ਕਸ਼ਮੀਰ ਦੇ ਪ੍ਰਾਈਵੇਟ ਸਕੂਲਾਂ 'ਚ 32 ਸਾਲ ਬਾਅਦ ਪੜ੍ਹਾਈ ਜਾਵੇਗੀ ਹਿੰਦੀ? 

ਜੰਮੂ-ਕਸ਼ਮੀਰ: ਕਸ਼ਮੀਰ ਦੇ ਪ੍ਰਾਈਵੇਟ ਸਕੂਲਾਂ 'ਚ ਕਰੀਬ 32 ਸਾਲਾਂ ਬਾਅਦ ਹਿੰਦੀ ਨੂੰ ਵੱਖਰੀ ਭਾਸ਼ਾ ਵਜੋਂ ਪੜ੍ਹਾਇਆ ਜਾਵੇਗਾ। ਜੰਮੂ-ਕਸ਼ਮੀਰ ਸਿੱਖਿਆ ਪ੍ਰੀਸ਼ਦ ਨੇ ਇਸ ਲਈ ਅੱਠ ਮੈਂਬਰੀ ਕਮੇਟੀ ਬਣਾਈ ਹੈ। 20 ਫਰਵਰੀ ਤੱਕ ਕਮੇਟੀ ਕਸ਼ਮੀਰ ਦੇ 3,000 ਤੋਂ ਵੱਧ ਪ੍ਰਾਈਵੇਟ ਸਕੂਲਾਂ ਵਿੱਚ ਪਹਿਲੀ ਤੋਂ ਦਸਵੀਂ ਜਮਾਤ ਤੱਕ ਹਿੰਦੀ ਭਾਸ਼ਾ ਪੜ੍ਹਾਉਣ ਲਈ ਸਿਫ਼ਾਰਸ਼ਾਂ ਸੌਂਪੇਗੀ।

ਇਹ ਵੀ ਪੜ੍ਹੋ : ਚੰਡੀਗੜ੍ਹ 'ਚ SHO ਦੀ ਧੀ ਦੇ ਵਿਆਹ ਸਮਾਗਮ 'ਚ ਵਾਪਰਿਆ ਹਾਦਸਾ;DGP, ਉਨ੍ਹਾਂ ਦੀ ਪਤਨੀ ਤੇ DSP 'ਤੇ ਡਿੱਗਿਆ ਲੋਹੇ ਦਾ ਖੰਭਾ

ਜਾਣਕਾਰੀ ਅਨੁਸਾਰ ਜੰਮੂ-ਕਸ਼ਮੀਰ ਵਿੱਚ 23,173 ਸਰਕਾਰੀ ਸਕੂਲ ਹਨ। ਜੰਮੂ ਖੇਤਰ ਦੇ ਸਰਕਾਰੀ ਅਤੇ ਪ੍ਰਾਈਵੇਟ ਸਕੂਲਾਂ ਵਿੱਚ ਹਿੰਦੀ ਭਾਸ਼ਾ ਪੜ੍ਹਾਈ ਜਾਂਦੀ ਹੈ। ਅਜਿਹੇ 'ਚ ਜੰਮੂ ਖੇਤਰ ਦੇ ਬੱਚੇ ਹਿੰਦੀ ਨੂੰ ਭਾਸ਼ਾ ਦੇ ਰੂਪ 'ਚ ਪੜ੍ਹਨ ਦਾ ਵਿਕਲਪ ਚੁਣਦੇ ਹਨ। ਜਦੋਂ ਕਿ ਕਸ਼ਮੀਰ ਵਿੱਚ ਹਿੰਦੀ ਵਿਸ਼ਾ ਪੜ੍ਹਾਉਣ ਦਾ ਕੋਈ ਸਿਸਟਮ ਨਹੀਂ ਹੈ। ਇਸ ਦਾ ਮੁੱਖ ਕਾਰਨ ਘਾਟੀ ਦੇ ਸਰਕਾਰੀ ਅਤੇ ਨਿੱਜੀ ਸਕੂਲਾਂ ਵਿੱਚ ਹਿੰਦੀ ਅਧਿਆਪਕਾਂ ਦੀ ਘਾਟ ਹੈ, ਕਿਉਂਕਿ ਹਿੰਦੀ ਪੜ੍ਹਾਉਣ ਵਾਲੇ ਕਸ਼ਮੀਰੀ ਪੰਡਿਤ 1990 ਤੋਂ ਕਸ਼ਮੀਰ ਘਾਟੀ ਤੋਂ ਪਰਵਾਸ ਕਰ ਗਏ ਸਨ।

