ਵਿਦਿਆਰਥੀਆਂ ਲਈ ‘ਨਮਕ ਰੋਟੀ’ : ਖ਼ਬਰ ਛਾਪਣ ਵਾਲੇ ਪੱਤਰਕਾਰ ਵਿਰੁਧ FIR ਦਰਜ
ਯੋਗੀ ਅਦਿਤਿਆਨਾਥ ਸਰਕਾਰ ਦਾ ਅਕਸ ਖ਼ਰਾਬ ਕਰਨ ਦਾ ਦੋਸ਼
ਲਖਨਊ : ਸਕੂਲ ਵਿਚ ਵਿਦਿਆਰਥੀਆਂ ਨੂੰ ਦਿਤੇ ਜਾਂਦੇ ਖਾਣੇ ਵਿਚ ‘ਨਮਕ ਰੋਟੀ’ ਖਵਾਏ ਜਾਣ ਦੀ ਖ਼ਬਰ ਛਾਪਣ ਵਾਲੇ ਪੱਤਰਕਾਰ ਅਤੇ ਗ੍ਰਾਮ ਪ੍ਰਧਾਨ ਵਿਰੁਧ ਸਰਕਾਰ ਦਾ ਅਕਸ ਖ਼ਰਾਬ ਕਰਨ ਦੇ ਦੋਸ਼ ਹੇਠ ਪਰਚਾ ਦਰਜ ਕੀਤਾ ਗਿਆ ਹੈ। ਘਟਨਾ ਯੂਪੀ ਦੇ ਮਿਰਜ਼ਾਪੁਰ ਦੀ ਹੈ। ਪੱਤਰਕਾਰ ਨੇ ਪਿਛਲੇ ਦਿਨੀਂ ਪ੍ਰਾਇਮਰੀ ਸਕੂਲ ਵਿਚ ਵਿਦਿਆਰਥੀਆਂ ਨੂੰ ਨਮਕ ਰੋਟੀ ਖਵਾਏ ਜਾਣ ਦੀ ਖ਼ਬਰ ਲਾਈ ਸੀ। ਮੁਲਜ਼ਮ ਪੱਤਰਕਾਰ ਨੇ ਅਪਣੇ ਵਿਰੁਧ ਲੱਗੇ ਦੋਸ਼ਾਂ ਨੂੰ ਗ਼ਲਤ ਦਸਦਿਆਂ ਕਿਹਾ ਕਿ ਖ਼ਬਰ ਵਿਚ ਕੁੱਝ ਵੀ ਝੂਠਾ ਨਹੀਂ ਸੀ ਅਤੇ ਉਸ ਵਿਰੁਧ ਪਰਚਾ ਪੱਤਰਕਾਰੀ ’ਤੇ ਹਮਲਾ ਹੈ। ਰਾਜ ਦੇ ਮੁਢਲੀ ਸਿਖਿਆ ਮੰਤਰੀ ਸਤੀਸ਼ ਦਿਵੇਦੀ ਨੇ ਕਿਹਾ ਕਿ ਸਿਰਫ਼ ਭਿ੍ਰਸ਼ਟਾਚਾਰ ਜਾਂ ਤੱਥ ਉਜਾਗਰ ਕਰਨ ਕਰਕੇ ਪੱਤਰਕਾਰ ’ਤੇ ਕਾਰਵਾਈ ਨਹੀਂ ਹੋਣੀ ਚਾਹੀਦੀ।
