ਰਿਲਾਇੰਸ ਇੰਡਸਟਰੀਜ਼ ਨੇ ਫਿਊਚਰ ਗਰੁੱਪ ਦੇ ਸਟੋਰਾਂ ਦੀ ਸੰਭਾਲੀ ਕਮਾਨ, 30 ਹਜ਼ਾਰ ਕਰਮਚਾਰੀਆਂ ਨੂੰ ਮੁੜ ਨੌਕਰੀ ਦੀ ਕੀਤੀ ਪੇਸ਼ਕਸ਼ 

Reliance Industries Takes over Future Group

 

ਨਵੀਂ ਦਿੱਲੀ -  ਰਿਲਾਇੰਸ ਇੰਡਸਟਰੀਜ਼ ਲਿਮਿਟੇਡ (RIL) ਨੇ ਫਿਊਚਰ ਗਰੁੱਪ ਦੇ ਰਿਟੇਲ ਸਟੋਰਾਂ ਦੀ ਵਾਗਡੋਰ ਸੰਭਾਲਣ 'ਤੇ ਹਜ਼ਾਰਾਂ ਕਰਮਚਾਰੀਆਂ ਅਤੇ ਵਿਕਰੇਤਾਵਾਂ ਨੇ ਸੁੱਖ ਦਾ ਸਾਹ ਲਿਆ ਹੈ। ਰਿਲਾਇੰਸ ਹੁਣ ਇਨ੍ਹਾਂ ਸਟੋਰਾਂ ਨੂੰ ਰੀਬ੍ਰਾਂਡ ਕਰ ਰਿਹਾ ਹੈ, ਵਿਕਰੇਤਾਵਾਂ ਅਤੇ ਕਰਮਚਾਰੀਆਂ ਨੂੰ ਚੰਗੇ ਭਵਿੱਖ ਦੀ ਉਮੀਦ ਹੋਣੀ ਸੁਰੂ ਹੋ ਗਈ ਹੈ। ਰਿਲਾਇੰਸ ਨੇ ਇਨ੍ਹਾਂ ਸਟੋਰਾਂ ਦਾ ਸੰਚਾਲਨ ਚਾਰਜ ਲੈਣਾ ਸ਼ੁਰੂ ਕਰ ਦਿੱਤਾ ਹੈ।

ਰਿਲਾਇੰਸ ਇੰਡਸਟਰੀਜ਼ (ਰਿਲਾਇੰਸ ਇੰਡਸਟਰੀਜ਼ ਲਿਮਿਟੇਡ) ਨੇ ਸਟੋਰਾਂ ਦੇ ਸ਼ੁਰੂ ਹੁੰਦੇ ਹੀ ਪਹਿਲਾਂ ਤੋਂ ਕੰਮ ਕਰ ਰਹੇ 30 ਹਜ਼ਾਰ ਕਰਮਚਾਰੀਆਂ ਨੂੰ ਮੁੜ-ਨੌਕਰੀਆਂ ਦੀ ਪੇਸ਼ਕਸ਼ ਕੀਤੀ ਸੀ। ਇਨ੍ਹਾਂ ਮੁਲਾਜ਼ਮਾਂ ਦਾ ਕਹਿਣਾ ਹੈ ਕਿ ਹੁਣ ਉਨ੍ਹਾਂ ਦੇ ਭਵਿੱਖ ਨੂੰ ਲੈ ਕੇ ਉਨ੍ਹਾਂ ਅੰਦਰ ਪੈਦਾ ਹੋਇਆ ਡਰ ਖ਼ਤਮ ਹੋ ਰਿਹਾ ਹੈ। ਪਿਛਲੇ ਕਈ ਮਹੀਨੇ ਬਹੁਤ ਅਨਿਸ਼ਚਿਤਤਾ ਵਿਚ ਗੁਜ਼ਾਰੇ ਸਨ ਪਰ ਹੁਣ ਤਨਖਾਹ ਵੀ ਸਮੇਂ ਸਿਰ ਮਿਲੇਗੀ ਅਤੇ ਨੌਕਰੀ ਖੁੱਸਣ ਦਾ ਖਤਰਾ ਨਹੀਂ ਰਹੇਗਾ। 

