ਸਰਕਾਰ ਨੇ ਇਸ ਸੀਜ਼ਨ ’ਚ ਚੀਨੀ ਨਿਰਯਾਤ ਦੀ ਇਜਾਜ਼ਤ ਦੇਣ ਤੋਂ ਕੀਤਾ ਇਨਕਾਰ 

ਨਵੀਂ ਦਿੱਲੀ: ਸਰਕਾਰ ਨੇ ਅਕਤੂਬਰ ’ਚ ਖਤਮ ਹੋਣ ਵਾਲੇ ਮੌਜੂਦਾ 2023-24 ਸੀਜ਼ਨ ’ਚ ਚੀਨੀ ਦੇ ਨਿਰਯਾਤ ਦੀ ਇਜਾਜ਼ਤ ਦੇਣ ਦੀ ਸੰਭਾਵਨਾ ਤੋਂ ਸੋਮਵਾਰ ਨੂੰ ਇਨਕਾਰ ਕਰ ਦਿਤਾ। ਫਿਲਹਾਲ ਚੀਨੀ ਦੇ ਨਿਰਯਾਤ ’ਤੇ ਅਣਮਿੱਥੇ ਸਮੇਂ ਲਈ ਪਾਬੰਦੀ ਹੈ। ਹਾਲਾਂਕਿ, ਇੰਡੀਅਨ ਸ਼ੂਗਰ ਮਿੱਲਜ਼ ਐਸੋਸੀਏਸ਼ਨ (ਇਸਮਾ) ਨੇ ਸਰਕਾਰ ਨੂੰ 2023-24 ਸੀਜ਼ਨ ’ਚ 10 ਲੱਖ ਟਨ ਚੀਨੀ ਦੇ ਨਿਰਯਾਤ ਦੀ ਇਜਾਜ਼ਤ ਦੇਣ ਦੀ ਬੇਨਤੀ ਕੀਤੀ ਹੈ। ਉਸ ਨੂੰ ਸੀਜ਼ਨ ਦੇ ਅੰਤ ਤਕ ਕਾਫ਼ੀ ਭੰਡਾਰ ਹੋਣ ਦੀ ਉਮੀਦ ਹੈ।

ਖੁਰਾਕ ਮੰਤਰਾਲੇ ਦੇ ਇਕ ਸੀਨੀਅਰ ਅਧਿਕਾਰੀ ਨੇ ਕਿਹਾ ਕਿ ਫਿਲਹਾਲ ਸਰਕਾਰ ਚੀਨੀ ਦੇ ਨਿਰਯਾਤ ’ਤੇ ਵਿਚਾਰ ਨਹੀਂ ਕਰ ਰਹੀ ਹੈ, ਹਾਲਾਂਕਿ ਉਦਯੋਗ ਨੇ ਇਸ ਦੀ ਬੇਨਤੀ ਕੀਤੀ ਹੈ। ਚਾਲੂ 2023-24 ਸੀਜ਼ਨ ’ਚ ਮਾਰਚ ਤਕ ਦੇਸ਼ ਦਾ ਚੀਨੀ ਉਤਪਾਦਨ 3 ਕਰੋੜ ਟਨ ਨੂੰ ਪਾਰ ਕਰ ਗਿਆ ਸੀ। ਇਸਮਾ ਨੇ 2023-24 ਸੀਜ਼ਨ ਲਈ ਸ਼ੁੱਧ ਖੰਡ ਉਤਪਾਦਨ ਅਨੁਮਾਨ ਨੂੰ ਸੋਧ ਕੇ 3.2 ਕਰੋੜ ਟਨ ਕਰ ਦਿਤਾ ਹੈ।

ਸਰਕਾਰ ਨੇ ਖੰਡ ਦਾ ਉਤਪਾਦਨ 31.5-32 ਮਿਲੀਅਨ ਟਨ ਹੋਣ ਦਾ ਅਨੁਮਾਨ ਲਗਾਇਆ ਹੈ। ਇਸ ਦੌਰਾਨ, ਸਰਕਾਰ ਚੀਨੀ ਮਿੱਲਾਂ ਨੂੰ ਇਸ ਸਾਲ ਈਥਾਨੋਲ ਉਤਪਾਦਨ ਲਈ ਬੀ-ਹੈਵੀ ਗੁੜ ਦੇ ਵਾਧੂ ਭੰਡਾਰਨ ਦੀ ਵਰਤੋਂ ਕਰਨ ਦੀ ਇਜਾਜ਼ਤ ਦੇਣ ’ਤੇ ਵਿਚਾਰ ਕਰ ਰਹੀ ਹੈ।