ਪੰਜਾਬੀਆਂ ਨੇ ਦਿੱਲੀ ਦੀਆਂ ਬਰੂਹਾਂ 'ਤੇ ਉਸਾਰਿਆ ਪੁਰਾਤਨ ਪੰਜਾਬ, ਬਣਾਏ ਪੱਕੇ ਟਿਕਾਣੇ

File Photo

ਨਵੀਂ ਦਿੱਲੀ : ਪਿਛਲੇ 4 ਮਹੀਨਿਆਂ ਤੋਂ ਦਿੱਲੀ ਦੀਆਂ ਹੱਦਾਂ 'ਤੇ ਬੈਠੇ ਕਿਸਾਨਾਂ ਨੇ ਠੰਡ ਦਾ ਮੌਸਮ ਕੱਢ ਲੈਣ ਤੋਂ ਬਾਅਦ ਹੁਣ ਗਰਮੀ ਦੇ ਸੀਜ਼ਨ ’ਚ ਧਰਨੇ ਨੂੰ ਜਾਰੀ ਰੱਖਦਿਆਂ ਆਪਣੇ ਰਹਿਣ-ਸਹਿਣ ’ਚ ਬਦਲਾਅ ਲਿਆਉਣਾ ਸ਼ੁਰੂ ਕਰ ਦਿੱਤਾ ਹੈ। ਇਨ੍ਹਾਂ ਧਰਨਿਆਂ ’ਤੇ  ਇਸ ਤਹਿਤ ਆਪਣੀਆਂ ਟਰਾਲੀਆਂ ਅਤੇ ਝੁੱਗੀਆਂ ਨੂੰ ਵਾਤਾਵਰਣ ਦੇ ਅਨੁਕੂਲ ਕਰਦਿਆਂ ਕੱਖਾਂ-ਕਾਨਿਆਂ ਦੀਆਂ ਛੱਤਾਂ ਪਾ ਲਈਆਂ ਹਨ ਅਤੇ ਕਈਆਂ ’ਚ ਏ. ਸੀ. ਵੀ ਫਿੱਟ ਕਰ ਲਏ ਹਨ। ਇੰਨਾ ਹੀ ਨਹੀਂ, ਸੋਲਰ ਊਰਜਾ ਦੀ ਫਿਟਿੰਗ ਕਰਵਾ ਕੇ ਬਿਜਲੀ ਦੀ ਕਮੀ ਵੀ ਦੂਰ ਕਰ ਲਈ ਗਈ ਹੈ।

ਉਥੇ ਹੀ ਚੁੱਲਾ-ਚੌਂਕਾ ਵੀ ਧੂੰਆਂ ਰਹਿਤ ਕਰ ਲਏ ਹਨ। ਦੇਖਣ ਵਾਲੀ ਗੱਲ ਹੈ ਕਿ ਦਿੱਲੀ ਦੀਆਂ ਬਰੂਹਾਂ ’ਤੇ ਪੰਜਾਬੀਆਂ ਤੇ ਦਰਿਆ ਦਿਲ ਹਰਿਆਣਵੀਆਂ ਨੇ ਪੁਰਾਤਨ ਰਹਿਣ-ਸਹਿਣ ਦੀ ਦਿਖ ਕਾਇਮ ਕਰ ਦਿੱਤੀ ਹੈ, ਜਿਸ ਨੂੰ ਦੇਖਣ ਲਈ ਪੂਰੇ ਭਾਰਤ ’ਚੋਂ ਸ਼ਹਿਰੀ ਲੋਕ ਤੇ ਖ਼ਾਸ ਕਰ ਬੱਚੇ ਪਹੁੰਚ ਰਹੇ ਹਨ। ਇਸ ਤਰ੍ਹਾਂ ਲੱਗਦਾ ਹੈ ਕਿ ਇਹ ਧਰਨੇ ਪੂਰੇ ਭਾਰਤ ਲਈ ਇਕ ਮੁਜੱਸਮਾ ਬਣ ਰਿਹਾ ਹੈ, ਜਿਸ ਦੀਆਂ ਤਸਵੀਰਾਂ ਨਿੱਤ ਦਿਨ ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋ ਰਹੀਆਂ ਹਨ।

ਬੱਚੇ ਧਰਨਿਆਂ ’ਚ ਸ਼ਿਰਕਤ ਕਰ ਕੇ ਇਕ ਪਾਸੇ ਜਿੱਥੇ ਪੰਜਾਬੀ ਸੱਭਿਆਚਾਰ ਤੇ ਵਿਰਾਸਤ ਨਾਲ ਜੁੜ ਰਹੇ ਹਨ, ਉੱਥੇ ਹੀ ਪੰਜਾਬ ਅਤੇ ਹਰਿਆਣਾ ਦੇ ਪਿੰਡਾਂ ’ਚੋਂ ਘੱਟਦੀ ਜਾ ਰਹੀ ਸੱਭਿਆਚਾਰਕ ਦਿੱਖ ਨੂੰ ਦੇਖਣ ਲਈ ਉਤਸ਼ਾਹਿਤ ਨਜ਼ਰ ਆ ਰਹੇ ਹਨ। ਕਈ ਥਾਵਾਂ ’ਤੇ ਤਾਂ ਪੁਰਾਣੀਆਂ ਛੱਤਾਂ ਅੱਗੇ ਬੱਚਿਆਂ ਦੇ ਖੇਡਣ ਲਈ ਛੋਟੇ ਗਲਿਆਰੇ ਵੀ ਬਣਾਏ ਗਏ ਹਨ।

ਧਰਨੇ ਵਿਚ ਸਵੇਰੇ-ਸ਼ਾਮ ਖਾਣੇ ਵਿਚ ਦੇਸੀ ਖੁਰਾਕਾਂ ਸ਼ਾਮਲ ਹੁੰਦੀਆਂ ਹਨ। ਜਿਵੇਂ ਪਹਿਲਾਂ ਦੇਸੀ ਘਿਓ ਦੀਆਂ ਪਿੰਨੀਆਂ, ਜਲੇਬੀਆਂ, ਖੀਰ, ਕੜਾਹ ਆਦਿ ਸ਼ਾਮਿਲ ਸੀ। ਉਸੇ ਤਰ੍ਹਾਂ ਹੁਣ ਗਰਮੀ ਦੇ ਸੀਜ਼ਨ ’ਚ ਲੱਸੀ, ਦਹੀਂ, ਠੰਡਾ ਦੁੱਧ ਆਦਿ ਵੱਖ-ਵੱਖ ਲੰਗਰਾਂ ’ਚ ਵਰਤਦਾ ਆਮ ਦੇਖਿਆ ਜਾ ਸਕਦਾ ਹੈ। ਦਿੱਲੀ ਵਿਖੇ ਚੱਲ ਰਹੇ ਕਿਸਾਨੀ ਧਰਨਿਆਂ ’ਚ ਸਮੁੱਚੇ ਵਰਗਾਂ ਦੀ ਸ਼ਮੂਲੀਅਤ ਨੇ ਸੋਚ ਦਾ ਨਜ਼ਰੀਆ ਬਦਲ ਕੇ ਰੱਖ ਦਿੱਤਾ ਹੈ।