ਪਾਣੀਪਤ: ਗੁਰਦਵਾਰੇ ਦੀ ਛੱਤ ਡਿੱਗੀ, ਇਕ ਮਰਿਆ

ਕਰਨਾਲ, 12 ਜੂਨ (ਪਲਵਿੰਦਰ ਸਿੰਘ ਸੱਗੂ): ਪਾਣੀਪਤ  ਦੇ ਗੁਰਦਵਾਰਾ ਸ੍ਰੀ ਗੁਰੂ ਸਿੰਘ ਸਭਾ ਦੀ ਛੱਤ ਡਿਗਣ ਕਾਰਨ ਇਕ ਵਿਅਕਤੀ ਦੀ ਮੌਤ ਹੋ ਗਈ ਅਤੇ ਛੇ ਜ਼ਖ਼ਮੀ ਹੋ ਗਏ। ਮਲਬੇ ਹੇਠ ਦਬੇ ਸੱਤ ਵਿਅਕਤੀਆਂ ਨੂੰ ਸੁਰੱਖਿਅਤ ਕੱਢ ਲਿਆ ਗਿਆ।
ਮ੍ਰਿਤਕ ਦੀ ਪਛਾਣ ਯੂ.ਪੀ. ਦੇ ਸੀਤਾਪੁਰ ਦੇ ਵਸਨੀਕ ਧੀਰਜ ਕੁਮਾਰ ਵਜੋਂ ਹੋਈ ਹੈ। ਜਾਣਕਾਰੀ ਅਨੁਸਾਰ ਗੁਰਦਵਾਰੇ ਵਿਚ ਮੁਰੰਮਤ ਦਾ ਕੰਮ ਚਲ ਰਿਹਾ ਸੀ ਅਤੇ ਅਚਾਨਕ ਹੀ ਗੁ. ਸਾਹਿਬ ਦੀ ਇਮਾਰਤ ਦਾ ਇਕ ਪਿਲਰ ਅਪਣੀ ਥਾਂ ਤੋਂ ਖਿਸਕ ਗਿਆ ਜਿਸ ਕਾਰਨ ਛੱਤ ਡਿੱਗ ਗਈ। ਇਮਾਰਤ ਦੀ ਛੱਤ ਡਿੱਗਣ ਕਾਰਨ ਗੁਰਦਵਾਰੇ ਦੇ ਹੇਠਾਂ ਬਣੀਆਂ ਕਈ ਦੁਕਾਨਾਂ ਨੂੰ ਵੀ ਨੁਕਸਾਨ ਹੋਇਆ ਹੈ। ਇਸ ਘਟਨਾ ਵਿਚ ਕਈ ਵਿਅਕਤੀ ਅਤੇ ਵਾਹਨ ਮਲਬੇ ਹੇਠਾਂ ਦਬ ਗਏ ਸਨ ਜਿਨ੍ਹਾਂ ਨੂੰ ਬਾਅਦ ਵਿਚ ਕੱਢ ਲਿਆ ਗਿਆ। ਪਾਣੀਪਤ ਦੀ ਸੰਗਤ ਵਲੋਂ ਘਟਨਾ ਵਾਲੀ ਥਾਂ 'ਤੇ ਪੁੱਜਣ ਕਾਰਨ ਸੜਕ 'ਤੇ ਜਾਮ ਲੱਗ ਗਿਆ।
ਪਾਣੀਪਤ ਦੇ ਡੀਐਸਪੀ ਆਤਮਾ ਰਾਮ ਨੇ ਦਸਿਆ ਕਿ ਰਾਹਤ ਕੰਮ ਲਗਾਤਾਰ ਜਾਰੀ ਹਨ ਪਰ ਮਲਬੇ ਹੇਠ ਕੁੱਝ ਵਿਅਕਤੀ ਫਸੇ ਹਨ। ਇਹ ਗੁਰਦਵਾਰਾ ਜੀਟੀ ਰੋਡ 'ਤੇ ਸਥਿਤ ਹੈ। ਗੁਰਦਵਾਰੇ ਦੀ ਛੱਤ ਡਿਗਣ ਕਾਰਨ ਇਕ ਵਿਅਕਤੀ ਦੀ ਮੌਤ ਹੋ ਗਈ ਅਤੇ ਲਗਭਗ ਅੱਠ
ਵਿਅਕਤੀ ਜ਼ਖ਼ਮੀ ਹੋ ਗਏ ਹਨ। ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।