ਰਾਜ ਸਭਾ 'ਚ ਹੰਗਾਮਾ ਕਰਨ ਵਾਲੇ ਸਾਂਸਦਾਂ ਅਤੇ ਸਿਆਸੀ ਦਲਾਂ 'ਤੇ ਨਕੇਲ ਕਸਣਗੇ ਵੈਂਕਈਆ ਨਾਇਡੂ

venkaiah naidu form a committee to prevent uproar in rajya-sabha

ਨਵੀਂ ਦਿੱਲੀ : ਰਾਜ ਸਭਾ ਵਿਚ ਹੰਗਾਮਾ ਕਰ ਕੇ ਸਦਨ ਦੀ ਕਾਰਵਾਈ ਵਿਚ ਰੋੜਾ ਅਟਕਾਉਣ ਵਾਲੇ ਸਾਂਸਦਾਂ ਅਤੇ ਰਾਜਨੀਤਕ ਦਲਾਂ 'ਤੇ ਨਕੇਲ ਕਸਣ ਲਈ ਸਭਾਪਤੀ ਵੈਂਕਈਆ ਨਾਇਡੂ ਨੇ ਤਿਆਰੀ ਸ਼ੁਰੂ ਕਰ ਦਿਤੀ ਹੈ।

ਨਾਇਡੂ ਨੇ ਸੋਮਵਾਰ ਨੂੰ ਰਾਜ ਸਭਾ ਦੇ ਕੰਡਕਟ ਆਫ਼ ਬਿਜਨੈਸ ਵਿਚ ਜ਼ਰੂਰੀ ਬਦਲਾਅ 'ਤੇ ਵਿਚਾਰ ਕਰਨ ਲਈ ਇਕ ਦੋ ਮੈਂਬਰੀ ਕਮੇਟੀ ਦੇ ਗਠਨ ਦਾ ਐਲਾਨ ਕਰ ਦਿਤਾ। ਰਾਜ ਸਭਾ ਸਕੱਤਰੇਤ ਵਲੋਂ ਜਾਰੀ ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਇਸ ਦੀ ਪ੍ਰਧਾਨਗੀ ਰਾਜ ਸਭਾ ਦੇ ਸਾਬਕਾ ਸਕੱਤਰ ਜਨਰਲ ਵੀਕੇ ਅਗਨੀਹੋਤਰੀ ਕਰਨਗੇ।

ਰਾਜ ਸਭਾ ਦੇ ਸਕੱਤਰ ਜਨਰਲ ਦੇਸ਼ ਦੀਪਕ ਵਰਮਾ ਨੇ ਸੋਮਵਾਰ ਨੂੰ ਇਕ ਪ੍ਰੈੱਸ ਕਾਨਫਰੰਸ ਵਿਚ ਕਿਹਾ ਸੀ ਕਿ ਫਿ਼ਲਹਾਲ ਰਾਜ ਸਭਾ ਦੇ ਨਿਯਮਾਂ ਵਿਚ ਸਦਨ ਦੀ ਕਾਰਵਾਈ ਵਿਚ ਜਾਣਬੁੱਝ ਕੇ ਰੁਕਾਵਟ ਪਾਉਣ ਵਾਲੇ ਸਾਂਸਦਾਂ ਦੀ ਮੁਅੱਤਲੀ ਲਈ ਕੋਈ ਪ੍ਰਬੰਧ ਨਹੀਂ ਹੈ। ਜਦਕਿ ਲੋਕ ਸਭਾ ਦੇ ਨਿਯਮ 374 (ਏ) ਵਿਚ ਅਜਿਹੇ ਸਾਂਸਦਾਂ ਲਈ ਪ੍ਰਬੰਧ ਹੈ। ਇਸ ਲਈ ਰਾਜ ਸਭਾ ਵਿਚ ਵੀ ਲੋਕ ਸਭਾ ਦੀ ਤਰਜ਼ 'ਤੇ ਸਾਂਸਦਾਂ ਵਿਰੁਧ ਸ਼ਖਤ ਕਾਰਵਾਈ ਦਾ ਪ੍ਰਬੰਧ ਸ਼ਾਮਲ ਕਰਨਾ ਬੇਹੱਦ ਜ਼ਰੂਰੀ ਹੈ। 

ਵਰਤਾ ਨੇ ਕਿਹਾ ਕਿ ਵਿਸ਼ੇਸ਼ ਅਧਿਕਾਰੀ, ਵਿਵਸਥਾ ਅਤੇ ਸਵਾਲ, ਨਿਯਮਾਂ ਮੁਲਤਵੀ ਕੀਤੇ ਜਾਣ ਆਦਿ ਨਾਲ ਸਬੰਧਤ ਰਾਜ ਸਭਾ ਦੇ ਨਿਯਮ ਨਰਮ ਜਾਪਦੇ ਹਨ। ਉਨ੍ਹਾਂ ਕਿਹਾ ਕਿ ਇਸ ਦੇ ਮੱਦੇਨਜ਼ਰ ਸਭਾਪਤੀ ਨੇ ਦੋ ਮੈਂਬਰੀ ਇਕ ਕਮੇਟੀ ਦਾ ਗਠਨ ਕੀਤਾ ਹੈ। ਰਾਜ ਸਭਾ ਦੇ ਸਾਬਕਾ ਜਨਰਲ ਸਕੱਤਰ ਵੀ ਕੇ ਅਗਨੀਹੋਤਰੀ ਇਸ ਕਮੇਟੀ ਦੇ ਮੁਖੀ ਹੋਣਗੇ। ਕਮੇਟੀ ਵਿਚ ਕਾਨੂੰਨ ਮੰਤਰਾਲਾ ਦੇ ਸੇਵਾਮੁਕਤ ਜੁਆਇੰਟ ਸਕੱਤਰ ਐਸ ਆਰ ਧਲੇਤਾ ਵੀ ਸ਼ਾਮਲ ਹੋਣਗੇ। 

ਵਰਮਾ ਨੇ ਕਿਹਾ ਕਿ ਕਮੇਟੀ ਰਾਜ ਸਭਾ ਦੇ ਨਿਯਮਾਂ ਅਤੇ ਪ੍ਰਕਿਰਿਆਵਾਂ ਦੀਆਂ ਤਜਵੀਜ਼ਾਂ ਦੀ ਸਮੀਖਿਆ ਕਰੇਗੀ ਅਤੇ ਉਸ ਵਿਚ ਉਚਿਤ ਸੋਧ ਦਾ ਸੁਝਾਅ ਦੇਵੇਗੀ। ਉਨ੍ਹਾਂ ਕਿਹਾ ਕਿ ਇਸ ਦਾ ਮਕਸਦ ਉਚ ਸਦਨ ਦੀ ਉਤਾਪਦਕਤਾ ਵਿਚ ਵਾਧਾ ਕਰਨਾ ਅਤੇ ਕਾਰਵਾਈ ਵਿਚ ਅਕਸਰ ਪੈਣ ਵਾਲੀ ਰੁਕਾਵਟ 'ਤੇ ਕਾਬੂ ਪਾਉਣਾ ਹੈ। ਉਨ੍ਹਾਂ ਕਿਹਾ ਕਿ ਕਮੇਟੀ ਦੀਆਂ ਸਿਫ਼ਾਰਸ਼ਾਂ ਵਿਚ ਸਾਰੇ ਪੱਖਾਂ ਅਤੇ ਸਿਆਸੀ ਦਲਾਂ ਦੇ ਵਿਚਾਰਾਂ 'ਤੇ ਵੀ ਗੌਰ ਕੀਤਾ ਜਾਵੇਗਾ।