ਈਰਾਨ ਤੋਂ ਵਤਨ ਪਰਤੇ 233 ਭਾਰਤੀ ਨਾਗਰਿਕ

233 Indian nationals return home from Iran

ਅਹਿਮਦਾਬਾਦ, 11 ਜੂਨ : ਭਾਰਤੀ ਜਲ ਸੈਨਾ ਦੇ ‘ਸਮੁੰਦਰ ਸੇਤੂ’ ਮੁਹਿੰਮ ਤਹਿਤ ਭਾਰਤੀ ਜਲ ਸੈਨਿਕ ਜਹਾਜ਼ ਰਾਹੀਂ ਅੱਜ 233 ਭਾਰਤੀਆਂ ਨੂੰ ਈਰਾਨ ਤੋਂ ਗੁਜਰਾਤ ਲਿਆਂਦਾ ਗਿਆ। ਕੋਰੋਨਾ ਵਾਇਰਸ ਦੇ ਮੱਦੇਨਜ਼ਰ ਲਾਗੂ ਤਾਲਾਬੰਦੀ ਦੇ ਚਲਦੇ ਯਾਤਰਾ ਪਾਬੰਦੀਆਂ ਕਾਰਨ ਭਾਰਤੀ ਨਾਗਰਿਕ ਈਰਾਨ ਵਿਚ ਫਸੇ ਸਨ। ਗੁਜਰਾਤ ਵਿਚ ਰੱਖਿਆ ਜਨ ਸੰਪਰਕ ਅਧਿਕਾਰੀ ਪੁਨੀਤ ਚੱਢਾ ਨੇ ਦਸਿਆ ਕਿ ਜਹਾਜ਼ ਇਨ੍ਹਾਂ 233 ਭਾਰਤੀਆਂ ਨੂੰ ਲੈ ਕੇ ਈਰਾਨ ਦੇ ਬੰਦਰ ਅੱਬਾਸ ਬੰਦਰਗਾਹ ਤੋਂ 8 ਜੂਨ ਨੂੰ ਰਵਾਨਾ ਹੋਇਆ ਸੀ ਅਤੇ ਵੀਰਵਾਰ ਨੂੰ ਪੋਰਬੰਦਰ ਪੁੱਜਾ। ਇਨ੍ਹਾਂ ਭਾਰਤੀਆਂ ਵਿਚੋਂ ਜ਼ਿਆਦਾਤਰ ਸੂਬੇ ਦੇ ਵਲਸਾੜ ਜ਼ਿਲੇ੍ਹ ਦੇ ਵਾਸੀ ਮਛੇਰੇ ਹਨ। ਚੱਢਾ ਨੇ ਕਿਹਾ ਕਿ ਜਹਾਜ਼ ਪੋਰਬੰਦਰ ਬੰਦਰਗਾਹ ’ਤੇ ਖੜ੍ਹਾ ਹੈ, ਜਿਥੇ ਯਾਤਰੀ ਉਤਰੇ। ਸਥਾਨਕ ਪ੍ਰਸ਼ਾਸਨ ਨੇ ਉਨ੍ਹਾਂ ਨੂੰ ਉਨ੍ਹਾਂ ਦੇ ਨਿਵਾਸ ਸਥਾਨ ’ਤੇ ਭੇਜਣ ਦੇ ਇੰਤਜ਼ਾਮ ਕੀਤੇ ਹਨ। ਉਨ੍ਹਾਂ ਕਿਹਾ ਕਿ ਕੋਰੋਨਾ ਵਾਇਰਸ ਨੂੰ ਫੈਲਣ ਤੋਂ ਰੋਕਣ ਲਈ ਜਹਾਜ਼ ’ਚ ਸਵਾਰ ਹੋਣ ਤੋਂ ਪਹਿਲਾਂ ਸਾਰੇ ਯਾਤਰੀਆਂ ਦੀ ਸਿਹਤ ਜਾਂਚ ਕੀਤੀ ਗਈ ਅਤੇ ਯਾਤਰਾ ਦੌਰਾਨ ਸਮਾਜਿਕ ਦੂਰੀ ਦੇ ਨਿਯਮਾਂ ਦਾ ਪਾਲਣ ਕੀਤਾ ਗਿਆ। ਉਨ੍ਹਾਂ ਕਿਹਾ ਕਿ ਯਾਤਰਾ ਦੌਰਾਨ ਕਿਸੇ ਵੀ ਤਰ੍ਹਾਂ ਦੀ ਸਥਿਤੀ ਨਾਲ ਨਜਿੱਠਣ ਲਈ ਡਾਕਟਰ ਅਤੇ ਸਿਹਤ ਕਾਮੇ ਮੌਜੂਦ ਸਨ। (ਏਜੰਸੀ)