ਮੈਲਬੌਰਨ: ਆਸਟ੍ਰੇਲੀਆ ਦੇ ਵਿਕਟੋਰੀਆ ਸੂਬੇ 'ਚ ਭਾਰਤੀ ਡਰਾਈਵਿੰਗ ਲਾਈਸੈਂਸ ਨੂੰ ਗੈਰ-ਕਾਨੂੰਨੀ ਕਰਾਰ ਦੇ ਦਿੱਤਾ ਗਿਆ ਹੈ। ਅਜਿਹਾ ਕਦਮ ਵਿਕਟੋਰੀਆ ਰੋਡ ਅਥਾਰਟੀ ਨੇ ਜਾਅਲੀ ਭਾਰਤੀ ਲਾਈਸੈਂਸ ਫੜੇ ਜਾਣ ਤੋਂ ਬਾਅਦ ਚੁੱਕਿਆ ਹੈ। ਅਥਾਰਟੀ ਨੇ ਭਾਰਤੀ ਲਾਈਸੈਂਸ ਨੂੰ ਸਿਰੇ ਤੋਂ ਨਕਾਰਦੇ ਹੋਏ ਕਿਹਾ ਹੈ ਕਿ ਇੱਥੇ ਵਾਹਨ ਚਲਾਉਣ ਵਾਲੇ ਭਾਰਤੀਆਂ ਨੂੰ ਇੱਥੇ ਵਿਕਟੋਰੀਆ ਦਾ ਲਾਈਸੈਂਸ ਲੈਣਾ ਹੋਵੇਗਾ। ਵਿਕਟੋਰੀਆ 'ਚ ਲਾਈਸੈਂਸ ਅਥਾਰਟੀ ਦੇ ਅਜਿਹੇ ਹੁਕਮਾਂ ਤੋਂ ਬਾਅਦ ਉੱਥੇ ਵਾਹਨ ਚਲਾ ਕੇ ਰੋਜ਼ੀ-ਰੋਟੀ ਕਮਾਉਣ ਵਾਲੇ ਹਜ਼ਾਰਾਂ ਭਾਰਤੀਆਂ 'ਤੇ ਸੰਕਟ ਦੇ ਬਾਦਲ ਛਾ ਗਏ ਹਨ।
ਡਰਾਈਵਿੰਗ ਲਾਈਸੈਂਸ ਰੱਦ ਹੋਣ ਨਾਲ ਬਹੁਤ ਸਾਰੇ ਭਾਰਤੀਆਂ ਨੂੰ ਡਰਾਈਵਰੀ ਦਾ ਕੰਮ ਛੱਡਣਾ ਪੈ ਗਿਆ ਹੈ। ਦਰਅਸਲ, ਪਹਿਲਾਂ ਭਾਰਤ ਤੋਂ ਆਸਟ੍ਰੇਲੀਆ ਜਾ ਕੇ ਵਾਹਨ ਚਲਾਉਣ ਵਾਲੇ ਲੋਕਾਂ ਨੂੰ ਉੱਥੋਂ ਨਵਾਂ ਲਾਈਸੈਂਸ ਲੈਣ ਦੀ ਬਜਾਏ ਇੱਥੋਂ ਹੀ ਆਪਣੇ ਲਾਈਸੈਂਸ ਦੇ ਨਾਲ-ਨਾਲ ਕੌਮਾਂਤਰੀ ਡਰਾਈਵਿੰਗ ਦਾ ਇਕ ਪ੍ਰਮਾਣ ਪੱਤਰ ਲੈ ਕੇ ਜਾਣਾ ਹੁੰਦਾ ਸੀ। ਇਸੇ ਪ੍ਰਮਾਣ ਪੱਤਰ ਦੇ ਆਧਾਰ 'ਤੇ ਆਸਟ੍ਰੇਲੀਆ 'ਚ ਭਾਰਤੀ ਦੂਤਘਰ ਲਾਈਸੈਂਸ ਨੂੰ ਵੈਰੀਫਾਈ (ਤਸਦੀਕ) ਕਰਦਾ ਸੀ। ਇਸ ਤੋਂ ਬਾਅਦ ਉਨ੍ਹਾਂ ਨੂੰ ਉੱਥੇ ਰੋਡ ਟੈਸਟ ਪਾਸ ਪਾਸ ਕਰਨਾ ਹੁੰਦਾ ਸੀ ਅਤੇ ਫਿਰ ਵਾਹਨ ਚਲਾਉਣ ਦੀ ਇਜਾਜ਼ਤ ਮਿਲ ਜਾਂਦੀ ਸੀ।
ਕੀ ਕਰਨਾ ਹੋਵੇਗਾ ਭਾਰਤੀ ਲਾਈਸੈਂਸ ਧਾਰਕਾਂ ਨੂੰ?