ਕਸ਼ਮੀਰ ਦੇ ਸਕੂਲਾਂ ਵਿੱਚ ਹਿੰਦੀ ਪੜ੍ਹਾਉਣ ਲਈ ਅਧਿਆਪਕ ਨਾ ਮਿਲਣ ਕਾਰਨ ਬੱਚਿਆਂ ਨੇ ਹਿੰਦੀ ਪੜ੍ਹਣੀ ਬੰਦ ਕਰ ਦਿੱਤੀ ਹੈ। ਇਸ ਵੇਲੇ ਹਾਲਾਤ ਇਹ ਹਨ ਕਿ ਘਾਟੀ ਦੇ ਪ੍ਰਾਈਵੇਟ ਸਕੂਲਾਂ ਵਿੱਚ ਸਿਰਫ਼ ਅੰਗਰੇਜ਼ੀ, ਉਰਦੂ ਅਤੇ ਕਸ਼ਮੀਰੀ ਭਾਸ਼ਾਵਾਂ ਹੀ ਪੜ੍ਹਾਈਆਂ ਜਾਂਦੀਆਂ ਹਨ। ਹਾਲਾਂਕਿ, ਵਾਦੀ ਦੇ ਕੁਝ ਸਕੂਲਾਂ ਵਿੱਚ ਹਿੰਦੀ ਅਜੇ ਵੀ ਪੜ੍ਹਾਈ ਜਾਂਦੀ ਹੈ। ਇਹ ਉਹ ਸਕੂਲ ਵੀ ਹਨ ਜੋ ਸੀਬੀਐਸਈ ਬੋਰਡ ਨਾਲ ਸਬੰਧਤ ਹਨ। ਸੀਬੀਐਸਈ ਬੋਰਡ ਨਾਲ ਸਬੰਧਤ ਸਕੂਲ ਵੀ ਜ਼ਿਆਦਾਤਰ ਕੇਂਦਰੀ ਵਿਦਿਆਲੇ ਹਨ। ਮਾਹਰਾਂ ਅਨੁਸਾਰ, 1990 ਤੋਂ ਪਹਿਲਾਂ ਘਾਟੀ ਦੇ 70% ਤੋਂ ਵੱਧ ਪ੍ਰਾਈਵੇਟ ਸਕੂਲਾਂ ਵਿੱਚ ਹਿੰਦੀ ਭਾਸ਼ਾ ਪੜ੍ਹਾਈ ਜਾਂਦੀ ਸੀ।

ਇਹ ਵੀ ਪੜ੍ਹੋ : ਜੰਮੂ-ਕਸ਼ਮੀਰ 'ਚ ਹੱਦਬੰਦੀ 'ਤੇ ਨਹੀਂ ਲੱਗੇਗੀ ਪਾਬੰਦੀ, ਸੁਪਰੀਮ ਕੋਰਟ ਨੇ ਖਾਰਜ ਕੀਤੀ ਪਟੀਸ਼ਨ 

ਕਸ਼ਮੀਰ ਭਾਜਪਾ ਦੇ ਬੁਲਾਰੇ ਅਲਤਾਫ ਠਾਕੁਰ ਨੇ ਘਾਟੀ ਦੇ ਪ੍ਰਾਈਵੇਟ ਸਕੂਲਾਂ ਵਿੱਚ ਹਿੰਦੀ ਪੜ੍ਹਾਉਣ ਦਾ ਸਮਰਥਨ ਕੀਤਾ ਹੈ। ਠਾਕੁਰ ਨੇ ਕਿਹਾ ਕਿ ਭਾਸ਼ਾ ਨੂੰ ਕਿਸੇ ਧਰਮ ਨਾਲ ਨਹੀਂ ਜੋੜਿਆ ਜਾਂਦਾ। ਦੇਸ਼ ਦੇ ਦੂਜੇ ਸੂਬਿਆਂ ਵਿੱਚ ਵੀ ਮੁਸਲਿਮ ਬੱਚੇ ਹਿੰਦੀ ਪੜ੍ਹਦੇ ਹਨ। ਭਾਸ਼ਾ ਸਿੱਖਣ ਦਾ ਧਰਮ ਨਾਲ ਕੋਈ ਸਬੰਧ ਨਹੀਂ ਹੈ। ਦੂਜੇ ਪਾਸੇ ਗੁਪਕਾਰ ਗਠਜੋੜ ਦੇ ਬੁਲਾਰੇ ਮੋ. ਯੂਸਫ ਤਾਰੀਗਾਮੀ ਦਾ ਕਹਿਣਾ ਹੈ ਕਿ ਹਿੰਦੀ ਨੂੰ ਲਾਗੂ ਕਰਨਾ ਸੰਵਿਧਾਨਕ ਵਿਵਸਥਾਵਾਂ ਦੇ ਖ਼ਿਲਾਫ਼ ਹੈ। ਭਾਜਪਾ ਦੇ ਇਸ਼ਾਰੇ 'ਤੇ ਕਸ਼ਮੀਰ ਦੇ ਨਿੱਜੀ ਸਕੂਲਾਂ 'ਚ ਹਿੰਦੀ ਲਾਗੂ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਇਸ ਦਾ ਵਿਰੋਧ ਕੀਤਾ ਜਾਵੇਗਾ।