ਅਮਰੀਕਾ 'ਚ ਰਾਹੁਲ ਗਾਂਧੀ ਨੇ ਭਾਰਤ ਵਿਰੋਧੀ ਇਲਹਾਨ ਉਮਰ ਨਾਲ ਕੀਤੀ ਮੁਲਾਕਾਤ, ਬੀਜੇਪੀ ਨੇ ਸਾਧੇ ਨਿਸ਼ਾਨੇ
ਸਾਂਸਦ ਇਲਹਾਨ ਉਮਰ ਨੇ PM ਮੋਦੀ ਦੇ ਭਾਸ਼ਣ ਦਾ ਕੀਤਾ ਸੀ ਬਾਈਕਾਟ
ਅਮਰੀਕਾ: ਕਾਂਗਰਸ ਦੇ ਸੀਨੀਅਰ ਨੇਤਾ ਅਤੇ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਤਿੰਨ ਦਿਨਾਂ ਅਮਰੀਕਾ ਦੌਰੇ 'ਤੇ ਹਨ। ਇਸ ਦੌਰਾਨ ਰਾਹੁਲ ਗਾਂਧੀ ਨੇ ਅਮਰੀਕੀ ਸੰਸਦ ਮੈਂਬਰਾਂ ਦੇ ਵਫ਼ਦ ਨਾਲ ਮੁਲਾਕਾਤ ਕੀਤੀ। ਇਸ ਮੁਲਾਕਾਤ ਦੀਆਂ ਕੁਝ ਤਸਵੀਰਾਂ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਹੀਆਂ ਹਨ, ਜਿਨ੍ਹਾਂ ਨੂੰ ਲੈ ਕੇ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਇਨ੍ਹਾਂ ਤਸਵੀਰਾਂ 'ਚ ਰਾਹੁਲ ਗਾਂਧੀ ਨਾਲ ਭਾਰਤ ਵਿਰੋਧੀ ਇਲਹਾਨ ਉਮਰ ਨਜ਼ਰ ਆ ਰਹੇ ਹਨ। ਹੁਣ ਭਾਜਪਾ ਨੇ ਇਸ ਨੂੰ ਲੈ ਕੇ ਰਾਹੁਲ ਗਾਂਧੀ 'ਤੇ ਨਿਸ਼ਾਨਾ ਸਾਧਿਆ ਹੈ।
ਭਾਜਪਾ ਦੇ ਕੌਮੀ ਬੁਲਾਰੇ ਸੰਜੂ ਵਰਮਾ ਦਾ ਕਹਿਣਾ ਹੈ ਕਿ ਰਾਹੁਲ ਗਾਂਧੀ ਸੱਤਾ ਵਿੱਚ ਆਉਣ ਲਈ ਬੇਤਾਬ ਹਨ। ਇਸ ਕਾਹਲੀ ਕਾਰਨ ਹੀ ਕੋਈ ਕੱਟੜਪੰਥੀ ਇਸਲਾਮੀ ਇਲਹਾਨ ਉਮਰ ਨੂੰ ਮਿਲ ਸਕਦਾ ਹੈ। ਭਾਜਪਾ ਨੇਤਾ ਨਿਸ਼ੀਕਾਂਤ ਦੂਬੇ ਨੇ ਕਿਹਾ ਕਿ ਲਾਲ ਚੱਕਰ 'ਚ ਇਹ ਔਰਤ ਅਮਰੀਕਾ 'ਚ ਡੈਮੋਕ੍ਰੇਟਿਕ ਪਾਰਟੀ ਦੀ ਨੇਤਾ ਇਲਹਾਨ ਉਮਰ ਹੈ, ਜੋ ਖਾਲਿਸਤਾਨ ਅਤੇ ਕਸ਼ਮੀਰ ਨੂੰ ਵੱਖਰਾ ਦੇਸ਼ ਬਣਾਉਣ ਦਾ ਲਗਾਤਾਰ ਸਮਰਥਨ ਕਰਦੀ ਹੈ। ਇਸ ਵੇਲੇ ਰਾਹੁਲ ਗਾਂਧੀ ਜੀ ਅਮਰੀਕਾ ਵਿੱਚ ਇਸ ਏਜੰਡੇ ਲਈ ਸਮਰਥਨ ਇਕੱਠਾ ਕਰ ਰਹੇ ਹਨ। ਭਾਜਪਾ ਦੇ ਬੁਲਾਰੇ ਅਮਿਤ ਮਾਲਵੀਆ ਨੇ ਕਿਹਾ ਕਿ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਨੇ ਅਮਰੀਕਾ 'ਚ ਇਲਹਾਨ ਉਮਰ ਨਾਲ ਮੁਲਾਕਾਤ ਕੀਤੀ ਹੈ। ਇਲਹਾਨ ਭਾਰਤ ਵਿਰੋਧੀ, ਕੱਟੜਪੰਥੀ ਇਸਲਾਮੀ ਅਤੇ ਆਜ਼ਾਦ ਕਸ਼ਮੀਰ ਦਾ ਵਕੀਲ ਹੈ। ਪਾਕਿਸਤਾਨ ਦੇ ਨੇਤਾ ਵੀ ਇਸ ਬੈਠਕ ਨੂੰ ਲੈ ਕੇ ਚੌਕਸ ਰਹਿਣਗੇ। ਕਾਂਗਰਸ ਹੁਣ ਖੁੱਲ੍ਹ ਕੇ ਭਾਰਤ ਵਿਰੁੱਧ ਕੰਮ ਕਰ ਰਹੀ ਹੈ।
ਕੌਣ ਹੈ ਇਲਹਾਨ ਉਮਰ?
ਇਲਹਾਨ ਉਮਰ ਇੱਕ ਅਮਰੀਕੀ ਸੰਸਦ ਮੈਂਬਰ ਹੈ। ਉਹ 2019 ਤੋਂ ਅਮਰੀਕੀ ਕਾਂਗਰਸ ਦੀ ਡੈਮੋਕਰੇਟਿਕ ਮੈਂਬਰ ਹੈ। ਉਹ ਪਹਿਲੀ ਅਫਰੀਕੀ ਸ਼ਰਨਾਰਥੀ ਹੈ ਜੋ ਚੋਣਾਂ ਜਿੱਤ ਕੇ ਅਮਰੀਕੀ ਸੰਸਦ ਵਿਚ ਪਹੁੰਚੀ। ਉਹ ਸੰਸਦੀ ਸੀਟ ਲਈ ਚੋਣ ਜਿੱਤਣ ਵਾਲੀ ਪਹਿਲੀ ਕਾਲੀ ਔਰਤ ਵੀ ਹੈ। ਉਹ ਅਮਰੀਕੀ ਸੰਸਦ 'ਚ ਪਹੁੰਚਣ ਵਾਲੀਆਂ ਪਹਿਲੀਆਂ ਦੋ ਮੁਸਲਿਮ-ਅਮਰੀਕੀ ਔਰਤਾਂ 'ਚੋਂ ਵੀ ਹੈ। ਉਹ ਅਮਰੀਕਾ ਵਿੱਚ ਆਪਣੇ ਇਜ਼ਰਾਈਲ ਵਿਰੋਧੀ ਰੁਖ ਲਈ ਜਾਣੀ ਜਾਂਦੀ ਹੈ।