ਹਰਿਆਣਾ ਮਹਿਲਾ ਕਮਿਸ਼ਨ ਦੀ ਚੇਅਰਪਰਸਨ ਤੇ ਮਹਿਲਾ ਪੁਲਿਸ ਮੁਲਾਜ਼ਮ ਵਿਚਾਲੇ ਹੋਈ ਜ਼ਬਰਦਸਤ ਬਹਿਸ
ਤੁਸੀਂ ਲੜਕੀ ਦੀ ਤਿੰਨ ਵਾਰ ਮੈਡੀਕਲ ਜਾਂਚ ਕਰਵਾਈ, ਬਾਹਰ ਨਿਕਲ ਜਾਓ, ਤੁਹਾਡੇ ਖਿਲਾਫ਼ ਵਿਭਾਗੀ ਜਾਂਚ ਹੋਵੇਗੀ - ਚੇਅਰਪਰਸਨ
ਚੰਡੀਗੜ੍ਹ : ਕਮਿਸ਼ਨ ਦੀ ਚੇਅਰਪਰਸਨ ਵੱਲੋਂ ਪੁਲਿਸ ਮੁਲਾਜ਼ਮ ਨੂੰ ਬਾਹਰ ਜਾਣ ਲਈ ਕਹਿਣ ਅਤੇ ਵਿਭਾਗੀ ਜਾਂਚ ਦੀ ਚੇਤਾਵਨੀ ਦੇਣ ਨੂੰ ਲੈ ਕੇ ਸ਼ੁੱਕਰਵਾਰ ਨੂੰ ਹਰਿਆਣਾ ਰਾਜ ਮਹਿਲਾ ਕਮਿਸ਼ਨ ਅਤੇ ਇੱਕ ਮਹਿਲਾ ਪੁਲਿਸ ਅਧਿਕਾਰੀ ਦਰਮਿਆਨ ਤਿੱਖੀ ਬਹਿਸ ਹੋ ਗਈ। ਇਹ ਕਥਿਤ ਘਟਨਾ ਹਰਿਆਣਾ ਦੇ ਕੈਥਲ ਵਿਚ ਮਹਿਲਾ ਕਮਿਸ਼ਨ ਦੀ ਚੇਅਰਪਰਸਨ ਰੇਣੂ ਭਾਟੀਆ ਅਤੇ ਪੁਲਿਸ ਅਧਿਕਾਰੀਆਂ ਵਿਚਾਲੇ ਹੋਈ ਮੀਟਿੰਗ ਦੌਰਾਨ ਵਾਪਰੀ।
ਵੀਡੀਓ 'ਚ ਭਾਟੀਆ ਨੂੰ ਮਹਿਲਾ ਪੁਲਿਸ ਮੁਲਾਜ਼ਮ ਨੂੰ ਇਹ ਕਹਿੰਦੇ ਹੋਏ ਸੁਣਿਆ ਜਾ ਸਕਦਾ ਹੈ ਕਿ ''ਤੁਸੀਂ ਉਸ (ਆਦਮੀ) ਨੂੰ ਥੱਪੜ ਮਾਰ ਸਕਦੇ ਸੀ। ਤੁਸੀਂ ਲੜਕੀ ਦੀ ਤਿੰਨ ਵਾਰ ਮੈਡੀਕਲ ਜਾਂਚ ਕਰਵਾਈ, ਬਾਹਰ ਨਿਕਲ ਜਾਓ, ਤੁਹਾਡੇ ਖਿਲਾਫ਼ ਵਿਭਾਗੀ ਜਾਂਚ ਹੋਵੇਗੀ।" ਜਦੋਂ ਅਧਿਕਾਰੀ ਨੇ ਵਿਰੋਧ ਕੀਤਾ ਤਾਂ ਭਾਟੀਆ ਨੇ ਕਿਹਾ ਕਿ ਪੁਲਿਸ ਮੁਲਾਜ਼ਮ ਨੇ ਲੜਕੀ ਦਾ ਤਾਂ 3 ਵਾਰ ਮੈਡੀਕਲ ਕਰਵਾ ਲਿਆ ਪਰ ਵਿਅਕਤੀ ਦਾ ਟੈਸਟ ਨਹੀਂ ਕਰਵਾਇਆ।
