Kashmir School Modi Government

ਜੰਮੂ ਕਸ਼ਮੀਰ: ਕੇਂਦਰ ਸਰਕਾਰ ਵੱਲੋਂ ਭਾਵੇਂ ਕਸ਼ਮੀਰ ਵਿਚ ਵੱਡੀ ਪੱਧਰ 'ਤੇ ਵਿਕਾਸ ਕਾਰਜ ਕਰਵਾਏ ਜਾਣ ਦੇ ਵੱਡੇ-ਵੱਡੇ ਦਾਅਵੇ ਕੀਤੇ ਜਾ ਰਹੇ ਨੇ ਪਰ ਉਤਰੀ ਕਸ਼ਮੀਰ ਦੇ ਬਾਰਾਮੂਲਾ ਜ਼ਿਲ੍ਹੇ ਦੇ ਦਰਗਾਮ ਪੱਟਨ ਵਿਚਲੇ ਇਸ ਸਰਕਾਰੀ ਸਕੂਲ ਦੀ ਹਾਲਤ ਨੂੰ ਦੇਖਦਿਆਂ ਸਰਕਾਰ ਦੇ ਦਾਅਵੇ ਖੋਖਲੇ ਹੁੰਦੇ ਜਾਪ ਰਹੇ ਨੇ।

1960 ਵਿਚ ਸਥਾਪਿਤ ਕੀਤੇ ਗਏ ਇਸ ਸਕੂਲ ਨੂੰ ਮਾਰਚ 2019 ਵਿਚ ਅਧਿਕਾਰੀਆਂ ਵੱਲੋਂ ਅਸੁਰੱਖਿਅਤ ਐਲਾਨ ਕਰ ਦਿੱਤਾ ਗਿਆ ਸੀ ਕਿਉਂਕਿ ਸਾਲ 2005 ਵਿਚ ਭੂਚਾਲ ਦੇ ਕਾਰਨ ਇਸ ਸਕੂਲ ਦੀ ਇਮਾਰਤ ਵਿਚ ਦਰਾੜਾਂ ਆ ਗਈਆਂ ਸਨ। ਸਥਾਨਕ ਲੋਕਾਂ ਮੁਤਾਬਕ ਮੌਜੂਦਾ ਸਕੂਲ ਕਿਰਾਏ ਦੀ ਇਕ ਇਮਾਰਤ ਵਿਚ ਚੱਲ ਰਿਹੈ। ਨੇਹਲਪੁਰਾ ਜ਼ੋਨ ਦੇ ਅਧਿਕਾਰ ਖੇਤਰ ਵਿਚ ਆਉਂਦੇ ਇਸ ਸਕੂਲ ਵਿਚ ਵਿਦਿਆਰਥਣਾਂ ਲਈ ਬਾਥਰੂਮ ਦੀ ਸਹੂਲਤ ਤਕ ਮੌਜੂਦ ਨਹੀਂ।

3 ਕਲਾਸਾਂ ਦੇ ਵਿਦਿਆਰਥੀਆਂ ਨੂੰ ਇਕ ਕਮਰੇ ਵਿਚ ਬੈਠ ਕੇ ਪੜ੍ਹਨਾ ਪੈ ਰਿਹਾ ਹੈ। ਮਾਰਚ 2019 ਵਿਚ ਮੀਡੀਆ ਵੱਲੋਂ ਇਸ ਸਕੂਲ ਦੀ ਖ਼ਬਰ ਲਗਾਉਣ 'ਤੇ ਸਥਾਨਕ ਐਸਡੀਐਮ ਨੇ ਇਸ ਸਕੂਲ ਦਾ ਦੌਰਾ ਕੀਤਾ ਸੀ।

