India-US trade News: ਨੀਤੀ ਆਯੋਗ ਨੇ ਭਾਰਤ-ਅਮਰੀਕਾ ਵਪਾਰ ’ਚ ‘ਦੋਹਰੀ ਪਹੁੰਚ’ ਦਾ ਸੁਝਾਅ ਦਿਤਾ
ਗੈਰ-ਸੰਵੇਦਨਸ਼ੀਲ ਖੇਤੀਬਾੜੀ ਜਿਣਸਾਂ ਦੇ ਆਯਾਤ ’ਤੇ ਉੱਚ ਟੈਰਿਫ ਨੂੰ ਚੁਣਨ ਲਈ ਕਿਹਾ
ਨਵੀਂ ਦਿੱਲੀ : ਨੀਤੀ ਆਯੋਗ ਦੇ ਇਕ ਦਸਤਾਵੇਜ਼ ’ਚ ਕਿਹਾ ਗਿਆ ਹੈ ਕਿ ਅਮਰੀਕਾ ਵਲੋਂ ‘ਆਪਸੀ ਟੈਰਿਫ’ ਤੋਂ ਬਾਅਦ ਭਾਰਤ ਨੂੰ ਦੋਹਰੀ ਪਹੁੰਚ ਅਪਣਾਉਣੀ ਚਾਹੀਦੀ ਹੈ ਅਤੇ ਵਾਸ਼ਿੰਗਟਨ ਤੋਂ ਗੈਰ-ਸੰਵੇਦਨਸ਼ੀਲ ਖੇਤੀਬਾੜੀ ਜਿਣਸਾਂ ਦੀ ਆਯਾਤ ’ਤੇ ਉੱਚ ਟੈਰਿਫ ਨੂੰ ਚੁਣਨਾ ਚਾਹੀਦਾ ਹੈ।
ਆਯੋਗ ਨੇ ‘ਨਵੀਂ ਅਮਰੀਕੀ ਵਪਾਰ ਪ੍ਰਣਾਲੀ ਦੇ ਤਹਿਤ ਭਾਰਤ-ਅਮਰੀਕਾ ਖੇਤੀਬਾੜੀ ਵਪਾਰ ਨੂੰ ਉਤਸ਼ਾਹਿਤ ਕਰਨਾ’ ਸਿਰਲੇਖ ਵਾਲੇ ਇਕ ਦਸਤਾਵੇਜ਼ ਵਿਚ ਕਿਹਾ ਕਿ ਭਾਰਤ ਦੇ ਖੇਤੀਬਾੜੀ ਖੇਤਰ ਨੂੰ ਸੁਰੱਖਿਆ ਉਪਾਵਾਂ ਦੀ ਜ਼ਰੂਰਤ ਹੈ, ਤਾਂ ਜੋ ਉਤਪਾਦਕਾਂ ਅਤੇ ਖਪਤਕਾਰਾਂ ਦੋਹਾਂ ਲਈ ਕੀਮਤਾਂ ਦੀ ਸਥਿਰਤਾ ਨੂੰ ਯਕੀਨੀ ਬਣਾਇਆ ਜਾ ਸਕੇ।
ਦਸਤਾਵੇਜ਼ ’ਚ ਕਿਹਾ ਗਿਆ ਹੈ, ‘‘ਹੁਣ ਦੋਹਰੀ ਪਹੁੰਚ ਜ਼ਰੂਰੀ ਹੈ। ਥੋੜ੍ਹੇ ਸਮੇਂ ਲਈ ਭਾਰਤ ਨੂੰ ਗੈਰ-ਸੰਵੇਦਨਸ਼ੀਲ ਆਯਾਤ ’ਤੇ ਉੱਚ ਟੈਰਿਫ ਘਟਾਉਣ ਅਤੇ ਪੋਲਟਰੀ ਵਰਗੇ ਕਮਜ਼ੋਰ ਵਰਗਾਂ ’ਤੇ ਗੈਰ-ਟੈਰਿਫ ਸੁਰੱਖਿਆ ਉਪਾਵਾਂ ’ਤੇ ਗੱਲਬਾਤ ਕਰਨ ’ਤੇ ਵਿਚਾਰ ਕਰਨਾ ਚਾਹੀਦਾ ਹੈ।’’
