ਭਗੌੜੇ ਨੀਰਵ ਮੋਦੀ ਨੂੰ ਕੋਰਟ ਦਾ ਨੋਟਿਸ

ਮੁੰਬਈ, 11 ਅਗੱਸਤ: ਵਿਸ਼ੇਸ਼ 'ਭਗੌੜਾ ਆਰਥਕ ਦੋਸ਼ ਕਾਨੂੰਨ' ਅਦਾਲਤ ਨੇ ਦੋ ਅਰਬ ਅਮਰੀਕੀ ਡਾਲਰ ਦੇ ਬੈਂਕ ਘਪਲੇ ਦੇ ਮੁੱਖ ਦੋਸ਼ੀ ਭਗੌੜਾ ਹੀਰਾ ਵਪਾਰੀ ਨੀਰਵ ਮੋਦੀ ਦੀ ਭੈਣ ਤੇ ਭਰਾ ਨੂੰ ਅੱਜ ਜਨਤਕ ਸੰਮਨ ਜਾਰੀ ਕਰ ਉਨ੍ਹਾਂ ਨੂੰ 25 ਸਤੰਬਰ 'ਚ ਪੇਸ਼ ਹੋਣ ਨੂੰ ਕਿਹਾ ਹੈ। ਇਸ ਵਿਚ ਕਿਹਾ ਗਿਆ ਹੈ ਕਿ ਜੇਕਰ ਉਹ ਅਦਾਲਤ ਦੇ ਸਾਹਮਣੇ ਪੇਸ਼ ਨਹੀਂ ਹੋਏ ਤਾਂ ਉਨ੍ਹਾਂ ਦੀ ਜਾਇਦਾਦ ਨਵੇਂ ਕਾਨੂੰਨ ਤਹਿਤ ਜ਼ਬਤ ਕਰ ਲਈ ਜਾਵੇਗੀ। 

ਐਮਐਸ ਆਜਮੀ ਦੀ ਅਦਾਲਤ ਨੇ ਮੁਖ ਸਮਾਚਾਰ ਪੱਤਰਾਂ ਵਿਚ ਨੀਰਵ ਮੋਦੀ ਦੀ ਭੈਣ ਪੂਰਵੀ ਮੋਦੀ ਤੇ ਭਰਾ ਨਿਸ਼ਾਲ ਮੋਦੀ ਦੇ ਨਾਮ ਤਿੰਨ ਜਨਤਕ ਨੋਟਿਸ ਜਾਰੀ ਕੀਤੇ ਹਨ, ਕਿਉਂ ਕਿ ਇਨਫੋਰਸਮੈਂਟ ਡਾਇਰੈਕਟੋਰੇਟ ਨੇ ਨਵੇਂ ਕਾਨੂੰਨ ਤਹਿਤ ਇਕ ਐਪਲੀਕੇਸ਼ਨ 'ਚ ਇਨ੍ਹਾਂ ਨੂੰ 'ਹਿਤਬੱਧ ਵਿਅਕਤੀਆਂ ਵਿਚ ਗਿਣਿਆ ਹੈ। ਪੂਰਵੀ ਅਤੇ ਨਿਸ਼ਾਲ ਵਿਰੁਧ ਨੋਟਿਸ 'ਚ ਉਨ੍ਹਾਂ ਨੂੰ ਇਹ ਦੱਸਣ ਲਈ ਕਿਹਾ ਗਿਆ ਹੈ ਕਿ ਕਿਉਂ ਨਾ ਐਪਲੀਕੇਸ਼ਨ ਵਿਚ ਦੱਸੀ ਗਈ ਜਾਇਦਾਦ ਨੂੰ ਉਪਰੋਕਤ ਵਿਧਾਨ ਦੇ ਤਹਿਤ ਜ਼ਬਤ ਕੀਤਾ ਜਾਵੇ। ਅਦਾਲਤ ਨੇ ਦੋਹਾਂ ਨੂੰ 25 ਸਤੰਬਰ ਨੂੰ ਸਵੇਰੇ 11 ਵਜੇ ਅਦਾਲਤ ਦੇ ਸਾਹਮਣੇ ਪੇਸ਼ ਹੋਣ ਨੂੰ ਕਿਹਾ ਹੈ।

ਇਸ ਤਰੀਕ ਨੂੰ ਨੀਰਵ ਮੋਦੀ ਨੂੰ ਵੀ ਪੇਸ਼ ਹੋਣ ਲਈ ਕਿਹਾ ਗਿਆ ਹੈ। ਨੀਰਵ ਮੋਦੀ ਵਿਰੁਧ ਤੀਜੇ ਜਨਤਕ ਨੋਟਿਸ ਵਿਚ ਉਸ ਨੂੰ ਉਸੇ ਦਿਨ ਅਤੇ ਉਸੇ ਸਮੇਂ ਅਦਾਲਤ ਵਿਚ ਪੇਸ਼ ਹੋਣ ਲਈ ਕਿਹਾ ਗਿਆ। ਨੋਟਿਸ ਵਿਚ ਕਿਹਾ ਗਿਆ ਕਿ ਇਸ ਲਈ ਮੈਂ ਨੀਰਵ ਦੀਪਕ ਮੋਦੀ ਨੂੰ ਮੇਰੇ ਸਾਹਮਣੇ 25 ਸਤੰਬਰ ਸਵੇਰੇ 11 ਵਜੇ ਤਕ ਤੇ ਉਸ ਤੋਂ ਪਹਿਲਾਂ ਹਾਜ਼ਰ ਹੋਣ ਦੇ ਨਿਰਦੇਸ਼ ਦਿੰਦਾ ਹਾਂ ਤੇ ਅਜਿਹਾ ਨਾ ਕਰਨ 'ਤੇ ਇਸ ਅਰਜ਼ੀ 'ਤੇ ਨਿਯਮਾਂ ਮੁਤਾਬਕ ਕਾਰਵਾਈ ਕੀਤੀ ਜਾਵੇਗੀ।