ਉਨਾਵ ਰੇਪ ਕੇਸ : ਭਾਜਪਾ ਵਿਧਾਇਕ ਕੁਲਦੀਪ ਸੈਂਗਰ ਵਿਰੁਧ ਐਫ਼ਆਈਆਰ ਦਰਜ, ਸੀਬੀਆਈ ਜਾਂਚ ਦਾ ਫ਼ੈਸਲਾ

unnao rape case fir ragister against bjp mla kuldeep sanger

ਨਵੀਂ ਦਿੱਲੀ : ਉਨਾਵ ਸਮੂਹਕ ਬਲਾਤਕਾਰ ਕੇਸ ਵਿਚ ਮੁਲਜ਼ਮ ਵਿਧਾਇਕ ਕੁਲਦੀਪ ਸੈਂਗਰ ਵਿਰੁਧ ਐਫਆਈਆਰ ਦਰਜ ਕਰ ਲਈ ਗਈ ਹੈ। ਵਿਧਾਇਕ ਵਿਰੁਧ ਆਈਪੀਸੀ ਦੀ ਧਾਰਾ 363 (ਅਗਵਾ), 366 (ਅਗਵਾ ਕਰ ਕੇ ਵਿਆਹ ਲਈ ਦਬਾਅ ਪਾਉਣਾ), 376 (ਜ਼ਬਰ ਜਨਾਹ), 506 (ਧਮਕਾਉਣਾ) ਅਤੇ ਪੋਸਕੋ ਐਕਟ ਤਹਿਤ ਮਾਮਲਾ ਦਰਜ ਕੀਤਾ ਹੈ। ਐਸਆਈਟੀ ਦੀ ਸ਼ੁਰੂਆਤੀ ਰਿਪੋਰਟ ਤੋਂ ਬਾਅਦ ਕੁਲਦੀਪ ਸਿੰਘ ਸੈਂਗਰ ਵਿਰੁਧ ਐਫਆਈਆਰ ਦਾ ਫ਼ੈਸਲਾ ਲਿਆ ਗਿਆ ਹੈ। 

ਇਸ ਤੋਂ ਇਲਾਵਾ ਉਨਾਵ ਜ਼ਿਲ੍ਹਾ ਹਸਪਤਾਲ ਦੇ ਸੀਐਮਐਸ ਅਤੇ ਈਐਮਓ ਭਾਵ ਐਮਰਜੈਂਸੀ ਮੈਡੀਕਲ ਅਫ਼ਸਰ ਨੂੰ ਵੀ ਸਸਪੈਂਡ ਕਰ ਦਿਤਾ ਗਿਆ ਹੈ। ਠੀਕ ਤਰ੍ਹਾਂ ਇਲਾਜ ਨਾ ਕਰਨ ਦੇ ਦੋਸ਼ ਵਿਚ ਤਿੰਨ ਡਾਕਟਰਾਂ ਵਿਰੁਧ ਅਨੁਸ਼ਾਸਨਾਤਮਕ ਕਾਰਵਾਈ ਸ਼ੁਰੂ ਕੀਤੀ ਜਾਵੇਗੀ। ਇਸ ਮਾਮਲੇ ਵਿਚ ਚੀਫ਼ ਮੈਡੀਕਲ ਸਰਜਨ ਡਾ. ਡੀ.ਕੇ. ਦਿਵੇਦੀ ਅਤੇ ਸਫ਼ੀਪੁਰ ਦੇ ਸੀਓ ਕੁੰਵਰ ਬਹਾਦੁਰ ਨੂੰ ਸਸਪੈਂਡ ਕਰ ਦਿਤਾ ਗਿਆ ਹੈ। 

