ਮੋਦੀ ਸਰਕਾਰ ਨੇ ਚੀਨ ਵਿਰੁਧ ਤਾਕਤ ਲਾਈ ਹੁੰਦੀ ਤਾਂ ਨੱਡਾ ਨੂੰ 'ਝੂਠ' ਨਾ ਬੋਲਣਾ ਪੈਂਦਾ : ਕਾਂਗਰਸ

ਨਵੀਂ ਦਿੱਲੀ, 6 ਜੁਲਾਈ : ਕਾਂਗਰਸ ਨੇ ਰਾਹੁਲ ਗਾਂਧੀ 'ਤੇ ਭਾਜਪਾ ਪ੍ਰਧਾਨ ਜਗਤ ਪ੍ਰਕਾਸ਼ ਨੱਡਾ ਦੇ ਹਮਲੇ ਕਾਰਨ ਪਲਟਵਾਰ ਕਰਦਿਆਂ ਦਾਅਵਾ ਕੀਤਾ ਕਿ ਜੇ ਭਾਜਪਾ ਅਤੇ ਨਰਿੰਦਰ ਮੋਦੀ ਸਰਕਾਰ ਨੇ ਚੀਨ ਦੀ ਘੁਸਪੈਠ ਨਾਲ ਨਜਿੱਠਣ ਵਿਚ ਤਾਕਤ ਲਾਈ ਹੁੰਦੀ ਤਾਂ ਦੇਸ਼ ਨੂੰ ਗੁਮਰਾਹ ਕਰਨ ਲਈ ਨੱਡਾ ਨੂੰ ਝੂਠ ਨਾ ਬੋਲਣਾ ਪੈਂਦਾ। ਪਾਰਟੀ ਦੇ ਮੁੱਖ ਬੁਲਾਰੇ ਰਣਦੀਪ ਸੁਰਜੇਵਾਲਾ ਨੇ ਇਹ ਸਵਾਲ ਵੀ ਕੀਤਾ

ਕਿ ਕੀ ਮੋਦੀ ਸਰਕਾਰ ਫ਼ੌਜੀਆਂ ਦੇ ਮਹਿੰਗਾਈ ਭੱਤੇ ਵਿਚ ਕਟੌਤੀ ਕਰ ਕੇ ਅਤੇ ਰਖਿਆ ਖ਼ਰਚੇ ਨੂੰ ਘਟਾ ਕੇ ਸਾਡੇ ਜਵਾਨਾਂ ਦਾ ਹੌਸਲਾ ਵਧਾ ਰਹੀ ਹੈ? ਉਨ੍ਹਾਂ ਟਵਿਟਰ 'ਤੇ ਕਿਹਾ, 'ਨੱਡਾ ਜੀ, ਤੁਸੀਂ ਰੋਜ਼ਾਨਾ ਜਿਸ ਤਰ੍ਹਾਂ ਦੀ ਟਿਪਣੀ ਕਰ ਰਹੇ ਹੋ, ਉਸ ਤੋਂ ਮਾੜੀ ਭਾਵਨਾ ਝਲਕਦੀ ਹੈ। ਜੇ ਭਾਜਪਾ ਅਤੇ ਮੋਦੀ ਸਰਕਾਰ ਨੇ ਚੀਨ ਨਾਲ ਲੜਨ ਅਤੇ ਸਾਡੇ ਹਥਿਆਬੰਦ ਬਲਾਂ ਦਾ ਸਹਿਯੋਗ ਕਰਨ ਵਿਚ ਊਰਜਾ ਲਾਈ ਹੁੰਦੀ ਤਾਂ ਤੁਹਾਨੂੰ ਚੀਨੀ ਘੁਸਪੈਠ ਬਾਰੇ ਦੇਸ਼ ਨੂੰ ਗੁਮਰਾਹ ਕਰਨ ਲਈ ਝੂਠ ਬੋਲਣ ਦੀ ਲੋੜ ਨਾ ਪੈਂਦੀ।'