ਏਅਰ ਇੰਡੀਆ ਦੀਆਂ ਟਿਕਟਾਂ ਹੋਣਗੀਆਂ ਮਹਿੰਗੀਆਂ
ਘਰੇਲੂ ਅਤੇ ਕੌਮਾਂਤਰੀ ਟਿਕਟਾਂ ’ਤੇ ਫਿਊਲ ਸਰਚਾਰਜ ਵਧਾਉਣ ਦਾ ਐਲਾਨ
ਨਵੀਂ ਦਿੱਲੀ: ਇਰਾਨ ਵਿਰੁਧ ਚਲ ਰਹੀ ਜੰਗ ਦਾ ਅਸਰ ਹਵਾਈ ਉਡਾਣਾਂ ’ਤੇ ਵੀ ਪੈਣ ਵਾਲਾ ਹੈ। ਏਅਰ ਇੰਡੀਆ ਅਤੇ ਏਅਰ ਇੰਡੀਆ ਐਕਸਪ੍ਰੈੱਸ ਨੇ ਐਲਾਨ ਕੀਤਾ ਹੈ ਕਿ ਘਰੇਲੂ ਅਤੇ ਕੌਮਾਂਤਰੀ ਫਲਾਈਟ ਟਿਕਟਾਂ ਉਤੇ ਫਿਊਲ ਸਰਚਾਰਜ ਵਧਾਇਆ ਜਾਵੇਗਾ। ਏਅਰ ਇੰਡੀਆ ਅਤੇ ਏਅਰ ਇੰਡੀਆ ਐਕਸਪ੍ਰੈਸ 12 ਮਾਰਚ ਤੋਂ ਹਰ ਘਰੇਲੂ ਉਡਾਣ ਟਿਕਟ ਉਤੇ 399 ਰੁਪਏ ਦਾ ਫਿਊਲ ਸਰਚਾਰਜ ਲਗਾਉਣਾ ਸ਼ੁਰੂ ਕਰੇਗੀ ਅਤੇ ਮੱਧ ਪੂਰਬ ਦੇ ਸੰਘਰਸ਼ ਦੌਰਾਨ ਜੈੱਟ ਫਿਊਲ ਦੀਆਂ ਕੀਮਤਾਂ ਵਿਚ ਭਾਰੀ ਵਾਧੇ ਕਾਰਨ ਕੌਮਾਂਤਰੀ ਬੁਕਿੰਗ ਲਈ ਚਾਰਜ ਵੀ ਵਧਾਉਣਗੇ। ਨਵੇਂ ਫ਼ਿਊਲ ਸਰਚਾਰਜ ਪੜਾਅਵਾਰ ਢੰਗ ਨਾਲ ਲਾਗੂ ਕੀਤੇ ਜਾਣਗੇ।
ਪਹਿਲੇ ਪੜਾਅ ’ਚ 12 ਮਾਰਚ ਤੋਂ ਪ੍ਰਤੀ ਘਰੇਲੂ ਉਡਾਣ ਟਿਕਟ 399 ਰੁਪਏ ਦਾ ਫ਼ਿਊਲ ਸਰਚਾਰਜ ਲਗਾਇਆ ਜਾਵੇਗਾ ਅਤੇ ਇਹ ਸਾਰਕ ਦੀਆਂ ਉਡਾਣਾਂ ਉਤੇ ਵੀ ਲਾਗੂ ਹੋਵੇਗਾ। ਪਛਮੀ ਏਸ਼ੀਆ ਦੀਆਂ ਉਡਾਣਾਂ ਲਈ ਈਂਧਣ ਸਰਚਾਰਜ 10 ਡਾਲਰ ਹੋਵੇਗਾ ਅਤੇ ਅਫਰੀਕਾ ਦੀਆਂ ਉਡਾਣਾਂ ਲਈ 30 ਤੋਂ 90 ਡਾਲਰ ਅਤੇ ਦੱਖਣ-ਪੂਰਬੀ ਏਸ਼ੀਆ ਦੀਆਂ ਸੇਵਾਵਾਂ ਲਈ 20 ਤੋਂ 60 ਡਾਲਰ ਦਾ ਵਾਧਾ ਕੀਤਾ ਜਾਵੇਗਾ।
ਇਹ ਸਾਰੀਆਂ ਤਬਦੀਲੀਆਂ 12 ਮਾਰਚ ਤੋਂ ਲਾਗੂ ਹੋਣਗੀਆਂ, ਜਿਸ ਵਿਚ ਸਿੰਗਾਪੁਰ ਜਾਣ ਅਤੇ ਜਾਣ ਵਾਲੀਆਂ ਉਡਾਣਾਂ ਵੀ ਸ਼ਾਮਲ ਹਨ। ਫਿਲਹਾਲ ਸਿੰਗਾਪੁਰ ਦੀਆਂ ਸੇਵਾਵਾਂ ਲਈ ਕੋਈ ਫਿਊਲ ਸਰਚਾਰਜ ਨਹੀਂ ਹੈ। ਬਿਆਨ ’ਚ ਕਿਹਾ ਗਿਆ ਹੈ ਕਿ ਏਅਰ ਇੰਡੀਆ ਸਮੂਹ ਨੇ ਖਾੜੀ ਖੇਤਰ ’ਚ ਭੂ-ਸਿਆਸੀ ਸਥਿਤੀ ਕਾਰਨ ਜੈੱਟ ਈਂਧਨ ਦੀਆਂ ਕੀਮਤਾਂ ’ਚ ਭਾਰੀ ਵਾਧੇ ਕਾਰਨ ਅਪਣੇ ਘਰੇਲੂ ਅਤੇ ਕੌਮਾਂਤਰੀ ਮਾਰਗਾਂ ਉਤੇ ਫਿਊਲ ਸਰਚਾਰਜ ’ਚ ਪੜਾਅਵਾਰ ਵਾਧਾ ਕਰਨ ਦਾ ਐਲਾਨ ਕੀਤਾ ਹੈ।