ਅਫਤਾਬ ਨੇ ਚੀਨੀ ਚਾਪਰ ਨਾਲ ਸ਼ਰਧਾ ਦੇ ਕੀਤੇ ਟੁਕੜੇ: ਨਾਰਕੋ ਟੈਸਟ 'ਚ ਆਫਤਾਬ ਨੇ ਖ਼ੌਫਨਾਕ ਖੁਲਾਸੇ ਕਰਦਿਆਂ ਖੋਲ੍ਹੇ ਕਈ ਰਾਜ਼
ਆਫਤਾਬ ਨੇ ਦੱਸਿਆ ਕਿ ਉਸ ਨੇ ਚਾਈਨੀਜ਼ ਚਾਪਰ ਨਾਲ ਸ਼ਰਧਾ ਦੇ ਸਰੀਰ ਦੇ ਟੁਕੜੇ ਕਰ ਦਿੱਤੇ
ਨਵੀਂ ਦਿੱਲੀ: ਸ਼ਰਧਾ ਕਤਲ ਕਾਂਡ ਦੇ ਦੋਸ਼ੀ ਆਫਤਾਬ ਅਮੀਨ ਪੂਨਾਵਾਲਾ ਦਾ ਸ਼ੁੱਕਰਵਾਰ ਨੂੰ ‘ਪੋਸਟ ਨਾਰਕੋ ਟੈਸਟ ਇੰਟਰਵਿਊ’ ਸੀ। ਇਸ ਵਿੱਚ ਫੋਰੈਂਸਿਕ ਸਾਇੰਸ ਲੈਬ (ਐਫਐਸਐਲ) ਦੀ ਟੀਮ ਨੇ ਆਫਤਾਬ ਤੋਂ 1 ਘੰਟਾ 45 ਮਿੰਟ ਤੱਕ ਪੁੱਛਗਿੱਛ ਕੀਤੀ। ਟੀਮ ਸਵੇਰੇ 11 ਵਜੇ ਤਿਹਾੜ ਜੇਲ੍ਹ ਪਹੁੰਚੀ ਸੀ। ਅੱਜ ਆਫਤਾਬ ਤੋਂ ਅਜਿਹੇ ਸਵਾਲ ਪੁੱਛੇ ਗਏ ਜਿਨ੍ਹਾਂ ਦੇ ਜਵਾਬ ਪੋਲੀਗ੍ਰਾਫ ਅਤੇ ਨਾਰਕੋ ਟੈਸਟ 'ਚ ਵੱਖ-ਵੱਖ ਸਨ।
ਨਾਰਕੋ ਟੈਸਟ ਅਤੇ ਇੰਟਰਵਿਊ ਦੋਵਾਂ 'ਚ ਆਫਤਾਬ ਨੇ ਸ਼ਰਧਾ ਦੀ ਹੱਤਿਆ ਕਰਨ ਦੀ ਗੱਲ ਕਬੂਲ ਕੀਤੀ ਹੈ। ਆਫਤਾਬ ਨੇ ਦੱਸਿਆ ਕਿ ਉਸ ਨੇ ਚਾਈਨੀਜ਼ ਚਾਪਰ ਨਾਲ ਸ਼ਰਧਾ ਦੇ ਸਰੀਰ ਦੇ ਟੁਕੜੇ ਕਰ ਦਿੱਤੇ। ਬਾਅਦ 'ਚ ਉਸ ਨੇ ਚਾਪਰ ਨੂੰ ਗੁਰੂਗ੍ਰਾਮ 'ਚ ਆਪਣੇ ਦਫਤਰ ਨੇੜੇ ਝਾੜੀਆਂ 'ਚ ਸੁੱਟ ਦਿੱਤਾ।
ਆਫਤਾਬ ਨੇ ਦੱਸਿਆ ਕਿ ਉਸ ਨੇ ਹੀ ਸ਼ਰਧਾ ਦਾ ਸਿਰ ਮਹਿਰੌਲੀ ਦੇ ਜੰਗਲਾਂ 'ਚ ਸੁੱਟ ਦਿੱਤਾ ਸੀ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਸ਼ਰਧਾ ਦਾ ਫੋਨ ਮੁੰਬਈ ਦੇ ਸਮੁੰਦਰ 'ਚ ਸੁੱਟ ਦਿੱਤਾ ਸੀ, ਜਿਸ ਨੂੰ ਦਿੱਲੀ ਪੁਲਿਸ ਹੁਣ ਤੱਕ ਬਰਾਮਦ ਨਹੀਂ ਕਰ ਸਕੀ ਹੈ। ਪਹਿਲਾਂ ਨਾਰਕੋ ਟੈਸਟ ਦੀ ਇੰਟਰਵਿਊ ਐਫਐਸਐਲ ਦਫ਼ਤਰ ਵਿੱਚ ਹੋਣੀ ਸੀ, ਪਰ ਆਫਤਾਬ ਦੀ ਸੁਰੱਖਿਆ ਨੂੰ ਦੇਖਦੇ ਹੋਏ ਟੀਮ ਨੇ ਤਿਹਾੜ ਜੇਲ੍ਹ ਵਿੱਚ ਹੀ ਟੈਸਟ ਕਰਵਾਉਣ ਦਾ ਫੈਸਲਾ ਕੀਤਾ।
ਫੋਰੈਂਸਿਕ ਸਾਇੰਸ ਲੈਬ ਦੇ ਅਸਿਸਟੈਂਟ ਡਾਇਰੈਕਟਰ ਸੰਜੀਵ ਗੁਪਤਾ ਮੁਤਾਬਕ ਵੀਰਵਾਰ ਨੂੰ ਕੀਤੇ ਗਏ ਨਾਰਕੋ ਟੈਸਟ 'ਚ ਆਫਤਾਬ ਨੇ ਸ਼ਰਧਾ ਦੀ ਹੱਤਿਆ ਕਰਨ ਦੀ ਗੱਲ ਕਬੂਲੀ ਹੈ। ਉਨ੍ਹਾਂ ਨੇ ਇਹ ਵੀ ਜਾਣਕਾਰੀ ਦਿੱਤੀ ਹੈ ਕਿ ਸ਼ਰਧਾ ਦਾ ਮੋਬਾਈਲ ਅਤੇ ਕੱਪੜੇ ਕਿੱਥੇ ਸੁੱਟੇ ਗਏ ਹਨ।
ਦਿੱਲੀ ਪੁਲਿਸ ਵੀਰਵਾਰ ਨੂੰ ਸਵੇਰੇ 8.40 ਵਜੇ ਆਫਤਾਬ ਨੂੰ ਰੋਹਿਣੀ ਦੇ ਬਾਬਾ ਸਾਹਿਬ ਅੰਬੇਡਕਰ ਹਸਪਤਾਲ ਲੈ ਗਈ ਸੀ, ਜਿੱਥੇ ਟੈਸਟ ਤੋਂ ਪਹਿਲਾਂ ਉਸ ਦਾ ਜਨਰਲ ਚੈਕਅੱਪ ਕੀਤਾ ਗਿਆ। ਅਧਿਕਾਰੀਆਂ ਮੁਤਾਬਕ ਨਾਰਕੋ ਟੈਸਟ ਵੀਰਵਾਰ ਨੂੰ ਸਵੇਰੇ 10 ਵਜੇ ਸ਼ੁਰੂ ਹੋਇਆ ਅਤੇ ਕਰੀਬ ਦੋ ਘੰਟੇ ਬਾਅਦ ਖਤਮ ਹੋਇਆ।
ਹਸਪਤਾਲ ਦੇ ਸੂਤਰਾਂ ਮੁਤਾਬਕ ਆਫਤਾਬ ਨੇ ਟੈਸਟ 'ਚ ਪੁੱਛੇ ਗਏ ਜ਼ਿਆਦਾਤਰ ਸਵਾਲਾਂ ਦੇ ਜਵਾਬ ਅੰਗਰੇਜ਼ੀ 'ਚ ਦਿੱਤੇ।
ਸੰਜੀਵ ਗੁਪਤਾ ਨੇ ਦੱਸਿਆ ਕਿ ਨਾਰਕੋ ਟੈਸਟ ਦੌਰਾਨ ਮਨੋਵਿਗਿਆਨੀ, ਫੋਰੈਂਸਿਕ ਲੈਬ ਰੋਹਿਣੀ ਦੇ ਫੋਟੋ ਮਾਹਿਰ ਅਤੇ ਅੰਬੇਡਕਰ ਹਸਪਤਾਲ ਦੇ ਡਾਕਟਰ ਮੌਜੂਦ ਸਨ। ਇਸ ਤੋਂ ਪਹਿਲਾਂ ਆਫਤਾਬ ਨੇ ਵੀ ਪੋਲੀਗ੍ਰਾਫ ਟੈਸਟ 'ਚ ਸ਼ਰਧਾ ਦੇ ਕਤਲ ਦੀ ਗੱਲ ਕਬੂਲੀ ਸੀ।