Shortage of 1.35 lakh personnel in three services: Govt

 

ਨਵੀਂ ਦਿੱਲੀ: ਕੇਂਦਰ ਸਰਕਾਰ ਨੇ ਲੋਕ ਸਭਾ ਨੂੰ ਦੱਸਿਆ ਕਿ ਭਾਰਤੀ ਫੌਜ ਵਿਚ ਜੇਸੀਓ ਅਤੇ ਹੋਰ ਰੈਂਕ ਲਈ 1,18,485 ਅਸਾਮੀਆਂ ਖ਼ਾਲੀ ਹਨ ਅਤੇ 40,000 ਅਸਾਮੀਆਂ ਲਈ ਇਸ਼ਤਿਹਾਰ ਜਾਰੀ ਕੀਤਾ ਗਿਆ ਹੈ। ਰੱਖਿਆ ਰਾਜ ਮੰਤਰੀ ਅਜੇ ਭੱਟ ਨੇ ਲੋਕ ਸਭਾ ਵਿਚ ਦੀਪਕ ਬੈਜ ਦੇ ਸਵਾਲ ਦੇ ਲਿਖਤੀ ਜਵਾਬ ਵਿਚ ਇਹ ਜਾਣਕਾਰੀ ਦਿੱਤੀ।

ਉਹਨਾਂ ਦੱਸਿਆ ਕਿ ਹਥਿਆਰਬੰਦ ਬਲਾਂ ਵਿਚ ਕੁੱਲ 1,35,891 ਅਸਾਮੀਆਂ ਖਾਲੀ ਹਨ। ਉਹਨਾਂ ਨੇ ਦੱਸਿਆ ਕਿ 1 ਜੁਲਾਈ, 2022 ਤੱਕ ਭਾਰਤੀ ਫੌਜ ਵਿਚ ਜੂਨੀਅਰ ਕਮਿਸ਼ਨਡ ਅਫਸਰ/ਹੋਰ ਰੈਂਕਾਂ ਵਿਚ 1,18,485 ਅਸਾਮੀਆਂ ਖਾਲੀ ਸਨ।

ਉਹਨਾਂ ਕਿਹਾ ਕਿ ਫੌਜ ਵਿਚ ਜੇਸੀਓ/ਓਆਰ ਲਈ 40 ਹਜ਼ਾਰ ਅਸਾਮੀਆਂ ਦਾ ਇਸ਼ਤਿਹਾਰ ਦਿੱਤਾ ਗਿਆ ਹੈ। ਭੱਟ ਨੇ ਕਿਹਾ ਕਿ 30 ਸਤੰਬਰ ਤੱਕ ਭਾਰਤੀ ਜਲ ਸੈਨਾ ਵਿਚ 11,587 ਖ਼ਾਲੀ ਅਸਾਮੀਆਂ ਸਨ ਅਤੇ ਸਾਲ 2022 ਵਿਚ ਜਲ ਸੈਨਾ ਵਿਚ ਅਗਨੀਵੀਰ ਲਈ ਕੁੱਲ 3,000 ਅਸਾਮੀਆਂ ਦਾ ਇਸ਼ਤਿਹਾਰ ਦਿੱਤਾ ਗਿਆ ਹੈ।

ਇਸੇ ਤਰ੍ਹਾਂ ਭਾਰਤੀ ਹਵਾਈ ਸੈਨਾ ਵਿਚ 1 ਨਵੰਬਰ ਤੱਕ ਏਅਰਮੈਨ ਅਤੇ ਗੈਰ-ਲੜਾਈ ਪੱਧਰ 'ਤੇ 5,819 ਖ਼ਾਲੀ ਅਸਾਮੀਆਂ ਸਨ। ਉਹਨਾਂ ਕਿਹਾ ਕਿ 2022 ਵਿਚ ਅਗਨੀਪਥ ਸਕੀਮ ਤਹਿਤ ਭਾਰਤੀ ਹਵਾਈ ਸੈਨਾ ਵਿਚ ਅਗਨੀਵੀਰ ਵਜੋਂ 300 ਅਸਾਮੀਆਂ ਦਾ ਇਸ਼ਤਿਹਾਰ ਦਿੱਤਾ ਗਿਆ ਹੈ ।