Air India Fined : DGCA ਨੇ ਇਕ ਹਫਤੇ ਵਿਚ ਦੂਜੀ ਵਾਰ ਲਾਇਆ ਏਅਰ ਇੰਡੀਆ ’ਤੇ ਜੁਰਮਾਨਾ

ਨਵੀਂ ਦਿੱਲੀ: ਸ਼ਹਿਰੀ ਹਵਾਬਾਜ਼ੀ ਡਾਇਰੈਕਟੋਰੇਟ ਜਨਰਲ (ਡੀ.ਜੀ.ਸੀ.ਏ.) ਨੇ ਕੁੱਝ ਲੰਮੇ ਰੂਟਾਂ ’ਤੇ ਚੱਲਣ ਵਾਲੀਆਂ ਉਡਾਣਾਂ ਦੇ ਸਬੰਧ ’ਚ ਸੁਰੱਖਿਆ ਮਾਪਦੰਡਾਂ ਦੀ ਉਲੰਘਣਾ ਕਰਨ ਲਈ ਕੌਮੀ ਏਅਰਲਾਈਨ ਏਅਰ ਇੰਡੀਆ ’ਤੇ 1.10 ਕਰੋੜ ਰੁਪਏ ਦਾ ਜੁਰਮਾਨਾ ਲਗਾਇਆ ਹੈ। 

ਰੈਗੂਲੇਟਰ ਨੇ ਇਕ ਹਫਤੇ ਵਿਚ ਦੂਜੀ ਵਾਰ ਏਅਰ ਇੰਡੀਆ ’ਤੇ ਜੁਰਮਾਨਾ ਲਗਾਇਆ ਹੈ। ਬੁਧਵਾਰ ਨੂੰ ਜਾਰੀ ਇਕ ਬਿਆਨ ਮੁਤਾਬਕ ਰੈਗੂਲੇਟਰ ਨੂੰ ਏਅਰਲਾਈਨ ਦੇ ਇਕ ਸਾਬਕਾ ਕਰਮਚਾਰੀ ਤੋਂ ਸ਼ਿਕਾਇਤ ਮਿਲੀ ਸੀ ਕਿ ਏਅਰਲਾਈਨ ਨੇ ਐਮਰਜੈਂਸੀ ਆਕਸੀਜਨ ਸਪਲਾਈ ਦੇ ਲਾਜ਼ਮੀ ਪ੍ਰਬੰਧ ਤੋਂ ਬਿਨਾਂ ਅਮਰੀਕਾ ਲਈ ਬੋਇੰਗ 777 ਜਹਾਜ਼ ਦਾ ਸੰਚਾਲਨ ਕੀਤਾ। 

ਰੈਗੂਲੇਟਰ ਨੇ ਰੀਪੋਰਟ ਮਿਲਣ ਤੋਂ ਬਾਅਦ ਵਿਸਥਾਰਤ ਜਾਂਚ ਕੀਤੀ। ਇਸ ਵਿਚ ਦੋਸ਼ ਲਾਇਆ ਗਿਆ ਹੈ ਕਿ ਏਅਰ ਇੰਡੀਆ ਵਲੋਂ ਲੰਬੀ ਦੂਰੀ ਦੇ ਕੁੱਝ ਮਹੱਤਵਪੂਰਨ ਰੂਟਾਂ ’ਤੇ ਚਲਾਈਆਂ ਜਾਣ ਵਾਲੀਆਂ ਉਡਾਣਾਂ ਵਿਚ ਸੁਰੱਖਿਆ ਉਲੰਘਣਾ ਕੀਤੀ ਗਈ ਹੈ। ਡੀ.ਜੀ.ਸੀ.ਏ. ਨੇ ਕਿਹਾ ਕਿ ਜਾਂਚ ’ਚ ਪਹਿਲੀ ਨਜ਼ਰ ’ਚ ਏਅਰਲਾਈਨ ਵਲੋਂ ਪਾਲਣਾ ਨਾ ਕਰਨ ਦਾ ਪ੍ਰਗਟਾਵਾ ਹੋਇਆ ਹੈ। ਇਸ ਤੋਂ ਬਾਅਦ ਏਅਰ ਇੰਡੀਆ ਨੂੰ ਕਾਰਨ ਦੱਸੋ ਨੋਟਿਸ ਜਾਰੀ ਕੀਤਾ ਗਿਆ ਸੀ। 

