ਨਵੀਂ ਦਿੱਲੀ: ਗੁਜਰਾਤ ਪੁਲਿਸ ਦੀ ਏਟੀਐਸ ਵਿਚ ਸ਼ਾਮਲ ਇਹਨਾਂ ਲੜਕੀਆਂ ਨੇ ਬਹਾਦਰੀ ਵਾਲਾ ਕੰਮ ਕੀਤਾ ਹੈ। ਇਹਨਾਂ ਨੇ ਜੁਸਬ ਅੱਲਾਰੱਖਾ ਨਾਮ ਦੇ ਇਕ ਖ਼ਤਰਨਾਕ ਗੈਂਗਸਟਰ ਨੂੰ ਫੜਿਆ ਹੈ ਜਿਸ ਦਾ ਖੌਫ਼ ਗੁਜਰਾਤ ਦੇ ਜੂਨਾਗੜ ਅਤੇ ਆਸ ਪਾਸ ਦੇ ਜ਼ਿਲ੍ਹਿਆਂ ਵਿਚ ਸੀ। ਇਸ ਗੈਂਗਸਟਰ ’ਤੇ ਹੱਤਿਆ ਦੇ 4 ਕੇਸ ਦਰਜ ਹਨ। ਪਰ ਇਕ ਮੁਠਭੇੜ ਤੋਂ ਬਾਅਦ ਇਹਨਾਂ ਔਰਤ ਪੁਲਿਸ ਕਰਮਚਾਰੀਆਂ ਨੇ ਇਸ ਨੂੰ ਕਾਬੂ ਕਰ ਹੀ ਲਿਆ।
ਹੁਣ ਇਹ ਅਪਰਾਧੀ ਜੇਲ੍ਹ ਵਿਚ ਹੈ। ਪੁਲਿਸ ਅਧਿਕਾਰੀ ਸੰਤੋਕ ਓਡੇਰਾ ਨੇ ਜਾਣਕਾਰੀ ਦਿੱਤੀ ਹੈ ਕਿ ਇਸ ਖ਼ਤਰਨਾਕ ਅਪਰਾਧੀ ਦੇ ਵਿਰੁੱਧ ਹੱਤਿਆ ਅਤੇ ਲੁੱਟ ਦੇ ਮਾਮਲੇ ਦਰਜ ਹਨ। ਇਸ ਨੇ ਇਕ ਵਾਰ ਗੁਜਰਾਤ ਪੁਲਿਸ ਦੇ ਵੱਡੇ ਅਧਿਕਾਰੀ ’ਤੇ ਵੀ ਹਮਲਾ ਕੀਤਾ ਸੀ। ਜੁਸਬ ਅੱਲਾਰੱਖਾ ਗੁਜਰਾਤ ਦਾ ਡਾਨ ਸੀ ਅਤੇ ਪੁਲਿਸ ਲਈ ਸਿਰਦਰਦ ਬਣਿਆ ਹੋਇਆ ਸੀ।
ਮਿਲੀ ਜਾਣਕਾਰੀ ਮੁਤਾਬਕ ਪੁਲਿਸ ਨੂੰ ਪਤਾ ਲਗਿਆ ਕਿ ਬੋਟਾਦ ਦੇ ਜੰਗਲ ਵਿਚ ਕੁੱਝ ਸ਼ੱਕੀ ਕੰਮ ਹੋ ਰਹੇ ਸਨ ਜਿਸ ਤੋਂ ਬਾਅਦ ਏਟੀਐਸ ਦੀ ਇਕ ਟੀਮ ਇਕੱਠੀ ਕੀਤੀ ਗਈ ਜਿਸ ਵਿਚ ਇਹਨਾਂ ਬਹਾਦੁਰ ਲੜਕੀਆਂ ਨੂੰ ਸ਼ਾਮਲ ਕੀਤਾ ਗਿਆ। ਪੁਲਿਸ ਦੀ ਟੀਮ ਅੱਗੇ ਗੈਂਗਸਟਰ ਦੀ ਇਕ ਨਾ ਚਲੀ ਅਤੇ ਉਸ ਨੂੰ ਜਾਨ ਬਚਾਉਣ ਲਈ ਸਮਰਪਣ ਕਰਨਾ ਪਿਆ।