 ਇਸ ਦੀ ਇਮਾਰਤ ਨੂੰ ਅਸੁਰੱਖਿਅਤ ਕਰਾਰ ਦਿੰਦਿਆਂ ਵਿਦਿਆਰਥੀਆਂ ਨੂੰ ਕਿਰਾਏ ਦੀ ਇਮਾਰਤ ਵਿਚ ਤਬਦੀਲ ਕਰ ਦਿੱਤਾ ਸੀ, ਜਿੱਥੇ ਪਿਛਲੇ 11 ਮਹੀਨਿਆਂ ਤੋਂ ਵਿਦਿਆਰਥੀਆਂ ਨੂੰ ਬਾਥਰੂਮ ਅਤੇ ਪੀਣ ਵਾਲਾ ਪਾਣੀ ਨਾ ਹੋਣ ਕਾਰਨ ਸਮੱਸਿਆ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

ਇਸ ਮੌਕੇ ਬੋਲਦਿਆਂ ਬੋਲਦਿਆਂ ਸਕੂਲ ਦੀਆਂ ਵਿਦਿਆਰਥਣਾਂ ਨੇ ਸਰਕਾਰ ਨੂੰ ਅਪੀਲ ਕੀਤੀ ਹੈ ਕਿ ਉਨ੍ਹਾਂ ਦੇ ਸਕੂਲ ਵਿਚ ਸਾਰੀਆਂ ਸਹੂਲਤਾਂ ਉਪਲਬਧ ਕਰਵਾਈਆਂ ਜਾਣ ਤਾਂ ਜੋ ਉਹ ਸਹੀ ਤਰੀਕੇ ਨਾਲ ਅਪਣੀ ਪੜ੍ਹਾਈ ਕਰ ਸਕਣ। ਸਕੂਲੀ ਵਿਦਿਆਰਥਣਾਂ ਦਾ ਕਹਿਣ ਹੈ ਕਿ ਉਹਨਾਂ ਨੂੰ ਲਗਭਗ 1 ਸਾਲ ਸ਼ਿਫਟ ਹੋਇਆ ਨੂੰ ਹੋ ਗਿਆ ਹੈ ਪਰ ਇਸ ਸਕੂਲ ਦੀ ਕੋਈ ਬਿਲਡਿੰਗ ਨਹੀਂ ਹੈ, ਕੋਈ ਟਾਇਲਟਸ ਦਾ ਪ੍ਰਬੰਧ ਨਹੀਂ ਕੀਤਾ ਗਿਆ।

ਇਸ ਤੋਂ ਇਲਾਵਾ ਨਾ ਹੀ ਇੱਥੇ ਖੇਡਾਂ ਦਾ ਪ੍ਰਬੰਧ ਹੈ। ਅਧਿਆਪਕਾਂ ਦੀ ਗਿਣਤੀ ਵੀ ਸਿਰਫ 7 ਹੈ। ਉਹ ਪੜ੍ਹਾਉਂਦੇ ਤਾਂ ਜ਼ਰੂਰ ਹਨ ਪਰ ਵਿਦਿਆਰਥੀਆਂ ਨੂੰ ਸਮਝ ਹੀ ਨਹੀਂ ਲਗਦੀ ਕਿ ਅਧਿਆਪਕ ਕੀ ਪੜ੍ਹਾ ਰਹੇ ਹਨ। ਦੱਸ ਦਈਏ ਕਿ ਬਾਰਾਮੂਲਾ ਦਾ ਇਹ ਖੇਤਰ ਅਤਿਵਾਦ ਪ੍ਰਭਾਵਤ ਖੇਤਰ ਰਿਹਾ ਹੈ ਪਰ ਹੁਣ ਜਦੋਂ ਕੇਂਦਰ ਸਰਕਾਰ ਨੇ ਕਸ਼ਮੀਰ ਨੂੰ ਇਕ ਕੇਂਦਰ ਸਾਸ਼ਤ ਪ੍ਰਦੇਸ਼ ਬਣਾ ਕੇ ਸਿੱਧਾ ਅਪਣੇ ਅਧੀਨ ਕਰ ਲਿਐ ਤਾਂ ਦੇਖਣਾ ਹੋਵੇਗਾ ਕਿ ਸਰਕਾਰ ਇਸ ਸਕੂਲ ਵਿਚਲੀਆਂ ਸਹੂਲਤਾਂ ਨੂੰ ਕਦੋਂ ਪੂਰਾ ਕਰਦੀ ਹੈ।