Telangana Tunnel Acciden: ਤੇਲੰਗਾਨਾ ਸੁਰੰਗ ਹਾਦਸਾ; 16ਵੇਂ ਦਿਨ ਪੰਜਾਬ ਦੇ ਗੁਰਪ੍ਰੀਤ ਸਿੰਘ ਦੀ ਲਾਸ਼ ਬਰਾਮਦ
ਅਜੇ ਵੀ ਫਸੇ ਹੋਏ ਹਨ 7 ਲੋਕ
Telangana Tunnel Acciden: ਤੇਲੰਗਾਨਾ ਵਿੱਚ ਸ਼੍ਰੀਸੈਲਮ ਲੈਫਟ ਬੈਂਕ ਨਹਿਰ (SLBC) ਸੁਰੰਗ ਵਿੱਚੋਂ ਬਚਾਅ ਟੀਮਾਂ ਨੇ ਇੱਕ ਲਾਸ਼ ਬਰਾਮਦ ਕੀਤੀ ਹੈ। ਹਾਦਸੇ ਦੇ 16ਵੇਂ ਦਿਨ ਐਤਵਾਰ ਨੂੰ ਬਚਾਅ ਟੀਮ ਨੇ ਮਜ਼ਦੂਰ ਦੀ ਲਾਸ਼ 10 ਫੁੱਟ ਮਲਬੇ ਹੇਠੋਂ ਬਰਾਮਦ ਕੀਤੀ।
ਮ੍ਰਿਤਕ ਦੀ ਪਛਾਣ ਪੰਜਾਬ ਦੇ ਗੁਰਪ੍ਰੀਤ ਸਿੰਘ ਵਜੋਂ ਹੋਈ ਹੈ। ਗੁਰਪ੍ਰੀਤ ਦੀ ਲਾਸ਼ ਨੂੰ ਪੰਜਾਬ ਵਿੱਚ ਉਸ ਦੇ ਜੱਦੀ ਸ਼ਹਿਰ ਭੇਜ ਦਿੱਤਾ ਗਿਆ ਹੈ। ਤੇਲੰਗਾਨਾ ਦੇ ਮੁੱਖ ਮੰਤਰੀ ਰੇਵੰਤ ਰੈਡੀ ਨੇ ਐਤਵਾਰ ਰਾਤ ਨੂੰ ਗੁਰਪ੍ਰੀਤ ਦੇ ਪਰਿਵਾਰ ਨੂੰ 25 ਲੱਖ ਰੁਪਏ ਦੀ ਐਕਸਗ੍ਰੇਸ਼ੀਆ ਰਾਸ਼ੀ ਦਾ ਐਲਾਨ ਕੀਤਾ।
ਇਹ ਹਾਦਸਾ 22 ਫ਼ਰਵਰੀ ਨੂੰ ਹੋਇਆ ਸੀ।
22 ਫ਼ਰਵਰੀ ਤੋਂ SLBC ਸੁਰੰਗ ਵਿੱਚ ਇੰਜੀਨੀਅਰਾਂ ਅਤੇ ਮਜ਼ਦੂਰਾਂ ਸਮੇਤ ਅੱਠ ਲੋਕ ਫਸੇ ਹੋਏ ਸਨ। ਉੱਤਰ ਪ੍ਰਦੇਸ਼ ਤੋਂ ਮਨੋਜ ਕੁਮਾਰ ਅਤੇ ਸ਼੍ਰੀ ਨਿਵਾਸ, ਜੰਮੂ ਅਤੇ ਕਸ਼ਮੀਰ ਤੋਂ ਸੰਨੀ ਸਿੰਘ ਅਤੇ ਝਾਰਖੰਡ ਤੋਂ ਸੰਦੀਪ ਸਾਹੂ, ਜਗਤਾ ਜੈਸ, ਸੰਤੋਸ਼ ਸਾਹੂ ਅਤੇ ਅਨੁਜ ਸਾਹੂ ਦੀ ਭਾਲ ਜਾਰੀ ਹੈ।
ਰਾਸ਼ਟਰੀ ਆਫ਼ਤ ਪ੍ਰਤੀਕਿਰਿਆ ਬਲ (ਐਨਡੀਆਰਐਫ), ਫ਼ੌਜ, ਜਲ ਸੈਨਾ ਅਤੇ ਹੋਰ ਏਜੰਸੀਆਂ ਦੇ ਮਾਹਰ ਬਚਾਅ ਕਾਰਜਾਂ 'ਤੇ ਲਗਾਤਾਰ ਕੰਮ ਕਰ ਰਹੇ ਹਨ। ਅਧਿਕਾਰੀਆਂ ਨੇ ਐਤਵਾਰ ਨੂੰ ਕਿਹਾ ਸੀ ਕਿ ਬਚਾਅ ਕਾਰਜਾਂ ਵਿੱਚ ਸਹਾਇਤਾ ਲਈ ਮਨੁੱਖੀ ਅਵਸ਼ੇਸ਼ ਖੋਜ ਕੁੱਤੇ (HRDD) ਤਾਇਨਾਤ ਕੀਤੇ ਗਏ ਹਨ।
ਬਚਾਅ ਕਰਮਚਾਰੀਆਂ ਨੇ ਕੁੱਤਿਆਂ ਦੁਆਰਾ ਦਰਸਾਏ ਗਏ ਸਥਾਨਾਂ 'ਤੇ ਖੁਦਾਈ ਕੀਤੀ। ਕੇਰਲ ਪੁਲਿਸ ਦੇ ਬੈਲਜੀਅਨ ਮੈਲੀਨੋਇਸ ਨਸਲ ਦੇ ਕੁੱਤੇ 15 ਫੁੱਟ ਦੀ ਡੂੰਘਾਈ ਤਕ ਸੁੰਘ ਕੇ ਪਤਾ ਲਗਾਉਣ ਦੇ ਸਮਰੱਥ ਹਨ।
ਤੇਲੰਗਾਨਾ ਸਰਕਾਰ ਨੇ ਬਚਾਅ ਕਰਮਚਾਰੀਆਂ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਲਈ ਰੋਬੋਟ ਤਾਇਨਾਤ ਕਰਨ ਦਾ ਫੈਸਲਾ ਕੀਤਾ ਹੈ। ਪਾਣੀ ਅਤੇ ਚਿੱਕੜ ਸਮੇਤ ਚੁਣੌਤੀਪੂਰਨ ਸਥਿਤੀਆਂ ਦੇ ਕਾਰਨ ਸੁਰੰਗ ਦੇ ਅੰਦਰ ਕਾਫ਼ੀ ਜੋਖ਼ਮ ਹੈ।