ਸੁਖੋਈ ਲੜਾਕੂ ਜਹਾਜ਼ ਹਾਦਸਾਗ੍ਰਸਤ, ਪਾਇਲਟ ਤੇ ਸਹਿ-ਪਾਇਲਟ ਸੁਰੱਖਿਅਤ ਬਾਹਰ ਨਿਕਲੇ
ਪਾਇਲਟ ਅਤੇ ਸਹਿ-ਪਾਇਲਟ ਇਲਾਜ ਲਈ ਹਸਪਤਾਲ ਭਰਤੀ
ਨਾਸਿਕ: ਮਹਾਰਾਸ਼ਟਰ ਦੇ ਨਾਸਿਕ ਜ਼ਿਲ੍ਹੇ ’ਚ ਮੰਗਲਵਾਰ ਨੂੰ ਭਾਰਤੀ ਹਵਾਈ ਫੌਜ ਦਾ ਇਕ ਸੁਖੋਈ ਲੜਾਕੂ ਜਹਾਜ਼ ਹਾਦਸਾਗ੍ਰਸਤ ਹੋ ਗਿਆ ਪਰ ਪਾਇਲਟ ਅਤੇ ਸਹਿ-ਪਾਇਲਟ ਸੁਰੱਖਿਅਤ ਬਾਹਰ ਨਿਕਲ ਗਏ।
ਨਾਸਿਕ ਰੇਂਜ ਦੇ ਵਿਸ਼ੇਸ਼ ਪੁਲਿਸ ਇੰਸਪੈਕਟਰ ਜਨਰਲ ਡੀ.ਆਰ. ਕਰਾਲੇ ਨੇ ਦਸਿਆ ਕਿ ਪਾਇਲਟ ਅਤੇ ਸਹਿ-ਪਾਇਲਟ ਨੂੰ ਇਲਾਜ ਲਈ ਹਿੰਦੁਸਤਾਨ ਏਅਰੋਨਾਟਿਕਸ ਲਿਮਟਿਡ (ਐਚ.ਏ.ਐਲ.) ਹਸਪਤਾਲ ਲਿਜਾਇਆ ਗਿਆ।
ਆਈ.ਪੀ.ਐਸ. ਅਧਿਕਾਰੀ ਨੇ ਦਸਿਆ ਕਿ ਐਸ.ਯੂ.-30 ਐਮ.ਕੇ.ਆਈ. ਸ਼ਿਰਸਾਗਾਓਂ ਨੇੜੇ ਇਕ ਖੇਤ ’ਚ ਹਾਦਸਾਗ੍ਰਸਤ ਹੋ ਗਿਆ। ਲੜਾਕੂ ਜਹਾਜ਼ ਦੁਪਹਿਰ 1:20 ਵਜੇ ਹਾਦਸਾਗ੍ਰਸਤ ਹੋ ਗਿਆ ਜਦੋਂ ਵਿੰਗ ਕਮਾਂਡਰ ਬੋਕਿਲ ਨੇ ਅਪਣੇ ‘ਸੈਕੰਡ-ਇਨ-ਕਮਾਂਡ’ ਦੇ ਭਰੋਸੇ ਨਾਲ ਇਸ ਨੂੰ ਉਡਾਣ ਭਰੀ।
ਅਧਿਕਾਰੀਆਂ ਮੁਤਾਬਕ ਦੋਹਾਂ ਪਾਇਲਟਾਂ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ ਅਤੇ ਉਨ੍ਹਾਂ ਦਾ ਐਚ.ਏ.ਐਲ. ਹਸਪਤਾਲ ’ਚ ਇਲਾਜ ਚੱਲ ਰਿਹਾ ਹੈ। ਜਹਾਜ਼ ਡਿੱਗਣ ਤੋਂ ਬਾਅਦ ਇਸ ’ਚ ਅੱਗ ਲੱਗ ਗਈ, ਜਿਸ ’ਤੇ ਕਾਬੂ ਪਾ ਲਿਆ ਗਿਆ। ਜਹਾਜ਼ ਦੇ ਕੁੱਝ ਹਿੱਸੇ 500 ਮੀਟਰ ਦੇ ਘੇਰੇ ’ਚ ਖਿੱਲਰੇ ਹੋਏ ਸਨ।
ਹਵਾਈ ਫ਼ੌਜ, ਐਚ.ਏ.ਐਲ. ਸੁਰੱਖਿਆ ਅਤੇ ਤਕਨੀਕੀ ਯੂਨਿਟ ਨੇ ਹਾਦਸੇ ਵਾਲੀ ਥਾਂ ਦਾ ਦੌਰਾ ਕੀਤਾ। ਇਕ ਹੋਰ ਪੁਲਿਸ ਅਧਿਕਾਰੀ ਨੇ ਕਿਹਾ ਕਿ ਹਾਦਸੇ ਦੇ ਸਹੀ ਕਾਰਨਾਂ ਦਾ ਅਜੇ ਪਤਾ ਨਹੀਂ ਲੱਗ ਸਕਿਆ ਹੈ ਪਰ ਮੁੱਢਲੀ ਜਾਣਕਾਰੀ ਤਕਨੀਕੀ ਕਾਰਕਾਂ ਵਲ ਇਸ਼ਾਰਾ ਕਰਦੀ ਹੈ।
ਸੂਤਰਾਂ ਨੇ ਦਸਿਆ ਕਿ ਜਹਾਜ਼ ਨਿਰੀਖਣ, ਮੁਰੰਮਤ ਅਤੇ ਨਿਗਰਾਨੀ ਲਈ ਐਚ.ਏ.ਐਲ. ਮਿਸ਼ਨ ਦੇ ਅਧੀਨ ਸੀ। ਉਨ੍ਹਾਂ ਮੁਤਾਬਕ ਟੈਸਟ ਤੋਂ ਬਾਅਦ ਉਨ੍ਹਾਂ ਨੂੰ ਏਅਰ ਫੋਰਸ ਦੇ ਹਵਾਲੇ ਕਰ ਦਿਤਾ ਜਾਂਦਾ ਹੈ।