ਡੀ.ਜੀ.ਸੀ.ਏ. ਨੇ ਕਾਰਵਾਈ ਕਰਨ ਤੋਂ ਪਹਿਲਾਂ ਭੇਜੇ ਗਏ ਕਾਰਨ ਦੱਸੋ ਨੋਟਿਸ ’ਤੇ ਏਅਰਲਾਈਨ ਦੇ ਜਵਾਬ ਦਾ ਵਿਸ਼ਲੇਸ਼ਣ ਕੀਤਾ। ਸੁਰੱਖਿਆ ਰੀਪੋਰਟ ਏਅਰ ਇੰਡੀਆ ਵਲੋਂ ਸੰਚਾਲਿਤ ਬੋਇੰਗ 777 ਜਹਾਜ਼ਾਂ ਨਾਲ ਸਬੰਧਤ ਹੈ। ਡੀ.ਜੀ.ਸੀ.ਏ. ਨੇ ਇਕ ਬਿਆਨ ਵਿਚ ਕਿਹਾ ਕਿ ਲੀਜ਼ ’ਤੇ ਲਏ ਗਏ ਜਹਾਜ਼ਾਂ ਦਾ ਸੰਚਾਲਨ ਰੈਗੂਲੇਟਰੀ/ਓ.ਈ.ਐਮ. ਪ੍ਰਦਰਸ਼ਨ ਸੀਮਾ ਦੇ ਅਨੁਕੂਲ ਨਹੀਂ ਸੀ, ਇਸ ਲਈ ਡੀ.ਜੀ.ਸੀ.ਏ. ਨੇ ਲਾਗੂ ਕਰਨ ਦੀ ਕਾਰਵਾਈ ਕੀਤੀ ਹੈ ਅਤੇ ਏਅਰ ਇੰਡੀਆ ’ਤੇ 1.10 ਕਰੋੜ ਰੁਪਏ ਦਾ ਜੁਰਮਾਨਾ ਲਗਾਇਆ ਹੈ। 

ਜੁਰਮਾਨੇ ਬਾਰੇ ਏਅਰ ਇੰਡੀਆ ਵਲੋਂ ਤੁਰਤ ਕੋਈ ਬਿਆਨ ਨਹੀਂ ਆਇਆ ਹੈ। ਬੀ777 ਕਮਾਂਡਰ ਵਜੋਂ ਕੰਮ ਕਰਨ ਵਾਲੇ ਡਰਾਈਵਰ ਨੇ 29 ਅਕਤੂਬਰ 2023 ਨੂੰ ਐਮਰਜੈਂਸੀ ਆਕਸੀਜਨ ਸਪਲਾਈ ਦੀ ਲੋੜੀਂਦੀ ਪ੍ਰਣਾਲੀ ਨਾ ਲਿਜਾਣ ਲਈ ਏਅਰਲਾਈਨ ਬਾਰੇ ਸ਼ਿਕਾਇਤ ਕੀਤੀ ਸੀ। 

ਸੂਤਰਾਂ ਨੇ ਉਸ ਸਮੇਂ ਕਿਹਾ ਸੀ ਕਿ ਸ਼ਿਕਾਇਤ ਇਹ ਸੀ ਕਿ ਏਅਰ ਇੰਡੀਆ ਲੀਜ਼ ’ਤੇ ਲਏ ਗਏ ਬੀ777 ਜਹਾਜ਼ਾਂ ਨਾਲ ਉਡਾਣਾਂ ਚਲਾ ਰਹੀ ਹੈ ਜਿਸ ਵਿਚ ਰਸਾਇਣਕ ਤੌਰ ’ਤੇ ਤਿਆਰ ਆਕਸੀਜਨ ਪ੍ਰਣਾਲੀ ਹੈ ਜੋ ਲਗਭਗ 12 ਮਿੰਟ ਤਕ ਚੱਲਦੀ ਹੈ ਅਤੇ ਇਸ ਲਈ ਇਸ ਦੀ ਵਰਤੋਂ ਸਾਨ ਫਰਾਂਸਿਸਕੋ ਤੋਂ ਏਅਰਲਾਈਨ ਦੀਆਂ ਸਿੱਧੀਆਂ ਉਡਾਣਾਂ ਲਈ ਨਹੀਂ ਕੀਤੀ ਜਾਣੀ ਚਾਹੀਦੀ।