RBI is responsible for the PMC bank scam : Manjinder Singh Sirsa

ਨਵੀਂ ਦਿੱਲੀ : ਸ਼੍ਰੋਮਣੀ ਅਕਾਲੀ ਦਲ ਦੇ ਆਗੂ ਮਨਜਿੰਦਰ ਸਿੰਘ ਸਿਰਸਾ ਨੇ ਪੰਜਾਬ ਐਂਡ ਮਹਾਰਾਸ਼ਟਰ ਕੋ-ਆਪ੍ਰੇਟਿਵ ਬੈਂਕ (ਪੀ.ਐਮ.ਸੀ.) 'ਚ ਹੋਏ ਘੁਟਾਲੇ ਦੇ ਮਾਮਲੇ 'ਚ ਭਾਰਤੀ ਰਿਜ਼ਰਵ ਬੈਂਕ (ਆਰ.ਬੀ.ਆਈ.) ਨੂੰ ਜ਼ਿੰਮੇਵਾਰ ਠਹਿਰਾਇਆ ਹੈ। ਉਨ੍ਹਾਂ ਕਿਹਾ ਕਿ ਇਹ ਸਹਿਕਾਰੀ ਬੈਂਕ ਹੈ ਪਰ ਇਸ ਨੂੰ ਆਰ.ਬੀ.ਆਈ. ਸੰਚਾਲਤ ਕਰਦਾ ਹੈ। ਇਸ ਦੇ ਸਾਰੇ ਮਾਮਲੇ ਰਿਜ਼ਰਵ ਬੈਂਕ ਵਲੋਂ ਸੰਚਾਲਤ ਹੁੰਦੇ ਹਨ ਅਤੇ ਇਸ ਦੀ ਜ਼ਿੰਮੇਵਾਰੀ ਵੀ ਆਰ.ਬੀ.ਆਈ. ਦੀ ਹੈ।

ਸਿਰਸਾ ਨੇ ਕਿਹਾ ਕਿ ਬੈਂਕ ਦੇ ਗਾਹਕਾਂ ਨੇ ਆਪਣੇ ਪੈਸੇ ਰਾਹ ਚਲਦੇ ਕਿਸੇ ਵਿਅਕਤੀ ਨੂੰ ਨਹੀਂ ਦਿੱਤੇ ਹਨ, ਸਗੋਂ ਇਹ ਪੈਸਾ ਸਰਕਾਰ ਨੂੰ ਦਿੱਤਾ ਗਿਆ ਹੈ। ਬੈਂਕ 'ਚ ਧੋਖਾਧੜੀ ਲਈ ਆਰ.ਬੀ.ਆਈ. ਜ਼ਿੰਮੇਵਾਰ ਹੈ। ਉਨ੍ਹਾਂ ਨੇ ਆਰ.ਬੀ.ਆਈ. ਤੋਂ ਮੰਗ ਕਰਦਿਆਂ ਕਿਹਾ ਕਿ ਬੈਂਕ ਗਾਹਕਾਂ ਨੂੰ ਪੈਸੇ ਵਾਪਸ ਕਰੇ। ਉਨ੍ਹਾਂ ਕਿਹਾ ਕਿ ਪੀ.ਐਮ.ਸੀ. ਬਹੁਤ ਵੱਡਾ ਬੈਂਕਿੰਗ ਘਪਲਾ ਹੈ। ਪੀ.ਐਮ.ਸੀ. ਨੇ ਆਪਣੇ ਖਾਤਾਧਾਰਕਾਂ ਦੇ ਕਰੋੜਾਂ ਰੁਪਏ ਆਪਣੀ ਮੌਜ-ਮਸਤੀ ਲਈ ਉਡਾਇਆ ਹੈ।

ਪੰਜਾਬ ਤੇ ਮਹਾਰਾਸ਼ਟਰ ਬੈਂਕ ਫਰਾਡ ਮਾਮਲੇ ਤੋਂ ਬਾਅਦ ਗੁਰਦੁਆਰਿਆਂ ਦੇ 100 ਕਰੋੜ ਤੋਂ ਵੱਧ ਪੈਸੇ ਫਸ ਗਏ ਹਨ। ਇਸ ਤੋਂ ਇਲਾਵਾ ਬੈਂਕ ਵਿਚ 1984 ਕਤਲੇਆਮ ਪੀੜਤਾਂ ਦਾ ਵੀ ਪੈਸਾ ਫਸਿਆ ਹੋਇਆ ਹੈ। ਸਿਰਸਾ ਦੀ ਅਗਵਾਈ ਵਿਚ ਵੱਡੀ ਗਿਣਤੀ ਲੋਕਾਂ ਨੇ ਮੋਦੀ ਸਰਕਾਰ ਅੱਗੇ ਦੁਹਾਈ ਪਾਈ ਹੈ। 

ਜ਼ਿਕਰਯੋਗ ਹੈ ਕਿ ਪੰਜਾਬ ਅਤੇ ਮਹਾਰਾਸ਼ਟਰ ਕੋ-ਆਪਰੇਟਿਵ (ਪੀ.ਐਮ.ਸੀ.) ਬੈਂਕ ਦੇ ਚੇਅਰਮੈਨ ਐਸ. ਵਰਯਾਮ ਸਿੰਘ ਨੂੰ ਮੁੰਬਈ ਦੀ ਆਰਥਕ ਅਪਰਾਧ ਬਰਾਂਚ ਨੇ ਸਨਿਚਰਵਾਰ ਨੂੰ ਹਿਰਾਸਤ 'ਚ ਲਿਆ। ਬੈਂਕ 'ਚ 4.355 ਕਰੋੜ ਰੁਪਏ ਦੀ ਕਥਿਤ ਘਪਲੇ ਦੇ ਸਿਲਸਿਲੇ 'ਚ ਉਨ੍ਹਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਸੀ। ਇਸ ਮਾਮਲੇ 'ਚ ਇਹ ਚੌਥੀ ਗ੍ਰਿਫ਼ਤਾਰੀ ਹੈ। ਪੀ.ਐਮ.ਸੀ. ਬੈਂਕ 'ਚ ਦੋ ਹਫ਼ਤੇ ਪਹਿਲਾਂ ਘਪਲਾ ਸਾਹਮਣੇ ਆਉਣ ਦੇ ਬਾਅਦ ਤੋਂ ਹੀ ਵਰਯਾਮ ਸਿੰਘ ਲਾਪਤਾ ਸੀ।