ਸੈਮਸੰਗ ਬਣਿਆ ਭਾਰਤ ਦਾ ਸੱਭ ਤੋਂ ਭਰੋਸੇਮੰਦ ਬਰਾਂਡ
ਦੱਖਣੀ ਕੋਰੀਆ ਦੀ ਕੰਜ਼ਿਊਮਰ ਡਿਊਰੇਬਲਜ਼ ਕੰਪਨੀ ਸੈਮਸੰਗ ਭਾਰਤ ਦਾ ਸੱਭ ਤੋਂ ਭਰੋਸੇਮੰਦ ਬਰਾਂਡ ਬਣੀ ਹੋਈ ਹੈ। ਇਸ ਤੋਂ ਬਾਅਦ ਸੋਨੀ ਅਤੇ ਐਲਜੀ ਦਾ ਨੰਬਰ ਆਉਂਦਾ ਹੈ।
ਮੁੰਬਈ: ਦੱਖਣੀ ਕੋਰੀਆ ਦੀ ਕੰਜ਼ਿਊਮਰ ਡਿਊਰੇਬਲਜ਼ ਕੰਪਨੀ ਸੈਮਸੰਗ ਭਾਰਤ ਦਾ ਸੱਭ ਤੋਂ ਭਰੋਸੇਮੰਦ ਬਰਾਂਡ ਬਣੀ ਹੋਈ ਹੈ। ਇਸ ਤੋਂ ਬਾਅਦ ਸੋਨੀ ਅਤੇ ਐਲਜੀ ਦਾ ਨੰਬਰ ਆਉਂਦਾ ਹੈ। ਉਥੇ ਹੀ ਮੁੱਖ 5 ਬਰਾਂਡਜ਼ 'ਚ ਟਾਟਾ ਗਰੁਪ ਸਿਰਫ਼ ਇਕੋ ਭਾਰਤੀ ਕੰਪਨੀ ਦੇ ਤੌਰ 'ਤੇ ਮੌਜੂਦ ਹੈ, ਜੋ ਚੌਥੇ ਨੰਬਰ 'ਤੇ ਹੈ।
ਬਰਾਂਡ ਟਰੱਸਟ ਰਿਪੋਰਟ 2014 'ਚ ਇਹ ਗੱਲਾਂ ਸਾਹਮਣੇ ਆਈਆਂ ਹਨ। ਮੁੱਖ 3 ਸੂਚੀ 'ਚ ਕੋਈ ਬਦਲਾਅ ਨਹੀਂ ਹੋਇਆ, ਉਥੇ ਹੀ ਟਾਟਾ ਗਰੁਪ ਦੀ ਸਥਿਤੀ 'ਚ ਸੁਧਾਰ ਹੋਇਆ ਹੈ।
ਬੈਂਕਿੰਗ ਵਿਤੀ ਸੇਵਾਵਾਂ ਅਤੇ ਬੀਮਾ ਖੇਤਰ ਦੀ ਗੱਲ ਕਰੀਏ ਤਾਂ ਦੇਸ਼ ਦਾ ਸੱਭ ਤੋਂ ਵੱਡਾ ਕਰਜ਼ਦਾਤਾ ਸਟੇਟ ਬੈਂਕ ਆਫ਼ ਇੰਡੀਆ ਮੋਹਰੀ ਦੇ ਤੌਰ 'ਤੇ ਸਾਹਮਣੇ ਆਇਆ ਹੈ, ਜੋ ਸੂਚੀ 'ਚ 21ਵੇਂ ਸਥਾਨ 'ਤੇ ਰਿਹਾ।
ਉਥੇ ਹੀ ਪੈਪਸੀ ਫ਼ੂਡ ਐਂਡ ਬਿਵਰੇਜ ਸ਼੍ਰੇਣੀ 'ਚ ਸਿਖਰ 'ਤੇ ਰਿਹਾ ਅਤੇ ਉਸ ਨੂੰ ਸੂਚੀ 'ਚ 44ਵੇਂ ਸਥਾਨ 'ਤੇ ਜਗ੍ਹਾ ਮਿਲੀ। ਬਾਬਾ ਰਾਮਦੇਵ ਦੀ ਪਤੰਜਲੀ ਐਫ਼ਐਮਸੀਜੀ ਸ਼੍ਰੇਣੀ 'ਚ ਸੱਭ ਤੋਂ ਅੱਗੇ ਰਹੀ ਅਤੇ ਸੂਚੀ 'ਚ 13ਵੇਂ ਨੰਬਰ 'ਤੇ ਰਹੀ।
ਰਿਪੋਰਟ ਮੁਤਾਬਕ ਅਮਰੀਕਾ ਦੀ ਐੱਪਲ ਕੰਪਨੀ ਸੂਚੀ 'ਚ 5ਵੇਂ ਸਥਾਨ 'ਤੇ ਰਹੀ, ਜੋ ਬੀਤੇ ਸਾਲ ਦੀ ਤੁਲਨਾ 'ਚ ਇਕ ਸਥਾਨ ਘੱਟ ਹੈ। ਕੰਪਿਊਟਰ ਬਣਾਉਣ ਵਾਲੀ ਕੰਪਨੀ ਡੈਲ ਦੋ ਸਥਾਨ ਦੇ ਸੁਧਾਰ ਨਾਲ ਛੇਵੇਂ ਸਥਾਨ 'ਤੇ ਪਹੁੰਚ ਗਈ ਹੈ, ਉਥੇ ਹੀ ਆਟੋ ਕੰਪਨੀ ਹੋਂਡਾ 7ਵੇਂ ਸਥਾਨ 'ਤੇ ਰਹੀ।
ਸਪੋਰਟਸਵੀਅਰ ਕੰਪਨੀ ਨਾਇਕੀ 29 ਸਥਾਨ ਦੀ ਛਲਾਂਗ ਨਾਲ 8ਵੇਂ ਸਥਾਨ 'ਤੇ ਪਹੁੰਚ ਗਈ ਹੈ, ਉਥੇ ਹੀ ਕੰਪਿਊਟਰ ਬਣਾਉਣ ਵਾਲੀ ਇਕ ਹੋਰ ਕੰਪਨੀ ਹੈਵਲੇਟ ਪੈਕਰਡ (ਐਚਪੀ) ਅਤੇ ਕਾਰ ਕੰਪਨੀ ਮਾਰੂਤੀ ਸੁਜ਼ੂਕੀ ਹੌਲੀ ਹੌਲੀ 9ਵੇਂ ਅਤੇ 10ਵੇਂ ਨੰਬਰ 'ਤੇ ਰਹੀਆਂ ਹਨ।