ਪੁਲਿਸ ਕਾਂਸਟੇਬਲ ਸਮੇਤ 18 ਦੀ ਮੌਤ, 25 ਜ਼ਖ਼ਮੀ
ਕਰਾਚੀ, 5 ਅਕਤੂਬਰ: ਪਾਕਿਸਤਾਨ ਦੇ ਅਸ਼ਾਂਤ ਸੂਬੇ ਬਲੋਚਿਸਤਾਨ ਦੀ ਸੂਫ਼ੀ ਦਰਗਾਹ 'ਚ ਇਕ ਫ਼ਿਦਾਈਨ ਹਮਲਾਵਰ ਨੇ ਖ਼ੁਦ ਨੂੰ ਧਮਾਕੇ ਨਾਲ ਉੜਾ ਲਿਆ ਜਿਸ 'ਚ ਇਕ ਪੁਲਿਸ ਕਾਂਸਟੇਬਲ ਸਮੇਤ ਘੱਟ ਤੋਂ ਘੱਟ 18 ਵਿਅਕਤੀਆਂ ਦੀ ਮੌਤ ਹੋ ਗਈ ਅਤੇ 25 ਤੋਂ ਜ਼ਿਆਦਾ ਜ਼ਖ਼ਮੀ ਹੋ ਗਏ। ਧਮਾਕੇ ਵੇਲੇ ਦਰਗਾਹ ਸੈਂਕੜੇ ਜ਼ਾਇਰੀਨ ਨਾਲ ਭਰੀ ਸੀ।ਬਲੋਚਿਸਤਾਨ ਦੇ ਝੱਲ ਮਗਸੀ ਜ਼ਿਲ੍ਹੇ ਦੇ ਗੰਧਾਵਾ ਇਲਾਕੇ 'ਚ ਸਥਿਤ ਦਰਗਾਹ ਫ਼ਤਹਿਪੁਰ 'ਚ ਫ਼ਿਦਾਈਨ ਨੇ ਵੜਨ ਦੀ ਕੋਸ਼ਿਸ਼ ਕੀਤੀ ਅਤੇ ਜਦੋਂ ਪੁਲਿਸ ਨੇ ਉਸ ਨੂੰ ਰੋਕਿਆ ਤਾਂ ਉਸ ਨੇ ਖ਼ੁਦ ਨੂੰ ਉੜਾ ਲਿਆ। ਮ੍ਰਿਤਕਾਂ ਦੀ ਗਿਣਤੀ ਦੀ ਪੁਸ਼ਟੀ ਕਰਦਿਆ ਡਿਪਟੀ ਕਮਿਸ਼ਨਰ ਅਸਾਦੁੱਲਾ ਕੱਕੜ ਨੇ ਕਿਹਾ ਕਿ ਪੁਲਿਸ ਨੇ ਖ਼ੁਦਕੁਸ਼ ਹਮਲਾਵਰ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਸੀ ਜਿਸ ਤੋਂ ਬਾਅਦ ਉਸ ਨੇ ਖ਼ੁਦ ਨੂੰ ਉੜਾ ਲਿਆ। ਦੋ ਹੋਰ ਪੁਲਿਸ ਵਾਲੇ ਵੀ ਧਮਾਕੇ 'ਚ ਜ਼ਖ਼ਮੀ ਹੋ ਗਏ।