ਰਿਲਾਇੰਸ ਜੀਓ ਲਾਂਚ ਕਰੇਗਾ ਸਭ ਤੋਂ ਸਸਤਾ ਲੈਪਟਾਪ Jio Book, ਕੀਮਤ ਜਾਣ ਕੇ ਰਹਿ ਜਾਓਗੇ ਹੈਰਾਨ
ਪਹਿਲਾਂ ਸਕੂਲ-ਕਾਲਜ ਅਤੇ ਸਰਕਾਰੀ ਸੰਸਥਾਵਾਂ ਲਈ ਉਪਲਬਧ ਹੋਵੇਗਾ ਇਹ ਲੈਪਟਾਪ
ਨਵੀਂ ਦਿੱਲੀ : ਭਾਰਤ ਵਿੱਚ ਸਭ ਤੋਂ ਵੱਧ ਗਾਹਕ ਅਧਾਰ ਵਾਲੀ ਟੈਲੀਕਾਮ ਕੰਪਨੀ ਰਿਲਾਇੰਸ ਜਿਓ ਜਲਦੀ ਹੀ ਇੱਕ ਸਸਤਾ ਲੈਪਟਾਪ 'ਜੀਓ ਬੁੱਕ' ਲਾਂਚ ਕਰਨ ਵਾਲੀ ਹੈ। ਇਸ ਲੈਪਟਾਪ ਦੀ ਮਦਦ ਨਾਲ ਉਨ੍ਹਾਂ ਯੂਜ਼ਰਸ ਨੂੰ ਫਾਇਦਾ ਮਿਲੇਗਾ, ਜਿਨ੍ਹਾਂ ਨੂੰ ਲੈਪਟਾਪ ਦੀ ਜ਼ਰੂਰਤ ਹੈ ਪਰ ਉਹ ਜ਼ਿਆਦਾ ਖਰਚ ਨਹੀਂ ਕਰ ਸਕਦੇ। ਕੰਪਨੀ ਨੇ 4ਜੀ ਸੇਵਾਵਾਂ ਸ਼ੁਰੂ ਕਰਨ ਤੋਂ ਬਾਅਦ ਸਸਤਾ JioPhone ਲਿਆਂਦਾ ਸੀ, ਜੋ ਭਾਰਤੀ ਬਾਜ਼ਾਰ 'ਚ ਸਫਲ ਰਿਹਾ। ਕੰਪਨੀ ਉਸੇ ਸਫਲਤਾ ਨੂੰ JioBook ਨਾਲ ਦੁਹਰਾਉਣ ਦੀ ਕੋਸ਼ਿਸ਼ ਕਰੇਗੀ।
ਕੰਪਨੀ ਦੇ ਇਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਕੰਪਨੀ ਬੇਸਿਕ ਲੈਪਟਾਪ 'ਤੇ ਕੰਮ ਕਰ ਰਹੀ ਹੈ ਜਿਸ ਦੀ ਕੀਮਤ 10,000 ਰੁਪਏ ਤੋਂ ਘੱਟ ਹੋਵੇਗੀ। ਪਰਸਨਲ ਕੰਪਿਊਟਰ (ਪੀਸੀ) ਵਿੱਚ ਕਲਾਉਡ ਨਾਲ ਜੁੜਨ ਲਈ ਇੱਕ ਡਿਸਪਲੇ, ਇੱਕ ਕੀਪੈਡ, ਇੱਕ ਜੀਓ ਓਪਰੇਟਿੰਗ ਸਿਸਟਮ ਅਤੇ ਹਾਰਡਵੇਅਰ ਸ਼ਾਮਲ ਹੋਣਗੇ, ਜਿਸ ਵਿੱਚ ਸਾਰੀ ਜਾਣਕਾਰੀ ਅਤੇ ਐਪਲੀਕੇਸ਼ਨ ਸ਼ਾਮਲ ਕੀਤੇ ਜਾ ਸਕਣਗੇ। ਇੱਕ ਨਿਊਜ਼ ਏਜੰਸੀ ਦੀ ਇੱਕ ਰਿਪੋਰਟ ਵਿੱਚ ਖੁਲਾਸਾ ਹੋਇਆ ਹੈ ਕਿ ਰਿਲਾਇੰਸ ਜਿਓ ਦਾ ਬਜਟ ਲੈਪਟਾਪ ਸਿਰਫ 184 ਡਾਲਰ (ਕਰੀਬ 15,000 ਰੁਪਏ) ਦੀ ਕੀਮਤ ਵਿੱਚ ਲਾਂਚ ਕੀਤਾ ਜਾ ਸਕਦਾ ਹੈ।
ਇਸ ਲੈਪਟਾਪ ਨੂੰ ਬਣਾਉਣ ਲਈ ਮੁਕੇਸ਼ ਅੰਬਾਨੀ ਦੀ ਕੰਪਨੀ ਨੇ ਮਾਈਕ੍ਰੋਸਾਫਟ ਅਤੇ ਚਿੱਪਮੇਕਰ ਕੁਆਲਕਾਮ ਨਾਲ ਸਾਂਝੇਦਾਰੀ ਕੀਤੀ ਹੈ। ਜਦੋਂ ਕਿ ਕੁਆਲਕਾਮ ਨਵੇਂ ਡਿਵਾਈਸਾਂ ਲਈ ਕੰਪਿਊਟਿੰਗ ਚਿਪਸ ਤਿਆਰ ਕਰੇਗਾ, ਮਾਈਕ੍ਰੋਸਾਫਟ ਆਪਣੇ ਵਿੰਡੋਜ਼ ਓਐਸ ਨਾਲ ਕਈ ਐਪਸ ਦਾ ਸਮਰਥਨ ਕਰ ਸਕਦਾ ਹੈ। ਜੀਓ ਬੁੱਕ ਦੇ ਲਾਂਚ ਹੋਣ ਨਾਲ ਜੁੜੇ ਲਗਾਤਾਰ ਸੰਕੇਤ ਮਿਲੇ ਹਨ ਅਤੇ ਹੁਣ ਇਹ ਗੱਲ ਸਾਹਮਣੇ ਆਈ ਹੈ ਕਿ ਇਹ ਲੈਪਟਾਪ ਪਹਿਲਾਂ ਸਕੂਲ-ਕਾਲਜ ਅਤੇ ਸਰਕਾਰੀ ਸੰਸਥਾਵਾਂ ਲਈ ਉਪਲਬਧ ਹੋਵੇਗਾ।
ਸੂਤਰਾਂ ਦੀ ਮੰਨੀਏ ਤਾਂ ਇਸ ਲੈਪਟਾਪ ਦੀ ਖਪਤਕਾਰ ਲਾਂਚਿੰਗ ਅਗਲੇ ਤਿੰਨ ਮਹੀਨਿਆਂ ਦੇ ਅੰਦਰ ਹੋ ਸਕਦੀ ਹੈ। ਇਸ ਸਸਤੇ ਲੈਪਟਾਪ 'ਚ 4ਜੀ ਕੁਨੈਕਟੀਵਿਟੀ ਮਿਲੇਗੀ ਅਤੇ ਇਸ ਲਈ ਏਮਬੇਡਿਡ 4ਜੀ ਸਿਮ ਕਾਰਡ ਨੂੰ ਇਸ ਦਾ ਹਿੱਸਾ ਬਣਾਇਆ ਜਾ ਸਕਦਾ ਹੈ। ਸੰਭਵ ਹੈ ਕਿ ਸਮਾਰਟਫੋਨ ਦੀ ਤਰ੍ਹਾਂ ਯੂਜ਼ਰਸ ਇਸ ਲੈਪਟਾਪ ਨੂੰ ਇੰਟਰਨੈੱਟ ਐਕਸੈਸ ਕਰਨ ਲਈ ਰੀਚਾਰਜ ਕਰ ਸਕਣਗੇ।