ਜੇ ਅਜਿਹਾ ਹੋਇਆ ਹੈ ਤਾਂ ਉਹ ਇਸ ਮਾਮਲੇ ਨੂੰ ਵੇਖਣਗੇ। ਪੁਲਿਸ ਵਿਭਾਗ ਦੇ ਸੀਨੀਅਰ ਅਧਿਕਾਰੀ ਨੇ ਦਸਿਆ ਕਿ ਹਿੰਦੀ ਅਖ਼ਬਾਰ ਦੇ ਸਥਾਨਕ ਪੱਤਰਕਾਰ ਪਵਨ ਕੁਮਾਰ ਜਾਇਸਵਾਲ, ਸਿਊਰ ਪਿੰਡ ਦੇ ਸਰਪੰਚ ਰਾਜਕੁਮਾਰ ਅਤੇ ਹੋਰਾਂ ਵਿਰੁਧ ਸਾਜ਼ਸ਼ ਰਚਣ, ਸਰਕਾਰੀ ਕੰਮ ਵਿਚ ਅੜਿੱਕਾ ਪਾਉਣ, ਝੂਠੀ ਖ਼ਬਰ ਲਾਉਣ ਅਤੇ ਸਰਕਾਰ ਦਾ ਅਕਸ ਖ਼ਰਾਬ ਕਰਨ ਦੇ ਦੋਸ਼ਾਂ ਹੇਠ ਪਰਚਾ ਦਰਜ ਕੀਤਾ ਗਿਆ ਹੈ। ਪਰਚਾ ਬੀਤੀ 31 ਅਗੱਸਤ ਨੂੰ ਜ਼ਿਲ੍ਹਾ ਸਿਖਿਆ ਅਧਿਕਾਰੀ ਦੀ ਸ਼ਿਕਾਇਤ ’ਤੇ ਦਰਜ ਕੀਤਾ ਗਿਆ ਸੀ।
ਦੋਸ਼ ਲਾਇਆ ਗਿਆ ਹੈ ਕਿ ਪੱਤਰਕਾਰ ਨੇ ਸਾਜ਼ਸ਼ ਤਹਿਤ ਸਕੂਲ ਵਿਚ ਵੀਡੀਉ ਤਿਆਰ ਕੀਤੀ ਤਾਕਿ ਸਰਕਾਰ ਨੂੰ ਬਦਨਾਮ ਕੀਤਾ ਜਾ ਸਕੇ। ਉਧਰ, ਮੰਤਰੀ ਨੇ ਕਿਹਾ ਕਿ ਉਹ ਵੇਖਣਗੇ ਕਿ ਅਸਲੀ ਮਾਮਲਾ ਕੀ ਹੈ। ਪੱਤਰਕਾਰ ਨੇ ਕਿਹਾ ਕਿ ਉਹ ਦਿੱਲੀ ਦੇ ਅਖ਼ਬਾਰ ਦਾ ਪੱਤਰਕਾਰ ਹੈ। ਉਸ ਨੂੰ ਸਕੂਲ ਵਿਚ ਦਿਤੇ ਜਾਂਦੇ ਮਿੱਡ ਡੇਅ ਮੀਲ ਵਿਚ ਕਈ ਖ਼ਾਮੀਆਂ ਦੀ ਸੂਚਨਾ ਮਿਲੀ ਸੀ। ਇਹ ਵੀ ਪਤਾ ਲੱਗਾ ਸੀ ਕਿ ਸਕੂਲ ਵਿਚ ਬੱਚਿਆਂ ਨੂੰ ਕਦੇ ਕਦੇ ‘ਨਮਕ ਰੋਟੀ ਜਾਂ ਨਮਕ ਚਾਵਲ’ ਦਿਤੇ ਜਾਂਦੇ ਹਨ। ਵੀਡੀਉ ਵਿਚ ਔਰਤ ਬੱਚਿਆਂ ਨੂੰ ਰੋਟੀ ਦੇ ਰਹੀ ਹੈ ਅਤੇ ਇਕ ਵਿਅਕਤੀ ਥਾਲੀ ਵਿਚ ਲੂਣ ਵਰਤਾ ਰਿਹਾ ਹੈ ਜਦਕਿ ਨਿਯਮਾਂ ਮੁਤਾਬਕ ਦਾਲ, ਚਾਵਲ, ਰੋਟੀ, ਸਬਜ਼ੀ, ਫੱਲ ਆਦਿ ਦਿਤੇ ਜਾਣੇ ਚਾਹੀਦੇ ਸਨ।