Uber India ਨੇ ਗਾਹਕ ਤੋਂ 27 ਰੁਪਏ ਲਏ ਜ਼ਿਆਦਾ, ਹੁਣ ਭਰਨਾ ਪਵੇਗਾ ਏਨੇ ਹਜ਼ਾਰ ਦਾ ਜ਼ੁਰਮਾਨਾ

Uber India : ਅਕਸਰ ਕੁਝ ਲੋਕ ਇਹ ਸ਼ਿਕਾਇਤ ਕਰਦੇ ਦੇਖੇ ਜਾਂਦੇ ਹਨ ਕਿ ਕੈਬ ਜਾਂ ਰੈਪਿਡੋ ਡਰਾਈਵਰ ਨੇ ਉਨ੍ਹਾਂ ਤੋਂ ਜ਼ਿਆਦਾ ਪੈਸੇ ਵਸੂਲੇ ਹਨ। ਅਜਿਹਾ ਹੀ ਕੁਝ ਇਕ ਵਿਅਕਤੀ ਨਾਲ ਹੋਇਆ। ਉਹ Ube ਕੈਬ ਰਾਹੀਂ ਸਫ਼ਰ ਕਰ ਰਿਹਾ ਸੀ, ਜਿਸ ਦੇ ਡਰਾਈਵਰ ਨੇ ਉਸ ਤੋਂ 27 ਰੁਪਏ ਵੱਧ ਵਸੂਲੇ। ਹੁਣ ਉਬਰ ਇੰਡੀਆ ਕੰਪਨੀ 'ਤੇ ਜੁਰਮਾਨਾ ਲਗਾਇਆ ਗਿਆ ਹੈ। ਮਾਮਲਾ ਚੰਡੀਗੜ੍ਹ ਦਾ ਹੈ। ਚੰਡੀਗੜ੍ਹ ਦੇ ਜ਼ਿਲ੍ਹਾ ਖਪਤਕਾਰ ਝਗੜਾ ਨਿਵਾਰਨ ਕਮਿਸ਼ਨ ਨੇ 28 ਹਜ਼ਾਰ ਰੁਪਏ ਦਾ ਜੁਰਮਾਨਾ ਲਗਾਇਆ ਹੈ।

 
ਕਮਿਸ਼ਨ ਨੇ ਉਬਰ ਇੰਡੀਆ ਨੂੰ ਸ਼ਿਕਾਇਤਕਰਤਾ ਰਿਤਵਿਕ ਗਰਗ ਨੂੰ 27 ਰੁਪਏ ਵਾਪਸ ਕਰਨ ਦੇ ਨਿਰਦੇਸ਼ ਦਿੱਤੇ, ਜੋ ਉਸ ਤੋਂ ਵੱਧ ਵਸੂਲੇ ਗਏ ਸਨ। ਇਸ ਦੇ ਨਾਲ ਹੀ 5,000 ਰੁਪਏ ਮੁਆਵਜ਼ੇ ਵਜੋਂ ਅਤੇ 3,000 ਰੁਪਏ ਮੁਕੱਦਮੇ ਦੀ ਲਾਗਤ ਵਜੋਂ ਦੇਣ ਲਈ ਕਿਹਾ ਹੈ। ਕਮਿਸ਼ਨ ਨੇ ਕਿਹਾ ਕਿ 'ਅਜਿਹੇ ਸੇਵਾ ਪ੍ਰਦਾਤਾਵਾਂ 'ਤੇ ਨਜ਼ਰ ਰੱਖਣ ਦੀ ਲੋੜ ਹੈ, ਜੋ ਸਮੇਂ ਸਿਰ ਭਰੋਸੇ, ਵਾਅਦਿਆਂ ਅਤੇ ਵਚਨਬੱਧਤਾਵਾਂ ਦੀ ਉਲੰਘਣਾ ਕਰਦੇ ਹਨ ਅਤੇ ਉਨ੍ਹਾਂ ਨਾਲ ਸਖ਼ਤੀ ਨਾਲ ਨਜਿੱਠਣ ਦੀ ਲੋੜ ਹੈ।

