ਮਹਾਰਾਸ਼ਟਰ ਕੌਂਸਲ ਪੈਨਲ ਨੇ ਕੁਨਾਲ ਕਾਮਰਾ ਨੂੰ ਸੰਮਨ ਜਾਰੀ ਕੀਤਾ
ਉਪ ਮੁੱਖ ਮੰਤਰੀ ਸ਼ਿੰਦੇ ਵਿਰੁਧ ਟਿਪਣੀਆਂ ਦਾ ਮਾਮਲਾ
ਮੁੰਬਈ : ਮਹਾਰਾਸ਼ਟਰ ਵਿਧਾਨ ਕੌਂਸਲ ਦੀ ਵਿਸ਼ੇਸ਼ ਅਧਿਕਾਰ ਕਮੇਟੀ ਨੇ ਸਟੈਂਡ-ਅਪ ਕਾਮੇਡੀਅਨ ਕੁਨਾਲ ਕਾਮਰਾ ਅਤੇ ਸ਼ਿਵ ਸੈਨਾ-ਯੂ.ਬੀ.ਟੀ. ਨੇਤਾ ਸੁਸ਼ਮਾ ਅੰਧਾਰੇ ਨੂੰ ਉਪ ਮੁੱਖ ਮੰਤਰੀ ਏਕਨਾਥ ਸ਼ਿੰਦੇ ਵਿਰੁਧ ਕਥਿਤ ਅਪਮਾਨਜਨਕ ਟਿਪਣੀਆਂ ਉਤੇ ਸੁਣਵਾਈ ਲਈ ਤਲਬ ਕੀਤਾ ਹੈ।
ਕਾਮਰਾ ਅਤੇ ਅੰਧਾਰੇ ਨੂੰ ਸ਼ੁਰੂ ਵਿਚ 5 ਫ਼ਰਵਰੀ ਨੂੰ ਦੁਪਹਿਰ 2 ਵਜੇ ਪੈਨਲ ਦੇ ਸਾਹਮਣੇ ਪੇਸ਼ ਹੋਣ ਲਈ ਕਿਹਾ ਗਿਆ ਸੀ। ਕਮੇਟੀ ਦੇ ਚੇਅਰਪਰਸਨ ਅਤੇ ਭਾਜਪਾ ਵਿਧਾਇਕ ਪ੍ਰਸਾਦ ਲਾਡ ਨੇ ਦਸਿਆ ਕਿ ਅੰਧਰੇ ਨੇ ਜ਼ਿਲ੍ਹਾ ਪ੍ਰੀਸ਼ਦ ਚੋਣਾਂ ਦੇ ਪ੍ਰਚਾਰ ਕਾਰਨ ਹਾਜ਼ਰ ਨਾ ਹੋਣ ਦੀ ਅਸਮਰੱਥਾ ਜ਼ਾਹਰ ਕਰਨ ਤੋਂ ਬਾਅਦ ਸੁਣਵਾਈ 17 ਫ਼ਰਵਰੀ ਤਕ ਮੁੜ ਤੈਅ ਕਰ ਦਿਤੀ ਹੈ। ਉਨ੍ਹਾਂ ਕਿਹਾ ਕਿ ਇਹ ਨੋਟਿਸ 15 ਦਿਨ ਪਹਿਲਾਂ ਜਾਰੀ ਕੀਤਾ ਗਿਆ ਸੀ।
ਲਾਡ ਨੇ ਕਿਹਾ, ‘‘ਜੇ ਉਹ ਦੋ ਸੰਮਨ ਭੇਜਣ ਤੋਂ ਬਾਅਦ ਆਉਣ ਵਿਚ ਅਸਫਲ ਰਹਿੰਦੇ ਹਨ, ਤਾਂ ਕਮੇਟੀ ਉਨ੍ਹਾਂ ਵਿਰੁਧ ਕਾਰਵਾਈ ਬਾਰੇ ਫੈਸਲਾ ਕਰੇਗੀ।’’ ਭਾਜਪਾ ਦੇ ਵਿਧਾਇਕ ਪ੍ਰਵੀਨ ਦਾਰੇਕਰ ਨੇ ਸ਼ਿਵ ਸੈਨਾ ਨੇਤਾ ਸ਼ਿੰਦੇ ਵਿਰੁਧ ਅਪਮਾਨਜਨਕ ਟਿਪਣੀਆਂ ਕਰਨ ਲਈ ਕਾਮਰਾ ਅਤੇ ਅੰਧਰੇ ਵਿਰੁਧ ਵਿਸ਼ੇਸ਼ ਅਧਿਕਾਰ ਦੀ ਉਲੰਘਣਾ ਦਾ ਨੋਟਿਸ ਦਾਇਰ ਕੀਤਾ ਸੀ।
ਕਾਮਰਾ, ਜੋ ਅਕਸਰ ਅਪਣੇ ਸਥਾਪਤੀ ਵਿਰੋਧੀ ਵਿਚਾਰਾਂ ਲਈ ਵਿਵਾਦਾਂ ਵਿਚ ਘਿਰੇ ਰਹਿੰਦੇ ਹਨ, ਨੇ ਪਿਛਲੇ ਸਾਲ ਇਕ ਗੀਤ ਦੀ ਪੈਰੋਡੀ ਵਿਚ ਸ਼ਿੰਦੇ ਨੂੰ ਨਿਸ਼ਾਨਾ ਬਣਾਇਆ, ਜਿਸ ਵਿਚ ਉਸ ਨੂੰ ਗੱਦਾਰ ਕਿਹਾ ਗਿਆ ਸੀ। ਵਿਰੋਧੀ ਸ਼ਿਵ ਸੈਨਾ-ਯੂ.ਬੀ.ਟੀ. ਦੇ ਨੇਤਾ ਅੰਧਾਰੇ ਨੇ ਕਾਮਰਾ ਦਾ ਸਮਰਥਨ ਕੀਤਾ ਸੀ।
ਸ਼ਿੰਦੇ ਨੇ ਜੂਨ 2022 ਵਿਚ ਊਧਵ ਠਾਕਰੇ ਦੀ ਅਗਵਾਈ ਦੇ ਵਿਰੁਧ ਬਗਾਵਤ ਕੀਤੀ, ਜਿਸ ਨਾਲ ਸ਼ਿਵ ਸੈਨਾ ਵਿਚ ਫੁੱਟ ਪੈ ਗਈ ਅਤੇ ਤਤਕਾਲੀ ਮਹਾ ਵਿਕਾਸ ਅਘਾੜੀ ਸਰਕਾਰ ਦਾ ਪਤਨ ਹੋ ਗਿਆ।