ਮਾਇਆਵਤੀ ਨੇ ਭਾਜਪਾ 'ਤੇ ਦਲਿਤਾਂ ਵਿਰੁਧ ਅੱਤਿਆਚਾਰ ਕਰਨ ਦਾ ਲਾਇਆ ਦੋਸ਼
ਹੁਜਨ ਸਮਾਜ ਪਾਰਟੀ (ਬਸਪਾ) ਦੀ ਸੁਪਰੀਮੋ ਮਾਇਆਵਤੀ ਨੇ ਭਾਜਪਾ 'ਤੇ ਦਲਿਤਾਂ ਵਿਰੁਧ ਅੱਤਿਆਚਾਰ ਅੰਦੋਲਨ ਛੇੜਨ ਦਾ ਦੋਸ਼ ਲਾਉਂਦਿਆਂ ...
ਲਖਨਊ : ਬਹੁਜਨ ਸਮਾਜ ਪਾਰਟੀ (ਬਸਪਾ) ਦੀ ਸੁਪਰੀਮੋ ਮਾਇਆਵਤੀ ਨੇ ਭਾਜਪਾ 'ਤੇ ਦਲਿਤਾਂ ਵਿਰੁਧ ਅੱਤਿਆਚਾਰ ਅੰਦੋਲਨ ਛੇੜਨ ਦਾ ਦੋਸ਼ ਲਾਉਂਦਿਆਂ ਕਿਹਾ ਹੈ ਕਿ ਉੱਤਰ ਪ੍ਰਦੇਸ਼ ਦੀ ਭਾਜਪਾ ਸਰਕਾਰ ਨੇ ਦਲਿਤ ਸਮਾਜ ਦੇ ਦਲੇਰ ਨੌਜਵਾਨਾਂ ਨੂੰ ਨਿਸ਼ਾਨਾ ਬਣਾ ਕੇ ਉਨ੍ਹਾਂ ਉਪਰ ਨਫ਼ਰਤ ਦੀ ਰਾਜਨੀਤੀ ਕਰਦਿਆਂ ਅੱਤਿਆਚਾਰ ਢਾਹੇ ਹਨ। ਉਨ੍ਹਾਂ ਕਿਹਾ ਕਿ ਸਰਕਾਰ ਨੂੰ ਜਵਾਬ ਦੇਣਾ ਚਾਹੀਦਾ ਹੈ ਕਿ ਪੁਲਿਸ ਮੁਕਾਬਲੇ ਤੋਂ ਬਾਅਦ ਦਲਿਤਾਂ ਵਿਰੁਧ ਜਾਤੀਵਾਦੀ ਹਿੰਸਾ ਕਿਉਂ ਹੋਈ?
ਮਾਇਆਵਤੀ ਨੇ ਕਿਹਾ ਕਿ ਐਸਸੀ-ਐਸਟੀ ਕਾਨੂੰਨ ਦੀ ਰਾਖੀ ਲਈ ਦਲਿਤ ਸਮਾਜ ਕਿਸੇ ਵੀ ਕੁਰਬਾਨੀ ਲਈ ਤਿਆਰ ਹੈ, ਜਿਸ ਦੀ ਉਦਾਹਰਨ ਸਰਕਾਰ 2 ਅਪ੍ਰੈਲ ਨੂੰ ਦੇਖ ਚੁੱਕੀ ਹੈ। ਉਨ੍ਹਾਂ ਦੋਸ਼ ਲਗਾਇਆ ਕਿ ਦਲਿਤ ਅਤੇ ਆਦਿਵਾਸੀ ਭਾਈਚਾਰੇ ਨੇ ਅੰਦੋਲਨ ਸ਼ਾਂਤੀਪੂਰਨ ਰੱਖਣ ਦੀ ਬਹੁਤ ਕੋਸ਼ਿਸ਼ ਕੀਤੀ ਪਰ ਸਰਕਾਰ ਅਤੇ ਵਿਰੋਧੀ ਧਿਰਾਂ ਨੇ ਅੰਦੋਲਨ ਦੌਰਾਨ ਸ਼ਰਾਰਤੀ ਅਨਸਰਾਂ ਨੂੰ ਵਾੜ ਕੇ ਹਿੰਸਾ ਭੜਕਾਈ, ਜਿਸ ਦਾ ਦੋਸ਼ ਦਲਿਤ ਸਮਾਜ 'ਤੇ ਆਇਆ, ਜਦਕਿ ਦਲਿਤਾਂ ਨੇ ਕੇਵਲ ਵਿਰੋਧ ਪ੍ਰਦਰਸ਼ਨ ਹੀ ਕੀਤਾ ਸੀ।
ਮਾਇਅਵਾਤੀ ਨੇ ਕਿਹਾ ਕਿ ਉਸੇ ਹਿੰਸਾ ਦੀ ਆੜ ਵਿਚ ਦਲਿਤ ਨੌਜਵਾਨਾਂ ਨੂੰ ਗ੍ਰਿਫ਼ਤਾਰ ਕੀਤਾ ਜਾ ਰਿਹਾ ਹੈ ਜੋਕਿ ਨਿੰਦਣਯੋਗ ਹੈ। ਉਨ੍ਹਾਂ ਕਿਹਾ ਕਿ ਅਪਣੇ ਜਾਇਜ਼ ਅਧਿਕਾਰਾਂ ਦੀ ਲੜਾਈ ਲੜਨ ਲਈ ਬਾਬਾ ਸਾਹਿਬ ਅੰਬੇਦਕਰ ਪ੍ਰਤੀ ਭਾਜਪਾ ਸਰਕਾਰ ਦੀ ਘਟੀਆ ਜਾਤੀਵਾਦੀ ਮਾਨਸਿਕਤਾ ਜੱਗ ਜ਼ਾਹਿਰ ਹੋਈ ਹੈ, ਜਿਸ ਦਾ ਤਿਆਗ਼ ਬਹੁਤ ਜ਼ਰੂਰੀ ਹੈ।
ਉਨ੍ਹਾਂ ਕਿਹਾ ਕਿ ਬਾਬਾ ਸਾਹਿਬ ਅੰਬੇਦਕਰ ਆਖਦੇ ਸਨ ਕਿ ਜਾਤੀਵਾਦ ਦਾ ਤਿਆਗ਼ ਹੀ ਸੱਚਾ ਰਾਜ ਧਰਮ ਹੈ ਅਤੇ ਭਾਜਪਾ ਆਗੂਆਂ ਨੂੰ ਇਸ ਦਾ ਤਿਆਗ਼ ਕਰ ਕੇ ਰਾਜ ਧਰਮ ਨਿਭਾਉਣਾ ਚਾਹੀਦਾ ਹੈ।