ਜਾਪਾਨ ਦੇ ਬਾਰੇ ਵਿਚ ਕਿਹਾ ਜਾਂਦਾ ਹੈ ਕਿ ਉੱਥੇ ਦੇ ਲੋਕ ਬਿੱਲੀਆਂ ਨਾਲ ਬਹੁਤ ਪਿਆਰ ਕਰਦੇ ਹਨ। ਐਤਵਾਰ ਨੂੰ ਬਿੱਲੀਆਂ ਲਈ ਸਪੈਸ਼ਲ ਟ੍ਰੇਨ ਚਲਾ ਕੇ ਜਾਪਾਨ ਨੇ ਇਸ ਗੱਲ ਦਾ ਸਬੂਤ ਵੀ ਦੇ ਦਿੱਤਾ। ਦਰਅਸਲ ਕੇਂਦਰੀ ਜਾਪਾਨ ਦੇ ਓਗਾਕੀ ਵਿਚ ਐਤਵਾਰ ਨੂੰ ਲੋਕਾਂ ਨੇ ਰੇਲਵੇ ਆਪਰੇਟਰ ਨਾਲ ਮਿਲ ਕੇ ਇਕ ਲੋਕਲ ਟ੍ਰੇਨ ਚਲਾਈ, ਜਿਸ ਵਿਚ ਪਹਿਲੇ ਦਿਨ 40 ਯਾਤਰੀ ਸਵਾਰ ਹੋਏ। ਖਾਸ ਗੱਲ ਇਹ ਹੈ ਕਿ ਇਨ੍ਹਾਂ 40 ਮੁਸਾਫਿਰਾਂ ਵਿਚੋਂ 30 ਨੇ ਬਿੱਲੀਆਂ ਨਾਲ ਸਫਰ ਕੀਤਾ।
ਲੋਕਾਂ ਨੂੰ ਜਾਗਰੂਕ ਕਰਨ ਲਈ ਚਲਾਈ ਗਈ ਇਹ ਖਾਸ ਟ੍ਰੇਨ
ਜਾਪਾਨ ਵਿਚ ਇਸ ਤਰ੍ਹਾਂ ਦੀ ਟ੍ਰੇਨ ਚਲਾਉਣ ਦਾ ਖਾਸ ਮਕਸਦ ਬਿੱਲੀਆਂ ਦੀ ਹੱਤਿਆ ਨੂੰ ਰੋਕਣ ਲਈ ਲੋਕਾਂ ਨੂੰ ਜਾਗਰੂਕ ਕਰਨਾ ਸੀ। ਇਸ ਪ੍ਰਬੰਧ ਨਾਲ ਜੋ ਵੀ ਕਮਾਈ ਹੋਈ, ਉਸ ਨੂੰ ਸ਼ਹਿਰ ਦੀਆਂ ਬਿੱਲੀਆਂ ਦੀ ਦੇਖਭਾਲ ਲਈ ਖਰਚ ਕੀਤਾ ਜਾਵੇਗਾ। ਪੱਛਮੀ ਜਾਪਾਨ ਦੇ ਇਕ ਯਾਤਰੀ ਮਿਕਿਕੋ ਹਯਾਸ਼ੀ ਨੇ ਇਸ ਸਬੰਧ ਵਿਚ ਕਿਹਾ ਕਿ ਮੈਨੂੰ ਲੱਗਦਾ ਹੈ ਕਿ ਇਸ ਪ੍ਰਬੰਧ ਨਾਲ ਬਹੁਤ ਸਾਰੇ ਲੋਕ ਜਾਗਰੂਕ ਹੋਣਗੇ ਅਤੇ ਬਿੱਲੀਆਂ ਦੀ ਹੱਤਿਆ ਨੂੰ ਰੋਕਣ ਦੀ ਕੋਸ਼ਿਸ਼ ਕਰਣਗੇ।