ਰੀਪੋਰਟ ’ਚ ਕਿਹਾ ਗਿਆ ਹੈ ਕਿ ਜਨਵਰੀ 2025 ’ਚ ਡੋਨਾਲਡ ਟਰੰਪ ਦੇ ਦੁਬਾਰਾ ਰਾਸ਼ਟਰਪਤੀ ਚੁਣੇ ਜਾਣ ਤੋਂ ਬਾਅਦ ਅਮਰੀਕੀ ਨਿਰਯਾਤ ’ਤੇ ਅਚਾਨਕ ਟੈਰਿਫ ਲਗਾਉਣ ਅਤੇ ਬਾਜ਼ਾਰ ਪਹੁੰਚ ਵਧਾਉਣ ਨਾਲ ਪੂਰੀ ਦੁਨੀਆਂ ’ਚ ਖਾਸ ਤੌਰ ’ਤੇ ਅਮਰੀਕਾ ਦੇ ਵਪਾਰਕ ਭਾਈਵਾਲਾਂ ’ਚ ਹੈਰਾਨੀ ਦੀ ਲਹਿਰ ਹੈ।
ਦਸਤਾਵੇਜ਼ ਨੇ ਸੁਝਾਅ ਦਿਤਾ ਕਿ ਭਾਰਤ ਰਣਨੀਤਕ ਤੌਰ ’ਤੇ ਉਨ੍ਹਾਂ ਰਿਆਇਤਾਂ ਦੀ ਪੇਸ਼ਕਸ਼ ਵੀ ਕਰ ਸਕਦਾ ਹੈ ਜਿੱਥੇ ਘਰੇਲੂ ਸਪਲਾਈ ਦਾ ਫ਼ਰਕ ਮੌਜੂਦ ਹੈ, ਜਿਵੇਂ ਕਿ ਖਾਣ ਵਾਲੇ ਤੇਲ ਅਤੇ ਸੁੱਕੇ ਮੇਵੇ।
ਦਸਤਾਵੇਜ਼ ’ਚ ਇਹ ਵੀ ਸੁਝਾਅ ਦਿਤਾ ਗਿਆ ਕਿ ਭਾਰਤ ਨੂੰ ਝੀਂਗਾ, ਮੱਛੀ, ਮਸਾਲੇ, ਚਾਵਲ, ਚਾਹ, ਕੌਫੀ, ਰਬੜ ਵਰਗੇ ਉੱਚ ਪ੍ਰਦਰਸ਼ਨ ਵਾਲੇ ਨਿਰਯਾਤ ਲਈ ਅਮਰੀਕੀ ਬਾਜ਼ਾਰ ਤਕ ਵਧੇਰੇ ਪਹੁੰਚ ਲਈ ਗੱਲਬਾਤ ਕਰਨੀ ਚਾਹੀਦੀ ਹੈ। ਭਾਰਤ ਅਮਰੀਕਾ ਨੂੰ ਖੇਤੀਬਾੜੀ ਨਿਰਯਾਤ ਤੋਂ ਸਾਲਾਨਾ ਲਗਭਗ 5.75 ਅਰਬ ਡਾਲਰ ਦੀ ਕਮਾਈ ਕਰਦਾ ਹੈ। ਡਿਊਟੀ ਮੁਆਫੀ ਜਾਂ ਟੀ.ਆਰ.ਕਿਊ. ਜ਼ਰੀਏ ਇਸ ਦਾ ਵਿਸਥਾਰ ਕਰਨਾ ਵਪਾਰ ਗੱਲਬਾਤ ਦਾ ਹਿੱਸਾ ਹੋਣਾ ਚਾਹੀਦਾ ਹੈ।