ਜਦੋਂ ਅਧਿਕਾਰੀ ਨੇ ਇਸ ਦਾ ਜਵਾਬ ਦੇਣ ਦੀ ਕੋਸ਼ਿਸ਼ ਕੀਤੀ ਤਾਂ ਭਾਟੀਆ ਨੇ ਸਟੇਸ਼ਨ ਇੰਚਾਰਜ ਨੂੰ ਉਸ ਨੂੰ ਬਾਹਰ ਕੱਢਣ ਲਈ ਕਿਹਾ। ਮਹਿਲਾ ਅਧਿਕਾਰੀ ਨੇ ਕਿਹਾ, ''ਅਸੀਂ ਇੱਥੇ ਅਪਮਾਨਿਤ ਹੋਣ ਨਹੀਂ ਆਏ ਹਾਂ।'' ਇਸ 'ਤੇ ਭਾਟੀਆ ਨੇ ਜਵਾਬ ਦਿੱਤਾ, ''ਤੁਸੀਂ ਇੱਥੇ ਲੜਕੀ ਨੂੰ ਬੇਇੱਜ਼ਤ ਕਰਨ ਆਏ ਹੋ? ਵਿਵਾਦ ਹੋਰ ਵਧਦਾ ਗਿਆ ਅਤੇ ਅਧਿਕਾਰੀ ਨੇ ਪੁੱਛਿਆ ਕਿ ਉਸ ਨੇ ਲੜਕੀ ਨੂੰ ਕਿਵੇਂ ਜ਼ਲੀਲ ਕੀਤਾ, ਜਿਸ 'ਤੇ ਭਾਟੀਆ ਨੇ ਪੁੱਛਿਆ ਕਿ ਉਨ੍ਹਾਂ ਨੇ ਉਸ ਦਾ ਤਿੰਨ ਵਾਰ ਟੈਸਟ ਕਿਉਂ ਕਰਵਾਇਆ। ਵੀਡੀਓ 'ਚ ਭਾਟੀਆ ਨੂੰ ਮਹਿਲਾ ਅਧਿਕਾਰੀ ਨੂੰ ਕਹਿੰਦੇ ਹੋਏ ਦੇਖਿਆ ਜਾ ਸਕਦਾ ਹੈ, "ਮੇਰੇ ਨਾਲ ਬਹਿਸ ਨਾ ਕਰੋ ਅਤੇ ਬਾਹਰ ਚਲੇ ਜਾਓ।"
ਭਾਟੀਆ ਨੇ ਉਕਤ ਵਿਅਕਤੀ ਦੀ ਮੈਡੀਕਲ ਜਾਂਚ ਕਰਵਾਉਣ ਲਈ ਕਿਹਾ ਸੀ ਅਤੇ ਉਹ ਹੁਕਮਾਂ ਦੀ ਪਾਲਣਾ ਨਾ ਕਰਨ 'ਤੇ ਨਾਰਾਜ਼ ਸੀ। ਬਾਅਦ ਵਿਚ ਭਾਟੀਆ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਵਿਅਕਤੀ ਦੀ ਮੈਡੀਕਲ ਜਾਂਚ ਕੀਤੀ ਜਾਵੇਗੀ। ਭਾਟੀਆ ਨੇ ਪੱਤਰਕਾਰਾਂ ਨੂੰ ਕਿਹਾ "ਤੁਸੀਂ ਦੇਖਿਆ ਕਿ ਜਦੋਂ ਮੈਂ ਉਸ (ਮਹਿਲਾ ਪੁਲਿਸ ਅਧਿਕਾਰੀ) ਨੂੰ ਪੁੱਛਿਆ ਕਿ ਉਸ (ਮਨੁੱਖ) ਦੀ ਡਾਕਟਰੀ ਜਾਂਚ ਕਿਉਂ ਨਹੀਂ ਕੀਤੀ ਗਈ ਤਾਂ ਉਹ ਕਿਵੇਂ ਬੋਲਦੀ ਸੀ।"