ਬੁੱਧਵਾਰ ਰਾਤ ਭਾਜਪਾ ਵਿਧਾਇਕ ਕੁਲਦੀਪ ਸੈਂਗਰ ਲਖਨਊ ਵਿਚ ਐਸਐਸਪੀ ਦਫ਼ਤਰ ਅਪਣੇ ਕਈ ਸਮਰਥਕਾਂ ਦੇ ਨਾਲ ਗੱਡੀਆਂ ਦੇ ਪੂਰੇ ਲਾਮ ਲਸ਼ਕਰ ਦੇ ਨਾਲ ਪਹੁੰਚੇ ਸਨ। ਉਨ੍ਹਾਂ ਦੇ ਸਮਰਥਕਾਂ ਦਾ ਕਹਿਣਾ ਸੀ ਕਿ ਉਹ ਸਰੰਡਰ ਕਰਨ ਪਹੁੰਚਣਗੇ, ਪਰ ਵਿਧਾਇਕ ਕੁਲਦੀਪ ਸੈਂਗਰ ਨੇ ਕਿਹਾ ਕਿ ਮੀਡੀਆ ਜਿੱਥੇ ਆਖੇਗਾ, ਉਥੇ ਆਵਾਂਗਾ। ਉਸ ਤੋਂ ਬਾਅਦ ਉਹ ਸਮਰਥਕਾਂ ਦੇ ਨਾਲ ਵਾਪਸ ਚਲੇ ਗਏ। 

ਵਿਧਾਇਕ ਕਰੀਬ 40 ਗੱਡੀਆਂ ਦੇ ਨਾਲ ਆਏ ਸਨ ਅਤੇ ਸਾਫ਼ ਹੈ ਕਿ ਉਨ੍ਹਾਂ ਨੇ ਐਸਐਸਪੀ ਦਫ਼ਤਰ ਦੇ ਬਾਹਰ ਸ਼ਕਤੀ ਪ੍ਰਦਰਸ਼ਨ ਕੀਤਾ। ਉਨਾਵ ਮਾਮਲੇ 'ਤੇ ਇਲਾਹਾਬਾਦ ਹਾਈਕੋਰਟ ਨੇ ਖ਼ੁਦ ਗੰਭੀਰਤਾ ਦਿਖਾਈ ਹੈ ਅਤੇ ਅੱਜ ਹਾਈਕੋਰਟ ਇਸ ਮਾਮਲੇ ਦੀ ਸੁਣਵਾਈ ਕਰੇਗਾ। ਹਾਈਕੋਰਟ ਨੇ ਇਸ ਮਾਮਲੇ ਵਿਚ ਐਮਿਕਸ ਕਿਊਰੀ ਵੀ ਨਿਯੁਕਤੀ ਕੀਤਾ ਹੈ। ਉਥੇ ਹੀ ਸੁਪਰੀਮ ਕੋਰਟ ਇਸ ਮਾਮਲੇ 'ਤੇ ਅਗਲੇ ਹਫ਼ਤੇ ਸੁਣਵਾਈ ਕਰੇਗਾ। 

ਉਧਰ ਮੁਲਜ਼ਮ ਵਿਧਾਇਕ ਦੀ ਪਤਨੀ ਨੇ ਕਿਹਾ ਹੈ ਕਿ ਲੜਕੀ ਝੂਠ ਬੋਲ ਰਹੀ ਹੈ। ਕੋਈ ਜ਼ਬਰਜਨਾਹ ਨਹੀਂ ਹੋਇਆ ਹੈ। ਮੇਰੇ ਪਤੀ ਨਿਰਦੋਸ਼ ਹਨ। ਦੋਵਾਂ ਦਾ ਨਾਰਕੋ ਟੈਸਟ ਕਰਵਾਇਆ ਜਾਵੇ, ਜਿਸ ਨਾਲ ਸੱਚ ਸਾਹਮਣੇ ਆ ਜਾਵੇਗਾ। ਉਥੇ ਹੀ ਬਰੇਲੀ ਦੇ ਬੈਰੀਆ ਤੋਂ ਭਾਜਪਾ ਵਿਧਾਇਕ ਸੁਰਿੰਦਰ ਸਿੰਘ ਨੇ ਇਸ ਮਾਮਲੇ 'ਤੇ ਬੇਹੱਦ ਸ਼ਰਮਨਾਕ ਬਿਆਨ ਦਿੰਦਿਆਂ ਆਖਿਆ ਹੈ ਕਿ ਤਿੰਨ ਬੱਚਿਆਂ ਦੀ ਮਾਂ ਦਾ ਕੋਈ ਬਲਾਤਕਾਰ ਨਹੀਂ ਕਰ ਸਕਦਾ। ਇਹ ਵਿਧਾਇਕ ਕੁਲਦੀਪ ਸੈਂਗਰ ਵਿਰੁਧ ਸਾਜਿਸ਼ ਹੈ।