NOC (ਨਾਨ ਇਤਰਾਜ਼ ਸਰਟੀਫਿਕੇਟ) ਆਦਿ ਦੀ ਪਰੇਸ਼ਾਨੀ ਤੋਂ ਵੀ ਬਚਾਉਂਦਾ ਹੈ, ਜੋ ਆਮ ਤੌਰ 'ਤੇ ਵਾਹਨਾਂ ਦੇ ਟ੍ਰਾਂਸਫਰ ਦੇ ਸਮੇਂ ਪ੍ਰਾਪਤ ਕੀਤੇ ਜਾਂਦੇ ਹਨ।