ਸ਼ਾਹਬਾਦ ਡੇਅਰੀ ਕਤਲ ਕਾਂਡ : ਸਾਹਿਲ ਦੀ ਹਿਰਾਸਤ ਤਿੰਨ ਦਿਨ ਵਧਾਈ
ਵਾਰਦਾਤ ’ਚ ਪ੍ਰਯੋਗ ਕੀਤਾ ਹਥਿਆਰ ਬਰਾਮਦ ਨਹੀਂ ਕੀਤਾ ਜਾ ਸਕਿਆ
ਨਵੀਂ ਦਿੱਲੀ, 1 ਜੂਨ: ਦਿੱਲੀ ਦੀ ਇੱਕ ਅਦਾਲਤ ਨੇ ਸ਼ਾਹਬਾਦ ਡੇਅਰੀ ਇਲਾਕੇ ’ਚ ਇੱਕ ਨਾਬਾਲਗ ਕੁੜੀ ਦੇ ਬੇਰਹਿਮੀ ਨਾਲ ਕੀਤੇ ਕਤਲ ਦੇ ਮਾਮਲੇ ’ਚ ਮੁਲਜ਼ਮ ਨੌਜੁਆਨ ਦੀ ਹਿਰਾਸਤ ਦਾ ਸਮਾਂ ਵੀਰਵਾਰ ਨੂੰ ਤਿੰਨ ਦਿਨ ਲਈ ਵਧਾ ਦਿਤਾ।
ਅਦਾਲਤ ਨੇ ਸੂਤਰਾਂ ਦੇ ਹਵਾਲੇ ਨੇ ਦਸਿਆ ਕਿ ਸੁਰਖਿਆ ਕਾਰਨਾਂ ਕਰਕੇ ਮੁਲਜ਼ਮ ਸਾਹਿਲ (20) ਨੂੰ ਡਿਊਟੀ ਮੈਟਰੋਪਾਲੀਟਨ ਮੈਜਿਸਟ੍ਰੇਟ ਦੀ ਰਿਹਾਇਸ਼ ’ਤੇ ਪੇਸ਼ ਕੀਤਾ ਗਿਆ।
ਸਾਹਿਲ ਨੇ ਪਿਛਲੇ ਐਤਵਾਰ ਦੀ ਸ਼ਾਮ ਨੂੰ ਉੱਤਰ-ਪੱਛਮੀ ਦਿੱਲੀ ਦੇ ਸ਼ਾਹਬਾਦ ਡੇਅਰੀ ਇਲਾਕੇ ’ਚ 16 ਵਰਿ੍ਹਆਂ ਦੀ ਸਾਕਸ਼ੀ ’ਤੇ 20 ਤੋਂ ਵੱਧ ਵਾਰੀ ਚਾਕੂ ਦੇ ਵਾਰ ਕੀਤੇ ਸਨ ਅਤੇ ਫਿਰ ਫਿਰ ਪੱਥਰ ਮਾਰ ਕੇ ਉਸ ਦਾ ਕਤਲ ਕਰ ਦਿਤਾ ਸੀ। ਇਸ ਦੌਰਾਨ ਕੋਲੋਂ ਲੰਘ ਰਹੇ ਰਾਹਗੀਰ ਤਮਾਸ਼ਬੀਨ ਬਣੇ ਰਹੇ। ਪੁਲਿਸ ਮੁਤਾਬਕ ਸਾਕਸ਼ੀ ਦੇ ਸਰੀਰ ’ਤੇ ਜ਼ਖ਼ਮਾਂ ਦੇ 34 ਨਿਸ਼ਾਨ ਸਨ ਅਤੇ ਉਸ ਦੀ ਖੋਪੜੀ ਵੀ ਟੁੱਟ ਗਈ ਸੀ।
ਸਾਹਿਲ ਨੂੰ ਸੋਮਵਾਰ ਨੂੰ ਉੱਤਰ ਪ੍ਰਦੇਸ਼ ਦੇ ਬੁਲੰਦਸ਼ਹਿਰ ’ਚ ਉਸ ਦੀ ਭੂਆ ਦੇ ਘਰ ਤੋਂ ਗਿ੍ਰਫ਼ਤਾਰ ਕਰ ਕੇ ਦਿੱਲੀ ਲਿਆਂਦਾ ਗਿਆ ਸੀ। ਡਿਊਟੀ ਮੈਟ੍ਰੋਪਾਲੀਟਨ ਮੈਜਿਸਟ੍ਰੇਟ ਜਯੋਤੀ ਨਯਨ ਨੇ ਮੰਗਲਵਾਰ ਨੂੰ ਪੁਲਿਸ ਨੂੰ ਸਾਹਿਲ ਨੂੰ ਦੋ ਦਿਨਾਂ ਤਕ ਹਿਰਾਸਤ ’ਚ ਲੈ ਕੇ ਪੁੱਛ-ਪੜਤਾਲ ਕਰਨ ਦੀ ਇਜਾਜ਼ਤ ਦਿਤੀ ਸੀ।
ਪੁਲਿਸ ਨੇ ਇਸ ਆਧਾਰ ’ਤੇ ਸਾਹਿਲ ਦੀ ਹਿਰਾਸਤ ਮੰਗੀ ਸੀ ਕਿ ਵਾਰਦਾਤ ’ਚ ਪ੍ਰਯੋਗ ਕੀਤਾ ਹਥਿਆਰ ਬਰਾਮਦ ਨਹੀਂ ਕੀਤਾ ਜਾ ਸਕਿਆ ਹੈ ਅਤੇ ਮੁਲਜ਼ਮ ਵਾਰ-ਵਾਰ ਆਪਣਾ ਬਿਆਨ ਬਦਲ ਰਿਹਾ ਹੈ।