ਸ਼ਿਕਾਇਤਕਰਤਾ ਨੂੰ ਮੁਆਵਜ਼ੇ ਅਤੇ ਮੁਕੱਦਮੇਬਾਜ਼ੀ ਦੇ ਖਰਚਿਆਂ ਵਜੋਂ ਭੁਗਤਾਨ ਯੋਗ ਰਕਮ ਤੋਂ ਇਲਾਵਾ ਕਮਿਸ਼ਨ ਨੇ ਉਸਨੂੰ ਖਪਤਕਾਰ ਲੀਗਲ ਐਡ ਅਕਾਊਂਟ ਵਿੱਚ ਮੁਆਵਜ਼ੇ ਵਜੋਂ ਘੱਟੋ ਘੱਟ 20,000 ਰੁਪਏ ਜਮ੍ਹਾ ਕਰਨ ਲਈ ਕਿਹਾ ਹੈ। ਪੰਜਾਬ ਦੇ ਮੰਡੀ ਗੋਬਿੰਦਗੜ੍ਹ ਦੇ ਵਸਨੀਕ ਰਿਤਵਿਕ ਗਰਗ ਨੇ ਦੱਸਿਆ ਕਿ ਉਸਨੇ 19 ਸਤੰਬਰ, 2022 ਨੂੰ ਉਬਰ ਐਪਲੀਕੇਸ਼ਨ ਰਾਹੀਂ ਉਬਰ ਇੰਡੀਆ ਕੈਬ ਸੇਵਾ ਤੋਂ ਚੰਡੀਗੜ੍ਹ ਦੇ 21ਏ ਤੋਂ ਮਾਡਰਨ ਹਾਊਸਿੰਗ ਕੰਪਲੈਕਸ ਦੇ ਸੈਕਟਰ 13 ਤੱਕ ਜਾਣ ਲਈ ਮੋਟੋ ਕਨੈਕਟ ਰਾਈਡ ਬੁੱਕ ਕੀਤੀ ਸੀ।

ਬੁਕਿੰਗ ਦੇ ਸਮੇਂ ਕਿਰਾਇਆ 53 ਰੁਪਏ ਦੱਸਿਆ ਗਿਆ ਸੀ ਪਰ ਡਰਾਈਵਰ ਨੇ 80 ਰੁਪਏ ਲੈ ਲਏ। ਗਰਗ ਨੇ ਕਿਹਾ ਕਿ ਉਸਨੇ 22 ਸਤੰਬਰ, 2022 ਨੂੰ ਕਾਨੂੰਨੀ ਨੋਟਿਸ ਭੇਜ ਕੇ ਅਤੇ ਫਿਰ ਈ-ਮੇਲ ਰਾਹੀਂ ਇਹ ਮੁੱਦਾ ਉਬਰ ਇੰਡੀਆ ਕੋਲ ਉਠਾਇਆ ਪਰ ਉਸਦੀ ਸ਼ਿਕਾਇਤ ਦਾ ਹੱਲ ਨਹੀਂ ਹੋਇਆ। ਬਾਅਦ ਵਿੱਚ ਉਹ ਸ਼ਿਕਾਇਤ ਨੂੰ ਅੱਗੇ ਲੈ ਗਿਆ। ਜਿਸ ਤੋਂ ਬਾਅਦ ਕਮਿਸ਼ਨ ਦਾ ਫੈਸਲਾ ਆਇਆ। ਕਮਿਸ਼ਨ ਨੇ ਕਿਹਾ ਕਿ ਉਬਰ ਇੰਡੀਆ ਵੱਲੋਂ ਸਬੰਧਤ ਡਰਾਈਵਰ ਖ਼ਿਲਾਫ਼ ਕਾਰਵਾਈ ਕਰਨ ਲਈ ਕੋਈ ਜਾਂਚ ਰਿਪੋਰਟ ਰਿਕਾਰਡ ’ਤੇ ਨਹੀਂ ਰੱਖੀ ਗਈ ਸੀ।