ਫਿਊਚਰ ਗਰੁੱਪ ਦੇ ਕਈ ਸਟੋਰ ਲੀਜ਼ 'ਤੇ ਚੱਲ ਰਹੇ ਹਨ। ਲਗਾਤਾਰ ਘਾਟੇ ਕਾਰਨ ਉਸ ਕੋਲ ਸਟੋਰ ਦਾ ਕਿਰਾਇਆ ਦੇਣ ਲਈ ਨਾ ਤਾਂ ਕਾਰਜਕਾਰੀ ਪੂੰਜੀ ਬਚੀ ਸੀ ਅਤੇ ਨਾ ਹੀ ਪੈਸੇ ਸਨ। ਰਿਲਾਇੰਸ ਦੇ ਟੇਕਓਵਰ ਤੋਂ ਬਾਅਦ ਅਜਿਹੀਆਂ ਮੁਸ਼ਕਿਲਾਂ ਖਤਮ ਹੋ ਗਈਆਂ ਹਨ। ਫਿਊਚਰ ਗਰੁੱਪ ਦੇ ਵਿਕਰੇਤਾਵਾਂ, ਸਪਲਾਇਰਾਂ ਅਤੇ ਮਕਾਨ ਮਾਲਕਾਂ ਤੋਂ ਵੀ ਹੁਣ ਸਮੇਂ ਸਿਰ ਭੁਗਤਾਨ ਕਰਨ ਦੀ ਉਮੀਦ ਕੀਤੀ ਜਾਂਦੀ ਹੈ।

ਅੰਬੈਸਟਨ ਮਾਰਕੀਟਿੰਗ ਸਲਿਊਸ਼ਨਜ਼ ਦੇ ਮੈਨੇਜਿੰਗ ਪਾਰਟਨਰ ਸ਼ੰਮੀ ਠਾਕੁਰ ਦਾ ਕਹਿਣਾ ਹੈ ਕਿ ਰਿਲਾਇੰਸ ਦੇ ਆਉਣ ਨਾਲ ਸਾਰਿਆਂ ਨੂੰ ਫਾਇਦਾ ਹੋਵੇਗਾ। ਰਿਲਾਇੰਸ ਕਾਰਪੋਰੇਟ ਜਗਤ ਦਾ ਇੱਕ ਵੱਡਾ ਸਮੂਹ ਹੈ ਅਤੇ ਇਹ ਵਿਕਰੇਤਾਵਾਂ ਦੇ ਨਾਲ-ਨਾਲ ਸਪਲਾਇਰਾਂ ਵਿਚ ਵਿਸ਼ਵਾਸ ਪੈਦਾ ਕਰੇਗਾ। ਜੇਕਰ ਸਟੋਰਾਂ ਨੂੰ ਹੋਰ ਆਰਡਰ ਮਿਲਣਗੇ ਤਾਂ ਕਾਰੋਬਾਰ ਦੇ ਨਵੇਂ ਮੌਕੇ ਵੀ ਆਉਣਗੇ। ਮੁਲਾਜ਼ਮਾਂ ਨੂੰ ਅੱਧੀ ਤਨਖ਼ਾਹ ਵੀ ਮਿਲਦੀ ਸੀ ਤੇ ਕਈ ਵਾਰ ਇਹ ਬਕਾਇਆ ਰਹਿੰਦਾ ਸੀ। ਹੁਣ ਇਸ ਤੋਂ ਵੀ ਛੁਟਕਾਰਾ ਮਿਲ ਜਾਵੇਗਾ।

ਸ਼ੰਮੀ ਠਾਕੁਰ ਦਾ ਕਹਿਣਾ ਹੈ ਕਿ ਸਟੋਰਾਂ ਨਾਲ ਸਬੰਧਤ ਕਈ ਅਦਾਇਗੀਆਂ 7 ਸਾਲਾਂ ਤੋਂ ਪੈਂਡਿੰਗ ਹਨ। ਸਟੋਰਾਂ ਦੇ ਮਕਾਨ ਮਾਲਕ ਨੂੰ ਲੀਜ਼ ਵੀ ਇੱਕ ਸਾਲ ਤੱਕ ਅਦਾ ਨਹੀਂ ਕੀਤੀ ਗਈ। ਰਿਲਾਇੰਸ ਨਾਲ ਗੱਲਬਾਤ ਤੋਂ ਬਾਅਦ ਉਨ੍ਹਾਂ ਦੇ ਪੁਰਾਣੇ ਬਕਾਏ ਕਲੀਅਰ ਕਰ ਦਿੱਤੇ ਗਏ ਹਨ।