ਭਾਰਤੀ ਸਟਾਰਟਅੱਪ ਅਗਲੇ ਸਾਲ ਪੇਸ਼ ਕਰਨ ਜਾ ਰਿਹੈ ਉੱਡਣ ਵਾਲੀ ਟੈਕਸੀ, ਸ਼ਹਿਰਾਂ ਦੀ ਭੀੜ ਘੱਟ ਕਰਨਾ ਹੈ ਟੀਚਾ

ਨਵੀਂ ਦਿੱਲੀ: ਚੇਨਈ ਅਧਾਰਤ ਸਟਾਰਟਅੱਪ ‘ਈਪਲੇਨ’ ਅਗਲੇ ਸਾਲ ਮਾਰਚ ਤਕ ਉਡਣ ਵਾਲੀ ਇਲੈਕਟ੍ਰਿਕ ਟੈਕਸੀ ਬਣਾਉਣ ਕਰਨ ਜਾ ਰਿਹਾ ਹੈ। ‘ਈਪਲੇਨ’ ਸ਼ਹਿਰੀ ਭੀੜ ਨੂੰ ਘਟਾਉਣ ਦੇ ਤਰੀਕਿਆਂ ’ਤੇ ਕੰਮ ਕਰ ਰਿਹਾ ਹੈ। 

ਇਕ ਸੀਨੀਅਰ ਅਧਿਕਾਰੀ ਨੇ ਦਸਿਆ ਕਿ ਇੰਡੀਅਨ ਇੰਸਟੀਚਿਊਟ ਆਫ ਟੈਕਨਾਲੋਜੀ (ਆਈ.ਆਈ.ਟੀ.), ਮਦਰਾਸ ਤੋਂ ਤਿਆਰ ਕੀਤੀ ਗਈ ਕੰਪਨੀ ਦਾ ਟੀਚਾ ਆਉਣ ਵਾਲੇ ਮਹੀਨਿਆਂ ਵਿਚ ਅਪਣੇ ਡਰੋਨਾਂ ਦਾ ਵਪਾਰੀਕਰਨ ਕਰਨਾ ਹੈ, ਜੋ 2-6 ਕਿਲੋਗ੍ਰਾਮ ਦਾ ਪੇਲੋਡ ਲੈ ਕੇ ਜਾ ਸਕਦੇ ਹਨ। 

‘ਈਪਲੇਨ’ ਦੇ ਸੰਸਥਾਪਕ ਅਤੇ ਸੀ.ਈ.ਓ. ਸੱਤਿਆ ਚੱਕਰਵਰਤੀ ਨੇ ਕਿਹਾ ਕਿ ਸਟਾਰਟਅੱਪ ਈ.ਵੀ.ਟੀ.ਓ.ਐਲ. (ਇਲੈਕਟ੍ਰਿਕ ਵਰਟੀਕਲ ਟੇਕਆਫ ਐਂਡ ਲੈਂਡਿੰਗ) ਜਹਾਜ਼ ਵਿਕਸਿਤ ਕਰ ਰਿਹਾ ਹੈ। ਸ਼ੁਰੂਆਤ ’ਚ ਇਹ ਤਿੰਨ ਜਾਂ ਚਾਰ ਸੀਟਾਂ ਵਾਲਾ ਜਹਾਜ਼ ਹੋਵੇਗਾ, ਜਿਸ ਨੂੰ ਏਅਰ ਐਂਬੂਲੈਂਸ ’ਚ ਬਦਲਿਆ ਜਾ ਸਕਦਾ ਹੈ। 

ਚੱਕਵਰਤੀ ਨੇ ਕਿਹਾ, ‘‘ਅਗਲੇ ਸਾਲ ਮਾਰਚ ਤਕ , ਅਸੀਂ ਪਹਿਲਾ ਸਰਟੀਫ਼ਾਈਡ ਪ੍ਰੋਟੋਟਾਈਪ ਵਿਕਸਤ ਕਰਨ ਦੀ ਉਮੀਦ ਕਰਦੇ ਹਾਂ। ਇਸ ਤੋਂ ਬਾਅਦ ਡਾਇਰੈਕਟੋਰੇਟ ਜਨਰਲ ਆਫ ਸਿਵਲ ਐਵੀਏਸ਼ਨ (ਡੀ.ਜੀ.ਸੀ.ਏ.) ਤੋਂ ਸਰਟੀਫਿਕੇਟ ਲੈਣ ’ਚ ਕੁੱਝ ਹੋਰ ਸਾਲ ਲੱਗਣਗੇ।’’

ਸਟਾਰਟਅੱਪ ਦੀ ਵੈੱਬਸਾਈਟ ਮੁਤਾਬਕ ‘ਈਪਲੇਨ’ ਰਾਹੀਂ ਉਸ ਥਾਂ ਤਕ ਪਹੁੰਚਣ ਲਈ ਸਿਰਫ 14 ਮਿੰਟ ਦਾ ਸਮਾਂ ਲੱਗੇਗਾ, ਜਿਸ ਨੂੰ ਨਿੱਜੀ ਗੱਡੀ ਰਾਹੀਂ ਪਹੁੰਚਣ ’ਚ 60 ਮਿੰਟ ਦਾ ਸਮਾਂ ਲਗਦਾ ਹੈ। ਕੰਪਨੀ ਦਾ ਉਦੇਸ਼ ਈ.ਵੀ.ਟੀ.ਓ.ਐਲ. ਰਾਹੀਂ ਸ਼ਹਿਰੀ ਖੇਤਰਾਂ ’ਚ ਭੀੜ ਨੂੰ ਘਟਾਉਣਾ ਹੈ।