'ਮੇਰਾ ਦਿਮਾਗ ਹੀ ਮੇਰਾ ਦੁਸ਼ਮਣ' ਖ਼ੁਦਕੁਸ਼ੀ ਤੋਂ ਪਹਿਲਾਂ ਨਿਊਜ਼ ਐਂਕਰ ਨੇ ਕੀਤਾ ਪ੍ਰਗਟਾਵਾ 

ਨਵੀਂ ਦਿੱਲੀ : ਹੈਦਰਾਬਾਦ ਵਿਚ ਵੀ-6 ਨਾਮ ਦੇ ਤੇਲਗੂ ਨਿਊਜ਼ ਚੈਨਲ ਵਿਚ ਬਤੌਰ ਐਂਕਰ ਕੰਮ ਕਰਨ ਵਾਲੀ ਵੀ. ਰਾਧਿਕਾ ਰੈੱਡੀ ਦੀ ਮੌਤ ਦੀ ਖ਼ਬਰ ਸਾਹਮਣੇ ਆਈ ਹੈ। ਦਸਿਆ ਜਾ ਰਿਹਾ ਹੈ ਕਿ ਉਸ ਨੇ ਉਸ ਇਮਾਰਤ ਤੋਂ ਛਾਲ ਮਾਰ ਕੇ ਖ਼ੁਦਕੁਸ਼ੀ ਕਰ ਲਈ ਜਿਸ ਵਿਚ ਉਹ ਰਹਿ ਰਹੀ ਸੀ। ਰਾਧਿਕਾ ਦੇ ਬੈਗ ਵਿਚੋਂ ਇਕ ਖ਼ੁਦਕੁਸ਼ੀ ਪੱਤਰ ਵੀ ਮਿਲਿਆ ਜਿਸ ਵਿਚ ਲਿਖਿਆ ਹੈ ਕਿ ਮੇਰਾ ਦਿਮਾਗ ਹੀ ਮੇਰਾ ਦੁਸ਼ਮਣ ਹੈ। ਦੂਜੇ ਪਾਸੇ ਹੈਦਰਾਬਾਦ ਪੁਲਿਸ ਦਾ ਕਹਿਣਾ ਹੈ ਕਿ ਟੀਵੀ ਐਂਕਰ ਡਿਪ੍ਰੇਸ਼ਨ ਦਾ ਸ਼ਿਕਾਰ ਸੀ। ਫ਼ਿਲਹਾਲ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।  

ਪੁਲਿਸ ਮੁਤਾਬਕ ਰਾਧਿਕਾ ਦਫ਼ਤਰ ਵਿਚੋਂ ਕੰਮ ਖ਼ਤਮ ਕਰ ਕੇ ਜਿਵੇਂ ਹੀ ਘਰ ਵਾਪਸ ਆਈ ਸੀ ਤਾਂ ਉਹ ਸਿੱਧੀ ਇਮਾਰਤ ਦੀ ਪੰਜਵੀਂ ਮੰਜ਼ਿਲ 'ਤੇ ਚੜ੍ਹ ਗਈ ਤੇ ਉਸ ਨੇ ਉੱਥੋਂ ਛਾਲ ਮਾਰ ਦਿਤੀ। ਰਾਧਿਕਾ ਦੇ ਪਿਤਾ ਨੇ ਮੀਡੀਆ ਨਾਲ ਗੱਲਬਾਤ ਦੌਰਾਨ ਦਸਿਆ ਕਿ ਉਹ ਅਪਣੀ ਧੀ ਦਾ ਇੰਤਜ਼ਾਰ ਕਰ ਰਹੇ ਸਨ। ਰਾਤ ਨੂੰ ਕਰੀਬ 10.30 ਵਜੇ ਇਕ ਅਾਵਾਜ਼ ਸੁਣੀ ਜਿਸ ਤੋਂ ਬਾਅਦ ਉਨ੍ਹਾਂ ਬਾਹਰ ਜਾ ਕੇ ਦੇਖਿਆ ਤਾਂ ਰਾਧਿਕਾ ਖੂਨ ਨਾਲ ਲੱਥਪੱਥ ਧਰਤੀ 'ਤੇ ਪਈ ਸੀ। 

 ਪੁਲਿਸ  ਇਸ ਥਿਉਰੀ ਤੇ ਵੀ ਕੰਮ ਕਰ ਰਹੀ ਹੈ ਕਿ ਸ਼ਾਇਦ ਐਂਕਰ ਇਸ ਕਰ ਕੇ ਵੀ ਡਿਪਰੈਸ਼ਨ ਵਿਚ ਸੀ ਕਿਉਕਿ ਉਸ ਨੇ ਛੇ ਮਹੀਨੇ ਪਹਿਲਾਂ ਅਪਣੇ ਪਤੀ ਤੋਂ ਤਲਾਕ ਲਿਆ ਸੀ ਉਹ ਹੁਣ ਅਪਣੇ ਮਾਤਾ-ਪਿਤਾ ਨਾਲ ਇਥੇ ਰਹਿ ਰਹੀ ਸੀ। ਦਸਣਯੋਗ ਹੈ ਕਿ ਰਾਧਿਕਾ ਦਾ 14 ਸਾਲ ਦਾ ਇਕ ਬੇਟਾ ਵੀ ਹੈ ਜਿਸ ਦੀ ਵੀ ਦਿਮਾਗੀ ਹਾਲਤ ਠੀਕ ਨਹੀਂ ਦਸੀ ਜਾ ਰਹੀ ਹੈ।