ਇਸਲਾਮਾਬਾਦ/ ਕਾਬੁਲ/ ਨਵੀਂ ਦਿੱਲੀ, 31 ਜਨਵਰੀ : ਉੱਤਰੀ ਅਫ਼ਗਾਨਿਸਤਾਨ 'ਚ ਅੱਜ ਤਾਕਤਵਰ ਭੂਚਾਲ ਆਇਆ ਜਿਸ ਦੀ ਤੀਬਰਤਾ ਰਿਕਟਰ ਪੈਮਾਨੇ 'ਤੇ 6.1 ਮਾਪੀ ਗਈ। ਭੂਚਾਲ ਏਨਾ ਤੇਜ਼ ਸੀ ਕਿ ਉਸ ਦੇ ਝਟਕੇ ਭਾਰਤ ਅਤੇ ਪਾਕਿਸਤਾਨ 'ਚ ਵੀ ਮਹਿਸੂਸ ਕੀਤੇ ਗਏ। ਭੂਚਾਲ ਕਰ ਕੇ ਪਾਕਿਸਤਾਨ 'ਚ ਇਕ ਕੁੜੀ ਦੀ ਮੌਤ ਹੋ ਗਈ ਜਦਕਿ 19 ਜਣੇ ਜ਼ਖ਼ਮੀ ਹੋ ਗਏ। ਭਾਰਤੀ ਸਮੇਂ ਅਨੁਸਾਰ ਭੂਚਾਲ ਦੁਪਹਿਰ 12:37 ਵਜੇ ਆਇਆ। ਇਸ ਦਾ ਕੇਂਦਰ ਹਿੰਦੂਕੁਸ਼ ਪਰਬਤਾਂ 'ਚ ਤਜ਼ਾਕਿਸਤਾਨ ਨਾਲ ਲਗਦੀ ਅਫ਼ਗਾਨਿਸਤਾਨ ਦੀ ਉੱਤਰੀ ਸਰਹੱਦ 'ਤੇ 191 ਕਿਲੋਮੀਟਰ ਦੀ ਡੂੰਘਾਈ 'ਚ ਸੀ। ਭੂਚਾਲ ਦਾ ਕੇਂਦਰ ਅਫ਼ਗਾਨਿਸਤਾਨ ਦੇ ਬਦਖਸ਼ਾਨ ਸੂਬੇ ਦੇ ਜੁਰਮ ਜ਼ਿਲ੍ਹੇ 'ਚ ਸੀ। ਕਾਬੁਲ 'ਚ ਘੱਟ ਤੋਂ ਘੱਟ ਦੋ ਭਾਰੀ ਝਟਕੇ ਮਹਿਸੂਸ ਕੀਤੇ ਗਏ ਜਿਸ ਤੋਂ ਬਾਅਦ ਲੋਕਾਂ ਨੂੰ ਸੜਕਾਂ 'ਤੇ ਦੌੜਦੇ ਵੇਖਿਆ ਗਿਆ। ਜੁਰਮ ਉਹੀ ਇਲਾਕਾ ਹੈ ਜਿੱਥੇ ਅਕਤੂਬਰ 2015 'ਚ ਆਏ 7.5 ਤੀਬਰਤਾ ਦੇ ਭੂਚਾਲ ਦਾ ਕੇਂਦਰੀ ਸੀ ਜਿਸ 'ਚ 380 ਤੋਂ ਜ਼ਿਆਦਾ ਲੋਕਾਂ ਦੀ ਮੌਤ ਹੋ ਗਈ ਸੀ।