Ladakh: ਹਵਾਈ ਸੈਨਾ ਦੇ ਹੈਲੀਕਾਪਟਰ ਦੀ ਲੱਦਾਖ 'ਚ ਐਮਰਜੈਂਸੀ ਲੈਂਡਿੰਗ, ਪਾਇਲਟ ਸੁਰੱਖਿਅਤ, ਕੋਰਟ ਆਫ ਇਨਕੁਆਰੀ ਦੇ ਹੁਕਮ

Ladakh : ਭਾਰਤੀ ਹਵਾਈ ਸੈਨਾ ਦੇ ਇੱਕ ਅਪਾਚੇ ਹੈਲੀਕਾਪਟਰ ਨੂੰ ਲੱਦਾਖ ਵਿੱਚ ਐਮਰਜੈਂਸੀ ਲੈਂਡਿੰਗ ਕਰਨੀ ਪਈ ਹੈ। ਇਸ ਦੌਰਾਨ ਉਤਰਾਅ-ਚੜ੍ਹਾਅ ਵਾਲੇ ਇਲਾਕੇ ਅਤੇ ਵੱਧ ਉੱਚਾਈ ਦੇ ਕਾਰਨ ਹੈਲੀਕਾਪਟਰ ਨੂੰ ਨੁਕਸਾਨ ਪਹੁੰਚਿਆ ਹੈ। ਹਾਲਾਂਕਿ ਜਹਾਜ਼ ਵਿਚ ਸਵਾਰ ਦੋਵੇਂ ਪਾਇਲਟ ਸੁਰੱਖਿਅਤ ਹਨ। ਹਵਾਈ ਸੈਨਾ ਨੇ ਵੀਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਉਨ੍ਹਾਂ ਦੱਸਿਆ ਕਿ ਇਹ ਘਟਨਾ ਬੁੱਧਵਾਰ ਦੀ ਹੈ।

ਹਵਾਈ ਫੌਜ ਨੇ ਇਸ ਘਟਨਾ ਦੀ ਕੋਰਟ ਆਫ ਇਨਕੁਆਰੀ ਦੇ ਹੁਕਮ ਦਿੱਤੇ ਹਨ। ਆਈਏਐਫ ਨੇ ਇੱਕ ਸੰਖੇਪ ਬਿਆਨ ਵਿੱਚ ਕਿਹਾ, "ਆਈਏਐਫ ਦੇ ਅਪਾਚੇ ਹੈਲੀਕਾਪਟਰ ਨੇ 3 ਅਪ੍ਰੈਲ ਨੂੰ ਲੱਦਾਖ ਵਿੱਚ ਇੱਕ ਸੰਚਾਲਨ ਸਿਖਲਾਈ ਸੈਰਟੀ ਦੌਰਾਨ ਸਾਵਧਾਨੀਪੂਰਵਕ ਲੈਂਡਿੰਗ ਕੀਤੀ।"ਇਸ ਲੈਂਡਿੰਗ ਦੀ ਪ੍ਰਕਿਰਿਆ ਦੌਰਾਨ ਉਤਰਾਅ-ਚੜ੍ਹਾਅ ਵਾਲੇ ਇਲਾਕੇ ਅਤੇ ਵੱਧ ਉੱਚਾਈ ਦੇ ਕਾਰਨ ਹੈਲੀਕਾਪਟਰ ਨੂੰ ਨੁਕਸਾਨ ਪਹੁੰਚਿਆ ਹੈ। 

ਇਸ 'ਚ ਕਿਹਾ ਗਿਆ ਹੈ, 'ਵਿਮਾਨ 'ਤੇ ਸਵਾਰ ਦੋਵੇਂ ਪਾਇਲਟ ਸੁਰੱਖਿਅਤ ਹਨ ਅਤੇ ਉਨ੍ਹਾਂ ਨੂੰ ਨਜ਼ਦੀਕੀ ਏਅਰਬੇਸ 'ਤੇ ਲਿਜਾਇਆ ਗਿਆ ਹੈ। ਕਾਰਨ ਦਾ ਪਤਾ ਲਗਾਉਣ ਲਈ ਕੋਰਟ ਆਫ ਇਨਕੁਆਰੀ ਦੇ ਹੁਕਮ ਦਿੱਤੇ ਗਏ ਹਨ।