ਹੁਣ ਵਿਕਟੋਰੀਆ 'ਚ ਭਾਰਤੀ ਲਾਈਸੈਂਸ ਧਾਰਕਾਂ ਨੂੰ ਉੱਥੇ ਦੀ ਅਥਾਰਟੀ ਕੋਲੋਂ ਲਾਈਸੈਂਸ ਜਾਰੀ ਕਰਾਉਣਾ ਹੋਵੇਗਾ। ਭਾਰਤੀ ਲਾਈਸੈਂਸ ਧਾਰਕਾਂ ਨੂੰ ਵਿਕਟੋਰੀਆ 'ਚ ਹਦਾਇਤ ਜਾਰੀ ਕਰ ਦਿੱਤੀ ਗਈ ਹੈ ਕਿ ਇੱਥੇ ਵਾਹਨ ਚਲਾਉਣ ਵਾਲਿਆਂ ਨੂੰ ਲਾਈਸੈਂਸ ਵੀ ਇੱਥੇ ਦਾ ਹੀ ਲੈਣਾ ਹੋਵੇਗਾ। ਅਜਿਹੇ ਫੈਸਲੇ ਨਾਲ ਆਸਟ੍ਰੇਲੀਆ 'ਚ ਪਿਜ਼ਾ ਡਲਿਵਰੀ ਦਾ ਕੰਮ ਕਰਨ ਵਾਲੇ ਚਾਲਕ ਵੀ ਪ੍ਰਭਾਵਿਤ ਹੋਏ ਹਨ ਅਤੇ ਉਨ੍ਹਾਂ ਨੂੰ ਨੌਕਰੀ ਛੱਡਣੀ ਪਈ ਹੈ। ਇਸ ਕੰਮ ਨਾਲ ਜੁੜੇ ਇਕ ਵਿਅਕਤੀ ਮੁਤਾਬਿਕ, ਕੁੱਝ ਮਹੀਨੇ ਪਹਿਲਾਂ ਜਦੋਂ ਉਸ ਨੇ ਵਿਕਟੋਰੀਆ ਰੋਡ ਅਥਾਰਟੀ ਕੋਲ ਆਪਣਾ ਲਾਈਸੈਂਸ ਭਾਰਤੀ ਦੂਤਘਰ ਤੋਂ ਤਸਦੀਕ ਕਰਾ ਕੇ ਦਿੱਤਾ ਸੀ ਤਾਂ ਉਨ੍ਹਾਂ ਨੇ ਮੰਨਿਆ ਸੀ ਕਿ ਸਾਰੇ ਦਸਤਾਵੇਜ਼ ਅਸਲੀ ਹਨ ਪਰ ਹੁਣ ਅਥਾਰਟੀ ਨੇ ਕਿਹਾ ਹੈ ਕਿ ਉਹ ਇਸ ਨੂੰ ਬਿਲਕੁਲ ਕਨਫਰਮ ਨਹੀਂ ਕਰ ਸਕਦੇ ਕਿ ਜਿਸ ਭਾਰਤੀ ਲਾਈਸੈਂਸ ਦੀ ਜਾਣਕਾਰੀ ਦਿੱਤੀ ਗਈ ਹੈ ਉਹ ਸਹੀ ਹੈ ਜਾਂ ਨਹੀਂ।